السلام عليكم، جايز تفكيرك تجاه النعم وجلدك لذاتك والوصول لدرجة كره الذات خلاكِ توصلي لدرجة من الإنهاك النفسي هي اللي مأثرة على نفسك حاليا ومخلياكِ عاجزة عن التحرك والإنجاز رغم معرفتك بالأهداف وإيه المطلوب منك. الإنهاك ده خلى عندك فجوة بين معرفة أهدافك وقدرتك على تنفيذها وخلى طاقتك للحركة منعدمة. وممكن يكون حصل ضغوط الفترة اللي فاتت وتراكمات مقدرتيش تنفسي عنها وكل ده وصلك لمرحلة احتراق نفسي فمحتاجة فاصل تستعيدي فيه طاقتك ونفسيتك. وساعات قد يكون لأسباب صحية أو اضطرابات في النوم والمزاج. ** مش مطلوب منك حاليا تجبري نفسك على بذل جهد مضاعف بس حاولي تكسري الدائرة اللي أنتِ فيها، أنتِ دلوقتي بتحسي بتعب وفقدان طاقة واهتمام بتدفعك للتسويف وتأجيل المهام والهرب للنوم فتبدئي تلومي نفسك وتخافي من المستقبل فتضغطي نفسك وتكرهيها أكتر فتفقدي طاقة وشغف أكبر وتكرري الدائرة. فاقعدي مع نفسك كده واوصلي لجذر المشكلة عشان تعالجيه فتكسري الدائرة وتتحرري منها. *** عارفة الموضوع مش بالبساطة دي لكن برضه مش مستحيل ولو استعنتِ بالله أكيد هتقدري تتخطيه بإذن الله. الأول، حاولي تتأكدي من كشف باطنة إنك مش عندك أي مشاكل صحية بتسبب أعراض الخمول والتعب والاكتئاب. النقص الشديد في فيتامين دال مثلا بيعمل خمول وتقلب مزاجي واكتئاب واضطرابات في المزاج والنوم. فضروري تستبعدي الأسباب العضوية قبل ما نركز على النفسية. *** بالنسبة لأهدافك فمتحاوليش تضغطي على نفسك بإنك تبذلي طاقة وتعملي كل المطلوب منك. ابدئي بالقليل وبخطوات صغيرة حتى لو بسرعة سلحفاة. ولا تنتظري الشغف يرجع لوحده عشان ترجعي تتحركي. وبطلي كلام سلبي مع نفسك، زي إنك فاشلة أو مش كويسة أو قليلة أو عاجزة عن التغيير والرجوع لحال أفضل. الكلام السلبي بيترسخ في عقلك الباطن وبيزيد مشكلتك وأعراضك وبيؤكد الصورة السلبية اللي رسختِها جواكِ فامنعي أي كلام سلبي خالص وبدليه بكلام إيجابي. *** لو لقيتِ صعوبة في التعامل لوحدك مع المشكلة فمتتردديش تستعيني بمختصة نفسية تساعدك بخطوات عملية. *** وأهم من اللي فات، استعيني بالله، وأنصحك تلتزمي بقراءة الرقية الشرعية وسورة البقرة يوميا عشان برضه تكوني استبعدتِ كل الأسباب واستعنتِ بحفظ ربنا. وكرري كتير من ذكر "لا حول ولا قوة إلا بالله العلي العظيم" وإن شاء الله ربنا هيعينك ويمدك بالقوة اللي محتاجاها. وبالتوفيق إن شاء الله. 💚💚
لعرض الإجابة في فدني اضغط هنا