بصوا يا جماعه انا مش عارفه ابدأ المشكلة منين بس مشكلتي ان إن طالبه خلصت الثانويه العامه واتصدمت بالواقع بتاعي جدا حرفيا كل أو أعلى الناس الي اعرفها دخلوا كليات بيحبوها انا جايبه ٨٥ وزعلانه جدا جدا إن اهلي مدخلونيش خاص وهما رافضين تماما 😭
أما نفسيتي فهي مدمره وباخد مهدئات انا حالياً محتاره ما بين كليه علوم إعاقه وتأهيل ولا علوم عاديه محتاره اوي اوي اوي اوي اوي اوي الافضل كشغل وكمستقبل
أرجو سرعه الرد لان التحويل باقي عليه ايام قليله
آه حاجه تانيه بصراحه انا ملاحظه ان موضوع التعليم أو كليات القمه دا عامل فرق اوي يعني كل البنات الي كليات صيدله وطبيه بتتجوز جوازات تقيله وحلوه بجد صعبوها علينا في كل حاجه يعني الواحد يقول ربنا يعوضني بجوازه حلوه طب ما أغلب الرجاله دلوقتي بقت بتتجوز على حسب مكتب التنسيق اعمل اي انا كدا حياتي وقفت خلاص
السلام عليكم، مفيش حاجة اسمها كده، راجعي أفكارك بدل ما تتعبي كتير مستقبلا. احمدي ربنا وركزي في الكلية اللي هتدخليها أيا كانت لأن حتى لو مش "كلية قمة" زي ما الناس بتقول، أنتِ اللي قادرة تبني نجاح ومكانة في المجال اللي هتدرسيه. وعادي مش كل اللي درس في "كلية قمة" بقى ناجح مهنيا ومجتمعيا. *** بالنسبة للزواج، مش عارفة أنتِ ساكنة في منطقة عاملة ازاي، بس مين قال إن ده الوضع في كل حتة. أيوه فيه بنات طبيبات وصيادلة تزوجوا من نفس مجالهم لكن كمان فيهم غيرهم تزوجوا من كليات تانية. الموضوع مش بالتنسيق خالص، ولا ينفع تتشاف إنها "جوازة تقيلة" لمجرد إنه دكتور ولا مهندس ولا ظابط. يا ما بنات تزوجوا زواجات في نظر المجتمع "جوازة تقيلة" لكن الوضع اللي عايشينه بعد الزواج حاجة تانية، وفيه منهم تعيسات بصورة لا تتخيليها ومنهم اللي انفصلوا بعد تجربة مريرة، أنا شخصيا قرأت كمية مشاكل زوجية مهولة من طبيبات وصيدليات لدرجة كفيلة تقفلك من الحياة وتعقدك من الزواج والرجال. فالوضع مش بالشكل اللي أنتِ متخيلاه. *** وزي ما قلت مفيش قاعدة ثابتة، فيه طبيبات تزوجوا من أشخاص خريجي كليات "من وجهة نظر المجتمع أقل" لكن أزواجهم بيقدروهم وبيحبوهم على عكس بنات تزوجوا أطباء وضباط وعايشين في جحيم. شريك الحياة الصح هو المحترم اللي فاهم يعني إيه زواج وعارف حقوق زوجته عليه وإزاي يسعدها ويقدرها، غير كده الحياة بدون زواج أرحم من زوج "كلية قمة" لكن لا دين ولا أخلاق ولا يصلح يكون زوج وأب. *** برمجي أفكارك وافهمي يعني إيه زواج وحياة أسرية فيها حقوق وواجبات بين الطرفين ويعني إيه شريك الحياة الصح وإزاي تختاريه قبل ما تقرري في مرحلة ما تفتحي باب الزواج. ** ونصيحة أخيرة ومهمة، إياكِ ثم إياكِ تنظري لنفسك على إنها قليلة لمجرد مجال دراستها أو تشوفيها في مكانة اجتماعية أقل ولا تحسسي اللي هيتقدم لك إنك أقل منه ولا إنه "أَمَلة" وهيرفعك اجتماعيا لمجرد الزواج منه. نظرتك لنفسك بتوصل للي قُدامك وعلى أساسها هيعاملك، فبلاش توصلي الإحساس ده للناس وقدري نفسك أكتر واصنعي نجاح يخليكِ فخورة بنفسك وقادرة تختاري الأفضل لمستقبلك. بالتوفيق إن شاء الله.💚💚
