عليكم السلام اولا. مين قال لك ان انت عندك رهاب اجتماعي يعني ايه اللي خلاكي مثلا تحطي في دماغك ان انا مثلا لو مش عايزه اقعد مع الناس مش عايزه اختلط بيهم فده ممكن يكون رهاب اجتماعي. أنت محتاجه بس شويه جراءه. محتاجه تعرفي انت عايزه ايه؟ عايزه تبقي اجتماعيه وتضحكي وتهزري وكده فانت ممكن تبقي مبدئيا. اما ما تدخليش مره واحده وتضحكي وتهزري عشان هيقولوا عليك طبعا ان انت هبله سوري معلش فخليكي على طبيعتك مفيش احلى من الانسان يكون على طبيعته. اتصرفي بطبيعيه جدا وسلسه ما تخافيش من كلمه ان انت هتقوليها ما تتردديش احنا اه لازم نفكر في الكلام قبل ما نقوله بس ما ينفعش نفكر وقت زياده عن اللزوم. في ناس كده في حياتنا بنقول عليهم ايه دول دبش بس قلبهم ابيض الناس دي ما بتعرفش تفكر في الكلام بس عندهم الجراءه ان هم يقولوا اللي هم عايزينه لان الكبت وحش. فانت خدي فرصتك. واول تصرف هتعمليه حاولي تعمليه مع ناس انت بتحبيهم وهما بيحبوكي اقعدي معاهم اضحكي هزري قولي الكلام اللي انت عايزاه. عشان الناس اللي بتحبك دايما هتتقبل منك اي حاجه وهتفهمك الصح من الغلط. فما تتجرأيش في الاول خالص مع ناس انت ما تعرفهمش. وان شاء الله مش هيطلع عندك ولا ر هاب اجتماعي ولا موضوع ثقه من نفسي خالص لان الثقه بالنفس دي بترجع للجرائه. انت كويسه انت ما فيكيش حاجه فا الثقه بالنفس انت اللي هتنميها. اما رهاب اجتماعي فالمجتمع بتاعنا مش مجتمع رهاب. احنا مجتمعنا يعني مجتمع سلس يحب الهزار والضحك والفرفشه هتهزري تضحكي تفرفشي خلاص الموضوع خلص فليه الرهاب بقى؟
لعرض الإجابة في فدني اضغط هنا