انا كنت ثانويه عامه السنادي ومغشتش لانه حرام ولقيت انى جايبه ٥٠ فى الميه ودور تانى ومشيت علشان أنجح حالتى النفسيه سيئه جدا وبقى عندى عدم ثقه فى النفس بقيت مهمله فى نفسي واهتماماتى وصحتي ومكنتش بصلي ولا بحفظ قرآن ومكنتش حابه النقاب..
النتيجه طلعت لقيته معهد فنى تجارى فى دمياط وابقى وحيده بردو زى الثانوى صحابى كانوا أدبي وانا علمى رياضه وهم مخطوبين واتجوزوا ودخلوا كليه وانا لا..
مش بحقد عليهم والله ربنا يسعدهم بس بقى غصب عنى بقى فى مقارنات بعملها هم اتجوزوا وبقى معاهم كليه.. وانا بقيت عندنا شبه عانس ومدخلتش كليه وكان نفسى ادخلها اووى بزعل بجد وشايله فى نفسيتي واهلى زعلانين بس مش فى ايديهم حاجه..
دخلت معهد .. واهلى قالولى اتخطبى بقى عاوزين الفرح يدخل بيتنا وانا معنديش قابليه اتخطب ولا اتجوز وعاوزه اتجوز فى مدينه وانا ريف بس مش عارفه هيجى ازاى ..
وكمان كنت كلمت شاب من أولى ثانوى وعلاقاتنا مستمره لحد دلوقتي بس الايام دى لما واجهته وقلتله تعالى اتقدم قالى هو لسه مش ثبت فى الشغل ودا فعلا ..وكان بيقولى الاول هيتقدملى فى تانيه كليه بس دلوقتي مفيش كليات ... وامى فتحت معايا الموضوع النهارده وقالت عاوزين نفرح مفيش كليات بعد المعهد لان حالتنا الفترة دى وحشه..
دلوقتي انا عاوزه يبقى معايا شهاده حتى لو مش هشتغل بيها.. وكان نفسى ادخل كليه كل م اشوف وحده حاطه صور ليها قدام الكليه اتحسر على نفسى .. وانا معنديش قابليه للجواز.. وخايفه من حماتى لتكون وحشه ام بابا تعبت امى اوى..
بقيت خايفه يبقى حظى وحش فى الحياه.. لا بقيت بصلى نفسيتي بجد مدمرة بقيت بارده ومعنديش طاقه أعمل اى حاجه الروح الحلوة اللى كانت جوايا ماتت...أهلى عاوزين يفرحوا بيا وانا فى نفس الوقت عاوزه اكمل تعليم وخايفه اتخطب وبعد الجواز يقلى مفيش تعليم
السلام عليكم، فيه أفكار كتيرة محتاجة تصلحيها جواكِ عشان لو فضلتِ بها هتتعبي كتير، فكرتك عن النجاح والتعليم وعن الزواج وفكرة "العنوسة" وتصديقك لها واقتناعك إن فيه سن معين للبنت لو متزوجتش فيه تبقى تتوصم في المجتمع إنها "عانس" لدرجة إنك وصفتِ نفسك بشبه عانس و ده غلط كبير. الأفكار السلبية دي كلها هتوجهك لطريق غلط في حياتك فاقعدي مع نفسك وافهمي يعني إيه نجاح وتعليم وزواج وحياة ومسؤولية. *** أنتِ اعترفتِ إن كان فيه حاجات غلط حصلت خلال السنة وكان فيه إهمال بس ده مش معناه إنك تكملي بنفس النظام وبسبب إحساسك إنك مجبتيش مجموع كويس أو كلية فخلاص كده أنتِ فشلتِ فتكملي بنفس الإهمال والإحباط. *** النجاح مش بالكلية، حتى لو دخلتِ معهد فممكن تحققي نجاح فيه، حتى لو مش حابة الدراسة بالمعهد فممكن تدرسي ذاتيا على النت وتتعلمي مجال جديد خالص ملوش علاقة بالتعليم الحكومي ولا المعهد وتتفوقي فيه كمان. الخيارات مفتوحة أمامك والنجاح والتعليم مش مقتصر على الكليات والمعاهد. *** أنتِ لسه صغيرة قوي، والزواج مش قطار مطلوب منك تلحقي تنطي فيه قبل ما يمشي، هو محطة من محطات حياتك فمتهمليش كل حياتك في انتظاره، استعدي له وافهمي معناه ومسؤولياته الأول قبل ما تقرري تاخدي الخطوة دي وعشان تعرفي تختاري صح وتؤسسي بيت وأسرة سوية وسليمة. *** الشاب اللي بتكلميه اقطعي علاقتك به طالما مش مستعد يتقدم ولو هو أصلا مش مناسب للزواج فشيلي الفكرة من دماغك، لازم شريك