السلام عليكم، أولا ربنا معك ويوفقك في دراستك وحياتك كلها. بصي ساعات الأهل بيتعاملوا بطريقة مختلفة من ابن لابن لأسباب مختلفة ترجع لهم، وساعات بيستعملوا الأسلوب الجارح ده لتشجيع الابن على المذاكرة والمنافسة، يعني يقولوا للابن أنت فاشل وأخوك أحسن منك ولا فلان أحسن منك، ويفتكروا إنهم كده بيشجعوه يبذل جهد ويتحسن. فبلاش تضغطي نفسك أكتر من الناحية دي وتكتئبي، فكري بس إنهم بيستخدموا أسلوب غلط لتشجيعك على المذاكرة. *** هل حاولتِ تتكلمي معهم وتناقشيهم في اللي بيحصل منهم؟ أنتِ قلتِ لما بتتكلمي بيقولوا لك قليلة اللأدب ومش متربية. هل بتنفعلي في الكلام ولا بتتكلمي باندفاع واتهام لهم؟ لأن الأهل طبعا هيرفضوا إن ابنهم يعلي صوته وينفعل عليهم حتى لو بيطالب بحقه، وأي لوم أو اتهام بالتقصير هيخليهم ينفعلوا عليه ويطلعوه هو الغلطان كنوع من الدفاع عن النفس ونفي الاتهام. *** فجربي الأول كده استعيني بالله وادعيه واختاري وقت هادئ تتكلمي مع مامتك بهدوء وبدون انفعال أو تحسسيها إنك بتتهميها وصلي لها إن الكلام بيجرحك ومش بيشجعك وأنتِ بتحاولي تبذلي كل ما عندك وعاوزة تفرحيهم وإيه المانع لما يدعموكِ وهكذا. المهم من غير انفعال واتهام. *** لو برضه زعقت لك أو رفضت كلامك وبرضه فضلوا يتعاملوا بنفس الطريقة فافصلي تماما بين مذاكرتك وكلامهم. لا تنتظري منهم دعم وتجنبيهم قدر الإمكان في البيت وخليكِ مركزة على مذاكرتك وقللي احتكاك عشان متحصلش المواقف اللي بتخليهم يسمعوكِ الكلام ده. رتبي نفسك واعملي خطة للمذاكرة واجتهدي ومتشغليش نفسك بأي كلام سلبي ولا تربطي صورتك وثقتك بنفسك بكلامهم وآراءهم. خليكِ أنتِ واثقة بنفسك واعملي اللي عليكِ وأنتِ متيقنة إن ربنا مش هيضيع تعبك. خلي إنجازاتك هي اللي تتكلم وتدافع عنك وتثبت لهم إنهم كانوا غلط في حكمهم عليكِ. *** لو استسلمتِ للاكتئاب وأهملتِ دراستك فهتوصلي للنتيجة اللي هم بيخوفوكِ منها وهتثبتي لهم للأسف إن كان عندهم حق. فاثبتي العكس وخلي كل تركيزك وطاقتك على المذاكرة ومتفكريش في أي كلام أو ضغوطات. عارفة ممكن يكون الموضوع صعب بس هو مش مستحيل، تجاهلي أي كلام سلبي يتقال، دخليه من أذن وخرجيه من الأذن الثانية، ولا كأنك سمعتِ حاجة وادخلي أوضتك وفرغي طاقتك وإحساسك بالضيق من الكلام في المذاكرة باجتهاد وتركيز حقيقي. اعملي اللي عليكِ واسألي ربنا النجاح وإنه يهدي لك أهلك، وإن شاء الله يوفقك ويصلح كل أحوالك. بالتوفيق.💚
جزاكم الله خيرا😘
تم النشر الخميس، ٥ نوفمبر ٢٠٢٦
لعرض الإجابة في فدني اضغط هنا