السلام عليكم
انا طالب في حاسبات ومعلومات لسه سنه أولي وطالع من ثانوية عامة بحياة نفسية، أخطاء ، وبعد عن ربنا وحاجات كتير ولكن الحمد لله أنا بدأت ارجع ابقا احسن وبدأت ارجع لربنا والحمد لله انا في نعمه كبيره الحمد لله وتقبلت أخطائي وبحاول إصلاحها ،
مشكلتي الأساسية حاليا هي مستقبلي انا بدأت الكليه بغضب وكبت وعدم وجود أي شغف لحاجة مع اني كنت بدأت متحمس بس انا اتغربت عن محافظتي وأثر عليا في الاول جامد بس على ما اتأقلمت خد مني الترم الاول كله
انا كنت مش عارف ابدأ مذاكره ازاي ومتشتت بسبب الانجليزي اللي في المواد كلها ومش فاهم حاجه وبسبب خوفي من المستقبل واني افشل ومذاكرش انا بسبب التفكير ده مفتحتش كتاب اصلا وفعلا وقعت وفشلت ودخلت الميد تيرم بتاع الترم الاول وجبت منه درجات بسيطة
وساعتها حسيت اني فعلا بضيع قولت هشد وافوق للأسف معرفتيش اتحرك ودخلت في معركه مع شيطاني وخوفي من المستقبل والتردد اني أبدأ والخوف من المذاكره وخسرت انا تاني ودخلت الفاينل وانا عندي يقين تام اني هشيل مواد وكما توقعت فعلا بس قولت هيبقوا مادتين اكتشفت أنهم اربعه وساعتها حسيت اني فعلا ضعت
أول مره في حياتي اشيل مواد اصلا والدتي قولتلها هي تماسكت وقالت اكمنك أولى بس وكلام بتحاول تصبر نفسها وتصبرني بس انا كنت فعلا بتكسر من جوايا
انا مقولتيش لوالدي حاجه والدي لو عرف هيلعن حظه في الدنيا ويقعد يقول انه فشل أنه يعلمني أو يربيني وهيقعد يندب حظه انا اسف اني بتكلم كده على والدي منكم تفهموني غلط بس انا مش قصدي حاجه انا بحترمه وبحبه والله بس هو فعلا هيعمل كده وكمان هو أهم حاجه عنده الوقت
انت بتضيع وقت العمر الحياة بتجري ومينفعشي تضيع دقيقه غير في حاجه مفيده وانا خوفي من المستقبل اتبني علي فكره خوفي من إن الوقت يضيع وانا معملتيش حاجه.....
المهم انا بدأت الترم الثاني قولت اتغير فعلا واتغير مع ربي وارجعله فعلا عشان انا ربنا بيبتليني عشان ارجع وخلاني ابعد عن محافظتي عشان ارجع له والحمد لله من فضل ونعمه ربنا عليا بدأت افوق فعلا ورجعت وحاولت اصوم اتنين وخميس وأحاول اسمع قرأن عمتا انا دائما بسمع قرأن بس حاليا فعلا بطلت اسمع أغاني وبدأت قرأن بس
وكنت دخلت رمضان واني واخد عهد علي نفسي مسبشي يوم فيه تراويح بس للأسف ضعفت وتكاسلت وضعيت مني حوالي خمس ايام متقاطعين وبدأت في اليوم احاول اقرأ قرأن ولو حتى صفحتين أو صفحه في اليوم واني مسبشي فرض في الصلاه بس برضه اوقات تكاسلت بس متماسك وأبطل اي ذنوب واغض بصري
انا مش بتغر بنفسي والله وكله لوجه الله وطلب رضاه مش رياء عشان اوقات بحس اني بعمل كده عشان الناس تقول عليا ده محترم وانا مش فارق معايا حد والله ودائما بدعي ربنا اني يجعل قلبي له فقط وأنه يخلوا من الرياء والشرك به وتكون ونيتي خالصه لوجه الله تعالى....
