السلام عليكم، أنا مش عارفة أنتِ في سنة كم وهل تخرجتِ وفيه إمكانية تشتغلي أو لأ، بس عامة البنت مسؤولة من أهلها، والمفروض إن الأب مسؤول عن الإنفاق على أهل بيته، والأهل لما بياخدوا قرار الزواج وإنجاب أطفال للعالم فهم عارفين إنها مسؤولية هيتحملوها بكل تبعاتها. (كلكم راع وكلكم مسؤول عن رعيته) والرعاية تشمل التربية والإنفاق والتعليم، والحماية وغيرها. ** الأهل لهم حقوق وعليهم واجبات وكذلك الأبناء لهم حقوق على الأهل وعليهم واجبات تجاههم. ** أنتِ كبنت شرعًا مسؤولة من أهلك ووالدك واجب عليه الإنفاق عليكِ. دورك بقى، تعملي واجبك ناحيتهم. تبريهم وتطيعيهم في المعروف، وتساعديهم باللي في وسعك، عندك مذاكرة يبقى واجبك تنتبهي لدراستك وتتفوقي، يعني مثلا متعمليش زي الطلبة اللي الأب بيتعب ويشقى عشان يجمع الفلوس ويهملوا مذاكرتهم او ياخدوا الفلوس يصرفوها في حاجات تانية وميروحوش الدروس. ** مثلا فيه حاجات تندرج تحت بند الرفاهيات ممكن الاستغناء عنها لحد ما الظروف تتحسن أو لما تقدري تشتغلي وتشتريها لنفسك وهكذا. ** لو تخرجتِ او في فترة إجازة مثلا، ممكن تفكري ساعتها تشتغلي عشان تخففي شوية، بس ده ملوش علاقة بأنتِ تقيلة أو لأ. ** بالنسبة لكلام مامتك، فللأسف الأهل ساعات بيرموا كلام صعب ظنًا منهم إنهم كده بيدفعوا الأبناء لتحمل المسؤولية ويخافوا من التقصير والإهمال. لو الكلام فضل مزعلك ممكن تصارحي مامتك وتتفاهموا أو تكتبي اللي مضايقك في ورقة وتحرقيه، وادعي ربنا يرزق والدك من فضله ويفرج عنكم أي ظروف صعبة. وبالتوفيق إن شاء الله.
لعرض الإجابة في فدني اضغط هنا