تم النشر الأحد، ٢٠ سبتمبر ٢٠٢٦
السلام عليكم، أي التفكير العقيم دا أي الزواجات على حسب المؤهلات مين قالك كدا أو أنتِ متابعة مين أصلًا.. أولًا تفكيرك خطأ جدًا ومفيش الكلام دا وبعدين أنتِ دالوقتي في الكلية ولا في الزواج بتفكري وتقرري إن مستقبلك وقف؟؟ يعني بدال ما تحمدي ربنا إن ربنا كرمك بمجموع حلو وكمان مش عايدة السنة... واضح جدًا إنك بتفكري في المظاهر كلية خاصة مؤهل عالي وحاجات كلها أصلًا شكليات!! ركزي مع نفسك وبلاش تقارني نفسك بحد أصحابك خدوا رزقهم بلاش تبصي على رزق غيرك... المستقبل مش في أيدك وأنتِ مش ضامنة لا زواج ولا كلية عشان عمرك مش بإيدك!! أعتقد إن المتعلم مش بيفكر كدا مش بيفكر هتتزوج زواجات تقيلة...الـ بيفكر كدا بتاع مقارنات ومظاهر وهيتعب في الاخر يعني!
تم النشر الأحد، ٢٠ سبتمبر ٢٠٢٦
أنا آسفة جدًا إنك بتمري بصدمة زي دي، وأقدر إن الواقع ضربك بقوة بعد الثانوية، خاصة لما تشوفي اللي حواليكي بيحققوا أحلامهم بينما أنتِ محاصرة بظروف العائلة والدرجات. ده شعور طبيعي ومؤلم، ومن الواضح إن نفسيتك متأثرة بشدة، فخدي وقتك في التعامل معاه بهدوء قدر الإمكان. بالنسبة لاختيارك بين كلية علوم الإعاقة والتأهيل وكلية العلوم العادية، خلينا نفكر عمليًا في المستقبل الوظيفي. كلية علوم الإعاقة والتأهيل غالبًا بتفتح أبواب أكثر تخصصًا في مجالات التربية الخاصة، التأهيل، والعمل مع ذوي الاحتياجات الخاصة، سواء في المدارس أو المراكز أو المنظمات، وده مجال فيه طلب متزايد في مصر مع الوعي الاجتماعي المتزايد. أما كلية العلوم العادية فبتعطي أساس علمي أوسع (كيمياء، فيزياء، بيولوجيا) وبتسمح بفرص في التدريس أو البحث أو المعامل، لكن المنافسة فيها أعلى والمسار الوظيفي أحيانًا أبطأ بدون دراسات عليا إضافية. الأفضل لكِ كشغل ومستقبل يعتمد على ميولك الشخصية: لو بتحبي التعامل مع الناس والتأثير المباشر في حياتهم، فـ"علوم الإعاقة والتأهيل" قد تكون أكثر إشباعًا وفرص عمل أسرع. أما لو بتميلي للعلوم البحتة والتجارب، فالعادية أفضل. جربي تسألي نفسك: أي مجال يثير فضولك أكتر؟ ولو أمكن، شوفي المناهج أو تحدثي مع طالبات حاليين في كلتا الكليتين لتوضيح الصورة. أنتِ قادرة على النجاح في أي منهما لو ركزتِ على تطوير مهاراتك الإضافية زي اللغات أو الدورات التدريبية. ابحثي عن أسئلة مشابهة على فدني للحصول على آراء أكثر تنوعًا، وتذكري إن التحويل قرار مهم فخديه بناءً على ما يناسبك أنتِ وليس الضغط الخارجي فقط. لو عايزة تتكلمي أكتر عن مخاوفك، أنا هنا.
تم النشر السبت، ١٩ سبتمبر ٢٠٢٦
لعرض السؤال في فدني اضغط هنا