بس أثناء ده أهملت في المذاكرة برضه تاني عارف اني غلطان اني اتدلعت وزي ما بحاول اصلح علاقتي مع ربنا لازم اصلح مستقبلي برضه واهتم بالمذاكره بس فعلا انا من اول الترم مليش نفس افتح كتاب مش قادر اخلي عقلي يرجع طبيعي واصلحه تاني اصلا
حاولت اني امسح السوشيال ميديا والحمد لله قرار في محله من قبل رمضان وانا ماسحها وبحاول ارجع دماغي أنه يتقبل الدوبامين البطئ واريحه من الاسكرول عقلي جعان أنه يتشتغل تاني وأنه يرجع يفكر ويركز صح تاني وفي نفس الوقت هو عاوز دوبامين سريع بس بحاول ابطل والحمدلله في تقدم عن الاول كتير ...
انا اسف اني بطول في الكلام كتير بس طبيعتي نوعا ما كده واظن اني اتكلمت عن مشكله ليا قبل كده وذكرت بعض من كلامي دي فيها عشان منكم حد يشوف أنه شاف بعض الكلام قبل كده بس انا مشكلتي دلوقتي المذاكرة انا من ساعه كنت بحاول اذاكر وبكتب وبحاول افهم حاسس بصعوبه شديدة لدرجة اني تهربت من المذاكرة واني جاي اشتكي دلوقتي انا اصلا ورايا الميد تيرم برضه وهيكون يوم ٢٩ ولسه معرفشي المنهج بيكلم عن ايه ولسه يكتشف مفروض اذاكر ازاي اصلا في الكليه ،،...
اختصاراً لمشكلاتي ؛؛
١- خوفي من المستقبل واني ابدأ اصلا ودائما باصص هتبقي عامل ازاي كان اربع سنين ؟!
٢- خوفي اني افشل واني اطول في الكليه مفروض كليتي ٤ سنين خايف يبقوا اكتر ؟!
٣- اني ارجع اذاكر احسن من الاول وأبطل تهرب ؟!
٤ـ ازاي اذاكر ووجود مشكله الانجليزي في المواد دي ويمكن ده اللي مصعب عليا الدنيا اكتر ؟!
٥ـ خايف اني في الاجازه والدي يعرف اني شايل واني رايح امتحن سمر كورس هو والدي مسافر اصلا بس احتمال ينزل ولو منزلشي هو مفروض الإجازة هيخليني انزل اشتغل أو اتعلم حاجه تبع مجالي ؟!! ........
انا بخاف من والدي عامة وكمان هو معقد جدا وكمان خايف عليا من الفشل اولا عشان خاطر نفسي ثانيا اني نجاحي هينعاد على اهلي بالخير وانا نوعا ما من صغري متربي علي حته انت مينفعشي تفشل وانك انت السند لأهلك وانا بكره الفشل اصلا ومش عارف ازاي وقعت كده
٦ـنفسي ارجع شخص ناجح وابقي نجحت اني اكون مستقبل ليا ولاهلي ؟!
