السلام عليكم، بصي يا شمس، احنا مش مطلوب مننا نكون نسخ من حد... كل شخص وله طبيعته. أنتِ طبيعتك مش بتحبي التعامل مع الناس والضحك وكده لكن أجبرتِ نفسك تكوني شخص مش هو أنتِ فطبيعي مع الوقت تحسي بخنقة وضيق وكره للوضع. أختكِ دي طبيعتها واللي بيميزها لكن أنتِ مميزة بطبيعتك وكان المفروض تعرفي قيمتك وقدراتك وتطوعيها عشان نفسك مش عشان رضا الغير عنك. متخافيش تكوني نفسكِ عشان الناس تحبك، بالعكس كل ما حاولتِ تجذبي انتباه الناس وتستميتين للحصول عليه كل ما للأسف بيجيب نتيجة عكسية. ممكن لاشعوريًا الشخص يتصرف بطريقة تنفر الناس منه على عكس الشخص اللي بيحب نفسه ومتقبلها حتى لو الناس شايفة فيه عيوب، حبه وتقبله لنفسه وثقته بها بينعكس عليه وبيخلي الناس من غير ما هو يبذل جهد تميل له. فوقفي خالص وكفاية ضغط على نفسك، أنتِ مش عارفة ترجعي للسابق والهدوء ممكن عشان جواكِ خوف من خسارة اللي حققتِه مع العلاقات حولك فمش قادرة تتنازلي وتسمحي لنفسك تتعافى. أي عادة بتاخد وقت سواء عشان تبنيها أو عشان تتخلصي منها هتبذلي مجهود؟ أيوه. بس في الاتجاه العكسي، زي ما بذلتي مجهود بالبداية عشان تكوني نشيطة اجتماعيًا. أعتقد هيفيدك تشوفي كورس يعلمك مهارات التواصل الاجتماعي، هيكون فيه توازن لشخصيتك وتعاملاتك الاجتماعية وإزاي تتواصلي صح مع الناس. ولو مقدرتيش تدربي نفسك لوحدك على الاتزان والهدوء ممكن تجربي تتواصلي مع خبيرة من خبراء فدني تساعدك بخطوات عملية، وربنا يوفقك إن شاء الله.
وعليكم السلام ورحمة الله وبركاته ، جزاك الله خيرا
تم النشر الأحد، ٣١ أغسطس ٢٠٢٥
لعرض الإجابة في فدني اضغط هنا