حياتك تبقي متأكدة من دينه وأخلاقه وإنه يستحق يكون زوج وأب لأولادك فمتختاريش حد لمجرد تعلقتِ به او مشاعرك تحركت ناحيته. *** ارجعي صلي واستعيني بالله وادعيه يوجهك للطريق الصح ويكتب لك الخير، وابدئي صلحي خطوة خطوة أي حاجة مش عاجباكِ في حياتك. *** ونصيحة أخيرة، خوفك الشديد من تكرار تجربة والدتك للأسف ممكن بطريقة عكسية يدفعك لتكرار التجربة، فحاولي تبرمجي أفكارك وتفصلي نفسك عن تجربة والدتك وعلاقتها بجدتك وخلي أفكارك إيجابية ناحية المستقبل والزواج إن شاء الله وده هيخلي عقلك واعي ويتجنب أي أخطاء أو قرارات ممكن تؤدي بك لنفس تجربة والدتك أو تحقق مخاوفك من الزواج. *** اهدي على نفسك واستعيني بالله وإن شاء الله يكتب لك اللي فيه الخير. بالتوفيق.💚💚
تم النشر الخميس، ٢٤ سبتمبر ٢٠٢٦
أختي العزيزة، أنا أشعر بثقل كلامك وألمك الواضح، وأقدر إنك فتحتِ قلبك بهذه الصراحة. اللي بتمرين بيه مش سهل أبدًا، خاصة مع المقارنات اللي بتيجي لوحدها والشعور إن الحياة "فاتتك" في حين إن الآخرين تقدموا. لكن خليني أقولك بصراحة وتعاطف: أنتِ لستِ متأخرة، ولا "شبه عانس"، ولا محكوم عليكِ بحظ سيء. كل ده أفكار سلبية متراكمة بسبب الضغط النفسي والإحباط، وهي مش الحقيقة الكاملة. من الناحية الإسلامية، ربنا سبحانه وتعالى يقول "وعسى أن تكرهوا شيئًا وهو خير لكم"، وأنتِ فعلاً عملتِ الصح لما رفضتِ الغش. الصلاة والقرآن مش مجرد واجب، هما مصدر قوة وطمأنينة حقيقية، ولو رجعتِ ليهم حتى بخطوات صغيرة زي صلاة الفجر أو آية كل يوم، هتحسي بفرق تدريجي في طاقتك وثقتك. الروح اللي بتقولي إنها "ماتت" ممكن ترجع، لأنها مش ماتت، هي بس تعبت من الضغط والمقارنات. عمليًا، المعهد الفني التجاري خطوة موجودة دلوقتي، ورغم إنك مش راضية عنه، حاولي تستغليه بأقصى طاقة: ركزي على التفوق فيه، وشوفي الفرص المتاحة بعده زي الدبلومات أو البرامج اللي ممكن تكملي بيها تعليمك لاحقًا. كتير من البنات بيحققوا أحلامهم في التعليم بعد المعهد، مش لازم يكون الطريق مستقيم من أول ثانوية. أما بالنسبة للجواز، فأنتِ محقة في إنك عايزة تكوني مستعدة نفسيًا وتضمني التوافق، خاصة مع مخاوفك من الحماة أو الضغط على التعليم بعد الجواز. قولي لأهلك براحة إنك محتاجة وقت عشان تكملي تعليمك وتجهزي نفسك، وإن الجواز مش "فرحة سريعة" بس قرار مهم. الشاب اللي بتكلميه لو مش مستقر، فده إشارة واضحة إنك تستني حد أكثر ثباتًا. ابدئي بخطوات صغيرة يومية: اهتمي بنفسك وبصحتك حتى لو بسيط، وقللي المقارنات بتذكير نفسك إن لكل واحدة رزقها وتوقيتها. ابحثي عن أسئلة مشابهة على فدني عشان تشوفي تجارب بنات تانيين مروا بنفس الإحساس. أنتِ قادرة تتجاوزي الفترة دي، وهتكوني أقوى، وربنا هييسر لك الطريق اللي فيه خير لكِ إن شاء الله. لو عايزة تتكلمي أكتر عن أي جزء، أنا هنا.
تم النشر الثلاثاء، ٢٢ سبتمبر ٢٠٢٦
بصي يا بنتي انا مش هقولك متسمعيش كلام اهلك بس خليني اقولك حاجه الجواز ده نصيب وبيجي ف اي وقت واحنا مش بايدنا حاجه نعملها غير اننا نستخير الله ف كل شئ اذا كان خيرا لينا طبعا ثم نفسك انت ليكي شخصيه وعارفه مصلحتك واكيد انت متعلمه ولسه ف التعليم ف شايفه خطوة زي دي دلوقتي ممكن تأثر والله اعلم برضو بحالكم
تم النشر الخميس، ٢٤ سبتمبر ٢٠٢٦
لعرض السؤال في فدني اضغط هنا