السلام عليكم، أنتِ قلتِها بنفسك، ماذا بعد؟ أولا، مفيش حاجة اسمها احنا لافرز... لو انتِ مسلمة فالحب ملوش غير طريق واحد حلال هو الزواج، فالعلاقة دي انتِ عارفة كويس إنها حرام. والأخ مش ناوي أصلا على زواج وقايل لك كده صراحة. منتظرة إيه منه؟ بتعملي إيه معه أصلا لحد الآن؟ إيه آخر علاقة اللافرز دي؟ هتكونوا في علاقة أفلاطونية للأبد يعني؟ مش هتيجي لحظة ضعف خالص؟ مش هيحصل تجاوزات لا قدر الله؟ شرعًا أصلا مينفعش حتى تسمعي منه كلام حلو ولا كلام حب ولا حتى تقولي له. ** ثم إن اللي انتِ فيه مش حب ده تعلق مرضي وإدمان محتاجة تتعافي منه. أنتِ متعلقة به عشان بتقولي وقف جنبك وأنقذك فمش قادرة تتخلي عن الصورة اللي في دماغك ولا القشاية اللي كانت نجدتك وقت غرقك. فكري في نفسك يا حبيبتي، انقذيها من اللي انتِ فيه ده. وصدقيني أنتِ معيشة نفسك في وهم إنه حبك الأول هو حبك الأخير ولو ارتبطتِ بشخص تاني مش هتقدري تحبيه ولا تنسي التاني وده وهم كبير جدًا. عادي جدًا تنسي وتحبي تاني ويبقى هو مجرد ذكرى باهتة قديمة. ** اقطعي العلاقة دي قبل ما هو يقطعها لأنه صدقيني هتيجي لحظة ويقطعها من نفسه ومش هيهمه مشاعرك. الرجل أصلا مش بيحب البنت المتعلقة به واللي لاصقة له طول الوقت وعاملاه محور كونها وناسية نفسها فمش بعيد في لحظة يقول لك أنا زهقت من ده ويبعد. فخدي أنتِ القرار وتحملي الألم اللي هتعيشيه دلوقتي أحسن ما تتألمي أضعاف لو هو اللي قرر يكسر قلبك ويبعد. إن شاء الله الخبراء النفسيين ينصحوكِ إزاي تكسري التعلق ده وتتعافي فانتظري إجاباتهم. ربنا معك.
اللي أنا شايفاه إن الحل في إيدك ومحتاجة بس تثقي بنفسك وتلجأي لربنا بصدق وتوسل، لازم تعرفي إن أي وضع أو علاقة تلاقي نفسك فيها فقدتِ احترامكِ لذاتكِ وانتقصتِ من نفسك فده وضع سام ومهمتك تنقذي روحك منه بأي ثمن أو طريقة. أكيد الموضوع هيبقى صعب وهتتألمي وهتاخدي وقت لكن صدقيني خسارتك لو استمريتِ في العلاقة السامة دي هتكون أكبر بمراحل.
تم النشر الأربعاء، ٩ يوليو ٢٠٢٥
معنديش إمكانية ادفع لثيراببست عشان اوريدى تابعت فترة طويلة، ومن الحاجات اللى مخلياه غالى عندى برضو أنه هو انقذنى حرفيا بعد أدوية اكتئاب كتير وحوارات كدة ف مبقتش وحشة وبومة زى الاول يعنى كل اللى حواليا لاحظوا تغيير شخصيتى للاحسن من بعد ماهو بقى موجود، طب اقوله نتعامل ك اخوات زى ما قالى لغاية ما اتعود بالتدريج؟ انت عارفة انا خايفة هو يمشى ابقى لوحدى وارجع شخصية وحشة اوى تانى بجد كنت بكرهنى جدا ومش بعمل اى حاجة فى حياتى ده اللى مخوفنى، اعتقد انا خايفة اشوف نفسي بعينى فبشوفها من خلاله هو ودى مشكلة اكبر بكتييير
تم النشر الثلاثاء، ٨ يوليو ٢٠٢٥
أنتِ كده موقفة حياتك عليه ومخلياه محور الكون فبالتالي أو ما بيغضب بتعتذري وأول ما بيرجع يتمسح ويعتذر ويبرر بتنسي وترجعي... متسمعيش كلامه ولا تمشي ورا كلامه هو.. امشي ورا دماغك أنتِ وفكري في مصلحتك متكونيش مربوطة بخيط يشدك ويبعدك زي ما هو عاوز وأنتِ طرف سالب ملكيش إرادة. أنتِ حقيقي محتاجة تفصلي فترة وتفصمي نفسك منه... أنصحك تتابعي مع حد من الخبراء هنا على فدني، ادخلي على صفحة الخبراء واختاري منها الخبيرة اللي تحسي إنها هتقدر تفيدك بالمتابعة معها واجحزي استشارة من صفحتها. اعتقد إنك محتاجة لمساعدة مختص عشان تتخلصي نهائيًا من الإدمان ده وتفوقي لنفسك.