آسف على الكلام الكتير ده بس طبعي كده انا استفدت قبل كده لما كتبت مشكله تانيه قبل كده واتمنى اني استفيد من حضراتكم تاني
وشكرا مقدما ♥️
وعليكم السلام ورحمة اللة وبركاتة انت مشكلتك تقريبا كانت نفس مشكلتى من كام سنة أول ما دخلت الكلية بس أنا عايز أقولك كذا حاجة كدا أعتقد هيساعدوك جدا فى الأول الخوف اللى عندك دا طبيعى كلية جديدة حياة جديدة مكان جديد كليا طبيعى تخاف تغير فى نظام الدراسة اللى اتعودت عليها طول حياتك مع تغير اللغة أصلا أصبح انت قلقت واتدمرت ومفوقتش غير وانت شايل ٤ مواد الحل هنا بص لنفسك انت عايز إية هل انت شايف نفسك مع الجماعة اللى بيشيلوا وحابب تفضل فى المنطقة دية بمجرد ما تقول لا وتثق فى نفسك هتلاقى نفسك فوقت وعرفت انت عايز إية حوار تأخير التخرج ؛ حبيبى انت لية باصص كمان أربع سنين عايزك تبص دلوقتى انت فين وعايز إيه ازاى أطلع من الترم دا ب أعلى فائدة وأقل خسائر ازاى أعوض اللى حصل فى الترم الأول والدك متقلوش حاجة واوعد نفسك إنك لازم تعوض وساعتها تقولة انك تمام وماشى كويس إياك والمؤثرات الخارجية طول فترة الكلية ركز فى دراستك وبس لأنك مش حمل أى فشل تانى ربنا يوفقك ويكتبلك اللى فيه الخير 🤍
تم النشر الأربعاء، ٢٥ مارس ٢٠٢٦
هحاول ارد ع نقطه نقطه بس ممكن اطول شويه بالنسبه لمستقبلك متخافش منه لأنه حقيقي في كمية فرص بتيجي للانسان مش طبيعيه بس لازم تبقى كويس نفسيا وهادي على نفسك عشان تقدر تستغل الفرص دي بدل ما تبقى طول الوقت مستنزف ومرهق ومتقدرش حتى تساعد نفسك فاللي اقدر اقولك عليه انه المستقبل لو كمجهول ميخوفش لأنه زي مافي وحش في حلو وكتير اوي انما اللي عليك انك تسعى وانت دلوقتي بتقول مش قادر تفتح كتاب يبقى لو ذاكرت في اليوم ساعه يبقى انت كده بتسعى ومره ع مره هتلاقيك بتزود لوحدك المهم الاستمراريه وبالنسبه لخوفك من انك تطول في الكليه ف الخوف هيخليك تقف مكانك وتطول فعلا + اعرف ناس طولت في الكليه ويمكن اتخرجو بعدي بكام سنه وعادي يمكن انجح مني في كذا جانب من جوانب حياتهم وعايشين وعايزه اقولك اني كنت زيك كنت حد ناجح جدا ودرجات عاليه في ثانويه عامه وجيت في الكليه توهت جدا وكنت بفكر انا اللي اقسم المواد واطول سنين الكليه من كتر ما يأست اني انجح عادي زي الناس ونزلت في السمر تقريبا تلت سنين ورا بعض بس جيت في الاخر قررت اقوم عشان نفسي ولا عشان اهلي ولا عشان خايفه من كلام حد كنت بس عايزه اخلص من ده وفي الاخر اتخرجت في معادي وبتقدير جيد جدا الحمد لله لمجرد اني بس اتخلصت من القيود الخارجيه وركزت انا عايزه ايه وهنا ده يودينا لمشكلة والدك وهو خايف عليك بس مفيش حياه من غير فشل ومش عايزه اكون بحكم وانا معرفش تفاصيل حياتك بس مظنش اللي انت فيه ده ابتلاء زي ما بتقول اظن انه ربنا بيعلمك انك عادي تفشل انت حرفيا بتجلد نفسك وبتفكر في مليون حاجه سوا لمجرد انك شلت مواد لأول مره وانا فاهمه ومقدره ان اسلوب اهلك معاك مخليك بتفكر كده بس صدقني مفيش حد مبيفشلش واللي مفكر النجاح