السلام عليكم، مشكلتك لها سببان، الأول.. وجود الهدف مع انعدام الدافع. الثاني هو الخوف من البداية وكثرة التفكير في الاحتمالات والطريق أمامك واللي بتؤدي لحالة من الشلل. دلوقتي أنت حددت أكتر من هدف من قبل لكن هل وضعت دوافع مع كل هدف؟ الدافع هو الوقود اللي هيحفزك ويحركك للتقدم حتى مع انعدام الشغف والتحفيز الخارجي وفترات الملل اللي طبيعي تمر بها في أي رحلة تعلم أو تطوير. ** نختار مثلا تعلم لغة جديدة، قبل ما تضع خطة او حتى تنوي البدء اسأل نفسك ليه هتتعلمها، إيه النتائج المترتبة والفوائد اللي هتعود عليك من إتقانك للغة؟ اكتب الدوافع والأسباب في ورقة وعلقها بحيث تكون أمام عينيك وتذكرك ليه بدأت الطريق ده. *** ثانيا، الخوف من البداية طبيعي، عادي تبقى متردد وغير متأكد من النتيجة وانت مش شايف نهاية الطريق ولا النتيجة اللي هتوصل لها وهل هتكون قد التحدي ولا لأ. دي كلها مشاعر مفهومة لكن غلط إنها تفضل عائق يمنعك من البدء. أنت مش هتعرف النتيجة ولا الطريق عامل إزاي إلا لما تبدأ ومش هتبدأ طول ما أنت بتفكر في طول الطريق بدل ما تركز على الخطوة الأولى المكشوفة لعينيك. ** ركز على الخطوة الأولى الصغيرة والخطوة التانية هتظهر واللي بعدها وهكذا هتلاقي الطريق بيظهر واحدة واحدة وأنت بتمشيه بثبات. لو عينيك هتفضل على الطريق اللي مخفي في الضباب وأنت مش شايفه أكيد هتتعثر وتقع واحتمال تفضل واقع ومتكملش. *** لا تنتظر الحماس عشان تبدأ ولا تعتمد على الشغف. ده مش هيخليك تعمل حاجة. قسم هدفك لأقسام صغيرة... حتى لو صغيرة جدا المهم تكون كافية لخداع عقلك حتى لا يتحجج بصعوبة البدء. ** لما تقول هتعلم اللغة الفلانية السنة دي، ده كده هدف عايم على عكس لما تقول هدفي مذاكرة محاضرة يومية من الكورس الفلاني أو حفظ أشهر ١٠٠ جملة خلال فترة كذا. وهكذا... ** كمان حاجة مهمة، بلاش فيديوهات تحفيز خارجي لأنها هتحمسك على الفاضي والدوبامين اللي هتاخده منها هيحسسك إنك أنجزت فعلا، وبلاش تتكلم مع حد عن إنك ناوي تعمل كذا وكذا أو تقعد تتخيل إنك وصلت للهدف لأن في الحالتين دول أيضا جسمك هيفرز دوبامين فهيحس بالإنجاز وأنت أصلا مش بدأت فمش هتاخد الخطوة الأولى من الأساس. *** أنصحك أخيرا تعمل اختبار الشخصية وتقرأ أو تشوف فيديوهات عن نموذج عجلة الحياة المتوازنة عشان تستعملها في وضع أهدافك الحياتية بتوازن. https://www.for9a.com/personality-test وتوكل على الله وابدأ وإن شاء الله تتغلب على مخاوفك وصعوبة الخطوة الاولى. وبالتوفيق.🌺
لعرض الإجابة في فدني اضغط هنا