تم النشر الثلاثاء، ٨ يوليو ٢٠٢٥
انا حقيقى تايهة بشكل لا تتخيليه انا مش فاهمة حاجة
تم النشر الثلاثاء، ٨ يوليو ٢٠٢٥
ماهو لما بقول لنفسى كدة وأنه بيعاملنى وحش وانا اغلى من كدة هو بعد اى موقف وحش أو بتعصب عليا فيه بيرجع يعتذر وأنه خلاص كل حاجة هتكون كويسة، يعنى دلوقتي قالى أنه امشى ورا كلامه مش دماغى وأبطل نكد وأنه معايا دايما وجنبى ولاڤ يو وكل ده، ف انا دماغى مش بتستوعب أنا ايه وهو فيه ايه وهو فعلا بيأذينى ولا أنا اللى بأذى نفسي
تم النشر الثلاثاء، ٨ يوليو ٢٠٢٥
حبيبتي هو بيقولك أهو، فليه تعملي كده في نفسك؟ مهما كانت غلاوة الشخص ده عندك، هو بيؤذيكِ جدًا وبيعاملك وحش... انتِ مش قادرة تشوفي ده عشان أنتِ متعلقة به مرضيًا فبترمي الغلط عليكِ وكمان بتعتذري له وتبرري. لو فكرتِ إنك ضعيفة فعلا مش هتقدري تاخدي الخطوة الصح... متقوليش على نفسك ضعيفة... كتير كانوا مكانك وتعافوا ووقفوا على رجليهم فأنتِ مش أضعف منهم... محتاجة بس تستعيني بربنا وتستقوي به وتقطعي أنتِ الخيط المريض ده قبل ما هو يقطعه. لو هو سبقك وقطعه يمكن تاخدي وقت أطول على ما تتعافي وهتفضلي متحسرة على نفسك واللي عملتِه فيها وإنك ذلتيها لشخص عمره ما حبك. اقفلي دلوقتي وقومي حالًا صلي وادعي ربنا من قلبك وبعدين تعالي على نفسك واعتبري نفسك بتعالجي طرف مريض ببتره وتكوي الجرح بعده... اقطعي تمامًا لو نفسك غالية عليكِ.
تم النشر الثلاثاء، ٨ يوليو ٢٠٢٥
لسة فاتحة الموضوع تانى التعصب وقايلى انى نكد وضغط وبسرع حوار انى اخسره بافعالى وافكارى، وأنه مش بيهدد يمشى بيتكلم بجد عشان زهق وقرف خلاص، بس قولتله ان دى pms وعشان كده انا بومة وبصايقه، وهدى شوية وقالى انا موعدتش بحاجة وقايلك من الاول أنه علاقة مؤقتة ولما تتخطبى انا همشى، بس انت بتصغطينى اكتر وده هيخلينى أمشى اسرع، انا مضايقة عشان حاسة انى كدة معنديش كرامة أو ضعيفة وفى نفس الوقت انا بعتذر وبقوله خلاص مش هنكد تانى
تم النشر الثلاثاء، ٨ يوليو ٢٠٢٥
حتى لو كان حب ومش تعلق، مش كل قصص الحب بتكمل ولا شرط إن عشان بتحبي حد تكوني معه وجو توأم الروح والكلام ده... بالعكس، ساعات كتير ممكن اتنين بيحبوا بعض فعلا لكن وجودهم سوا فيه أذى أكبر لهم والضرر الحاصل من القرب أكبر بكتير من وجع الفراق... فأنتِ بصي للوضع الحالي، أنتِ بتقولي هتتأذي وهتؤذيه لو بعدتِ... هل الوضع حاليًا صحي؟ هل دلوقتي مفيش أذى ولا تعب ولا عذاب؟ مفيش ضرر واقع عليكِ؟ من أبسط حاجة اللي هي حرمانك من إنك ترتبطي بشخص مستعد يلتزم فعلا ويكون لك رفيق حياة وعمر، لأكبر حاجة في حياتك وهي علاقتك بربنا اللي أكيد لا يرضى عن العلاقة دي مهما كان سموها في نظرك أو براءتها حاليًا. وجعك دلوقتي أهون بكتير من الاستمرار في وضع زي ده... هو بيقول إنه بيحبك لكن اللي بيحب واحدة حقيقي مستحيل ميفكرش في الزواج منها إلا لو عنده سبب قاهر أو خوف شديد من الالتزام والزواج وفي الحالة دي فحبك عنده أهون وأضعف من إنه يحارب مخاوفه عشان يكون معك.
تم النشر الثلاثاء، ٨ يوليو ٢٠٢٥
ماهو من بدرى بفكر فى كدة أنه ماذا بعد وانا مكنتش ناوية ارتبط بحد غير جوزى فيما بعد، انا بخاف يكون مش حب فعلا ومع ذلك حتى لو تعلق بس انا هأذيه جدا لو بعدت وهأذى نفسي، مش عارفه هكمل ازاى هو حرفيا اكتر حد بيساعدنى يدعمنى يحبنى عارف عنى حاجات مفيش مخلوق عارفها غيره وجات لحظة الضعف والتجاوزات كتير من زمان وبعدنا عنها وقالى خايف عليك عشان متتعوديش، تعامله معايا بيخلينى احس بالذنب كل ما افكر افتح الموضوع معاه أو اقوله حاجة
تم النشر الثلاثاء، ٨ يوليو ٢٠٢٥
لعرض الإجابة في فدني اضغط هنا