دايما بالشغل وكل ده بيبقى فاشل في جوانب تانيه من حياته عادي جدا ف تقبل ده المهم تقوم على رجلك حاول تنزل السمر وتنجح في المواد بتقدير كويس وحاول تتعامل مع نفسك صح يعني لو مش قادر تذاكر ع الاقل متضيعش محاضره او سكشن عشان يبقى عندك خلفيه، حط نفسك وسط صحاب وناس كويسه براحه هيجروك معاهم في الطريق الصح، واعمل لنفسك حاجه ليك انت سواء خروجه لمكان معين او تنزل جيم اي حاجه انت عارف انها هتفصلك وتخليك كويس وتبعدك شويه عن الافكار الكتير اللي في دماغك وده اسلوب ناجح جدا عن تجربه ويمكن دي اهم نقطه في نظري وبالنسبه للانجليزي فده عادي سيب نفسك مع الوقت هتتعود ومش هتعرف تذاكر بالعربي اصلا تاني😅 بس المهم ترجع تذاكر واتمنى انك تقدر تهون الدنيا على نفسك انت مش مثالي ومش مطلوب منك تكون كده وحتى لو بتخاف من والدك احترمه بس بدون ما تخلي قيود وهميه تمسكك وتوقفك خصوصا انه من كلامك باين انه بيحبك وبيخاف عليك مش مجرد سيطره او تحكم ف ده ميتخافش منه ده يتفهم قصده ويتحب بس نتعلم ازاي نفصل نفسنا عن كل ده عشان اما تكون بتحاول تقوم لنفسك هتقدر وهتعرف و صدقني كام سنه هتكبر وتعرف انك مسؤول عن حياتك لوحدك سواء فشلت او نجحت فده ليك انت وانك تفشل كذا مره بس النتيجه انك تكون انضج وفاهم اكتر احسن من نجاح بيخبي فشل داخلي او مشاكل وخوف مش عارف تتعامل معاهم واخر حاجه حاول متربطش كل حاجه ببعض بطريقه تتعبك يعني لو مقصر في علاقتك مع ربنا حاول طبعا ترجع واكيد اللي قريب من ربنا سهل ينجح واصلا ده النجاح الحقيقي بس بلاش بقى فكرة انه ربنا ابتلاني عشان كذا وده حصل عشان كذا وكل الكلام ده بيلغبط الدنيا اكتر فانت اعمل اللي عليك براحه وفي حدود امكانياتك ومن غير ما تزود الدوشه على نفسك واسفه اني طولت برده
تم النشر الثلاثاء، ٢٤ مارس ٢٠٢٦
وعليكم السلام ورحمة الله وبركاته يا عمر، ♥️ أشكرك على ثقتك وصراحتك، ده خطوة كبيرة إنك بتكتب وبتعبر عن اللي جواك. أنت مش لوحدك في الخوف ده، كتير من الطلاب بيمرّوا بيه خاصة في السنة الأولى، والحمدلله إنك راجع لربنا وبتحاول تصلح – ده أساس النجاح الحقيقي. ربنا قال: "وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ" (الطلاق:2-3). خلينا نحل المشكلات خطوة بخطوة، عمليًا ومن غير تعقيد: 1- خوف المستقبل والبدء: الخوف ده "شيطاني" زي ما قلت، بيخليك تتخيل 4 سنين فشل. ركّز على اليوم بس . قول: "بسم الله، هذاكر ساعة واحدة النهاردة". بعد كده، شكر ربنا وادعُ: "اللهم يسر ولا تعسر". كل يوم صغير بيبني المستقبل. 2- خوف الفشل وإطالة الكلية: الفشل مش نهاية، ده درس. كتير نجحوا بعد إعادة مواد (حتى أبطال في البرمجة!). هدفك: اجتياز الترم ده، مش الكمال. لو شلت مواد تاني، هتراجعها في الصيف بقوة أكبر. 3- العودة للمذاكرة بدون تهرّب: ابدأ صغير جدًا : 20-25 دقيقة مذاكرة + 5 دقائق راحة (تكرار 4 مرات يوميًا). استخدم ورقة: اكتب 3 مهام بس (مثل: "اقرأ فصل 1"). لو هربت، قوم اغتسل وقرأ قرآن صفحة وارجع. ربط