سلام عليكم ورحمة الله وبركاته. أنا مدرك تماما إن الخروج مع مأزق المشاعر الصعبة أمر مش سهل. لكن مدرك برضو إن أحد المخارج المهمة المثمرة هو تصحيح الأفكار. لو الأفكار اتصححت بشكل واضح وحاد ومقنع، ده بيساعد كتير في حلحلة المشاعر الصعبة مع الوقت. الفكرة اللي حابب أوضحها لحضرتك إن أول ما الإنسان يشعر إن فيه أمر معين ومحدد يكاد يكون هو طاقة النور الوحيدة في حياته اللي بيسعى ليها بكل جوارحه وحاسس إنه ده هيكون مصدر سعادته الوحيد، الهيئة دي أو هيئة قريبة منها، في رأيي المتواضع علامة واضحة جدا من علامات الخلل أو الاضطراب الذاتي اللي بيسبب آلام نفسية مصدرها الحقيقي هو الذات وليس الاحتياج الناقص، حتى لو كان الاحتياج ده طبيعي ومشروع. وده معناه إن الإنسان في الحالة دي لو مشتغلش عالسبب الحقيقي، فالالام النفسية عنده هتستمر حتى بعد تحقيق الاحتياج اللي كان متصور إنه هو سبب الامه النفسية. يعني كل إنسان عنده احتياجات كتيرة جدا فسيولوجية وعاطفية واجتماعية، وكلها احتياجات طبيعية ومشروعة، وافتقادها هيسبب ألم نفسي أو جسدي قطعا، لكن رغم كده كل إنسان قادر تماما على التعايش مع مقدار معين من الآلام دي، وتجاوزها بشكل لا يؤثر على حالته النفسية عموما وقدرته على إنجاز مسؤولياته اليومية. فأول ما يشعر الإنسان إن دنيته أصبحت شبه محصورة في موضوع واحد ومفيش حاجة قادرة تعوضه عنه، لابد يراجع نفسه ويتفهم إن ده نوع من الهوس بالموضوع. أنا شخصيا عرفت أمثلة كتير من رجال قبل الزواج مهووسين بموضوع الجنس وعايشين في كرب بسبب افتقاده، ونساء مهووسين بالعواطف والاحتواء وعايشين في كرب بسبب افتقاده، واللي بيحصل في الحالتين إن بعد الزواج الاتنين بيجيلهم صدمة إن الزواج مش زي ما كانوا متصورين، ويستمر الألم والفقد، ويبدأوا يوجدوا أي أسباب لتعليق المشكلة على الظروف أو على الطرف الآخر، بينما السبب الحقيقي هو مشكلة الهوس اللي بتخليهم يحطوا للأمر ده أكبر بكتير من حجمه كمصدر وحيد للسعادة. لذلك أنا بقترح إننا ندرب نفسنا على تقبل الأمر الواقع والتعايش معاه بظروفه وبنواقصه لأن هي دي طبيعة الحياة الدنيا. فلما نشعر بالنقص والاحتياج نتذكر انها فرصة جيدة للتدريب والتمرين على ملاحظة وإيجاد أمور أخرى موجودة فعليا بين إيدينا نتسند عليها وناخد منها الدعم زي الأهل أو الأصدقاء أو الشغل أو الدراسة أو الهواية أو الرياضة وغيرها من المساحات اللي لازم نتعلم نستخدمها علشان نساعد نفسنا في الأوقات الصعبة. المهارة دي هي اللي تضمن انه ان شاء الله بعد الزواج او بعد تحقيق اي احتياج بصفة عامة، هنقدر نكون ناضجين ونتعامل مع الأمور بشكل واقعي وصحي.
لعرض الإجابة في فدني اضغط هنا