المذاكرة بالعبادة: صلِّ قبلها ركعتين توبة. 4- مشكلة الإنجليزي في المواد: طبيعي في حاسبات! ابدأ بـ قاموس مصطلحات (ابحث "Computer Science English terms PDF" على جوجل، حمل واحد بسيط). كل يوم 10 كلمات جديدة + ترجمتها. شوف فيديوهات يوتيوب عربي عن المواد (قنوات زي "Elzero Web School" أو "Hassouna Academy"). اقرأ الملخصات أولًا بالعربي لو موجود، ثم الإنجليزي ببطء. 5- خوف من والدك في الإجازة: ربنا يهدّي أهلك ويفتح قلبكم. لو نزل، قول الحقيقة باختصار: "أبي، أنا بتعلم وهعدّي المواد في الصيف، بس محتاج دعمك". أظهر تقدمك (مثل جدول مذاكرة). في الإجازة: تعلم برمجة أساسية مجانًا (موقع freeCodeCamp أو Codecademy، عربي جزئيًا) – ده هيفرح والدك ويثبت إنك مش بتضيّع وقت. 6- تصبح ناجحًا لنفسك وأهلك: أنت سند أهلك بالفعل لأنك بتحاول. هدف أسبوعي: مذاكرة 3 ساعات يوميًا + صلاة + قرآن. تابع تقدمك في دفتر. بعد الميد تيرم (29)، احتفل بنجاح صغير (مشروب مفضّل ♥️). لو استمر الخوف، شوف خبراء في Fedni: https://www.fedni.net/experts – في متخصصين نفسيين وتعليميين هيساعدوك. وابحث أسئلة مشابهة في Fedni . يا عمر، أنت قوي وبتتقدّم (مسح السوشيال، رمضان، قرآن – برافو!). ربنا معاك، توكَّل عليه وابدا النهاردة. لو عايز جدول جاهز، قولي. الله يوفقك ويجعل دراستك نورًا! 💪🕌 شكرًا لك، وأنا هنا دايمًا يا حبيبي. 😊
تم النشر الثلاثاء، ٢٤ مارس ٢٠٢٦
شكرا و جزاكي الله خيراً 🤍
تم النشر الثلاثاء، ٢٤ مارس ٢٠٢٦
كورس البرمجه اولي من الإنجلش لأنه يعتبر منهجك اصلا بس مفيش ضرر لو اخدت جمبه انجلش والمنصه اللي قولتهالك متوفر فيها كل حاجه
تم النشر الثلاثاء، ٢٤ مارس ٢٠٢٦
فاهمه ان الدراسه ذات نفسها انجلش انت محتاج فعلا كورس بس كورس برمجه انا مش حاسبات انا ثانوي اصلا بس الفكره بما انك حاسبات ومعلومات وكلها شغل برمجه وكدا فلازم كورس برمجه لان الإنجلش العادي زيه زي العربي بالظبط وأشمل وأوسع يعتبر مالوش حدود ف اللي ينفعك فعلا ولازم تتعلمه اللي هو في حدود دراستك فيه منصة عليها كل الكورسات عموما يعني للبرمجه بلغات كتير زي البايثون والسي بلس وبالعريي ولغة الترميز وكورسات من الصفر حرفيا وهي مجانية وعليها برضو كورسات انجلش زي ما انت عاوز سواء محصلة لغويه او نطق انجلش او المحادثه والترجمه لو دخلت بس جوجل وكتب منصة معارف هتظهرلك سجل دخول وشوف الدورات التدريبيه ومعاها شهادات ممكن تشتغل بيها بس شهادتها مش زي شهادة الجامعة عموما بس هي دليل انك أتممت تعلم كورس او جزء من كورس واهم حاجه التطبيق علي كل اللي بتعمله علشان يترسخ في ذهنك وتكون شخص مجتهد وشاطر في مجالك وحتي لو مش معاك شهاده جامعه ومعاك شهادة معارف او اي منصة تانيه وانت شاطر في مجالك هتتوظف عادي الفكره مش فكرة شهاده الفكره في عقلك انت وانك تستغلها صح ونصيحة مني كل اما تقع قون تاني أقوي من ذي قبل متخليش شيطانك يقف يضحك عليك انت اضحك عليه كل اما تبقي اقوي مش معني اني اصغر يبقي لسه ما اتعلمتش اوي واتحطيت تحت ضغط لا خد مني النصيحه وصدقني هتفرق معاك النصيحه بالمعني مش بالسن
تم النشر الثلاثاء، ٢٤ مارس ٢٠٢٦
عموما اللي حصلك دا عادي فيه طلاب كتير بيشيلو في اول سنه ليهم لكون لسه النظام غريب وكمان الأساس في الدراسه اللي هي الإنجلش مش كويسه ف دا شئ متوقع انه يحصل بس الفكره في اي؟ ان متيأسش ابدا وحاول مره واتنين وتلاته وعشره وميه لحد ما توصل للي عاوزه حتي وان كان اللي عاوزه تنجح بس واللي بيحاول عمره ما بيفشل ابدا ومحاولاتك دليل انك عندك يقين في ربنا وبرضو انت محتاج تمشي دماغك مش دماغك اللي تمشيك ان دماغك تهربك من المذاكره وتديك ادرينالين ودوبامين في حاجات بتفرحك عن المذاكره وترفعلك مستوي السعاده مشي دماغك وحط في دماغك ان لازم هتتعب وهتتعب تعب صعب انت مش عاؤف طاقتك قد اي بس عموما الإنسان يقدر يتحمل حاجات كتير اوي ولا يحمل الله نفسا الا وسعها ذاكر بس انت وهتلاقي بس ذاكر بجد وذكاء الإنجليزي مش صعب للدرجه اللي هي هو محتاج بس وقت لو هتخصصله بس كل يوم ساعه من يومك جمب المذاكره هتلاقيك بقيت احسن اوي اوي وعموما كل دي اختبارات هتعلمك لبعدين الإنسان مبيظهرش الشخصيه المعافره اللي جواه الا لما يتحط في ضغط وتوتر وخوف بس خلي خوفك إيجابي ويحفزك انك تكمل وموضوع انك خايف اللي بتعمله يكون رياء ف طلاما انت اعترفت بنفسك انك خايف من شئ زي دا ف دا اعتراف من نفسك انك بتعمله لله اللي بيصورلك الرياء دا هو الوسواس ودي حاجه جواك انت مش شيطان ولا حاجه ولا غني برضو عن الشيطان في كل حاجه ماشاء الله عليه يعني من غير مبالغه ففكرة انك تكون المسيطر هتدفع عنك وسواسك وهتمشيك في طريق النجاح طلاما انت واعي ل دا واخر حاجه متحطش رد فعل والدك قدامك علطول دا ممكن يحبطك مع انه ممكن يخوفك ويخليك تكمل بس هيقلل من عزيمتك لازم يكون خوفك نابع عنك انت مش من والدك والدك عرف قوله انا عملت اللي عليا والحمدلله علي كل حال قدر الله ما شاء فعل وهكمل ومش هوقف لحد ما اوصل مجرد ما يشوف اصرارك هيعرف ان الفشل مش هيعرفلك طريق ابدا وبالتوفيق متيأسش أهم حاجه عزيمتك واصرارك هما اللي هيخلوك تكمل وياما ناس كانت كدا وبقت كويسه في حياتها لكونهم طورو من نفسهم بس في اوقات الشده اللي زي دي
تم النشر الثلاثاء، ٢٤ مارس ٢٠٢٦
جرافيك ديزاين دا لو عاوز يشتغل حاليا هيتعلم ويشتغل علي اي موقع عادي لاكن هو لازم يركز وياخد كورس في تخصصه هو بس علشان الدنيا متوسعش منه وميعرفش يعمل حاجه ومفيش ضرر من تعلم حاجه زي دي تنفعه بس الاولي ما يخص الدراسة
تم النشر الأربعاء، ٢٥ مارس ٢٠٢٦
اتعلم جرافيك ديزاين
تم النشر الأربعاء، ٢٥ مارس ٢٠٢٦
بالنسبة لمذاكره الانجليزي انا بتكلم أن المواد بالانجليزي اي حلها يعني اخد كورس اذاكر جميل كتير انا اصلا هحتاج الانجليزي كا لغه عشان هحتاجه في مجالي بس دي الفكره عاوز اطوره ،وشكرا لحضرتك علي كلامك معاكي حق فعلا وجزاكي الله خيرا
تم النشر الثلاثاء، ٢٤ مارس ٢٠٢٦
لعرض السؤال في فدني اضغط هنا