انا عايشة في بيت عيلة مع والدتي و اخواتي و قرايبنا لما بيبقوا جايين لجدتي لإنها عايشة في الشقة لوحدها بقول هعمل حاجة حلوة فبقدم اللي اقدر عليه و احطه في طبق حلو الاقيهم بيسألوا هو الطبق بكام انتوا بتجيبوا كذا دا غالي
و لما اكون راحة مكان بيبقوا عايزين يعرفوا انا راحة فين و راحة اعمل ايه و لما اكون جايبة حاجة يحاولوا يعرفوا انا جايبة ايه بس بأسلوب مش مباشر اللي هو انتي شكلك جاية من السوبر ماركت لو قولت لا يقعدوا يستنتجوا حاجة تانية و انا عشان خريجة فعندهم فضول لو انا قاعدة في البيت بعمل ايه و لو مشتغلتش مبتشتغليش ليه
و كلامهم تقيل جدا و جدتي عشان قاعدة لوحدها ف انا الحمد لله بنزلها على طول و دايما كلامها صعب و بتشتكي من امي لخلاتي بس انا طبعا مبقولش لامي حاجة زي دي لأن هي اصلا كفاية الكلام اللي بتقولهولها فبنزل كل يوم اشوف طلباتها و لو منزلتش يوم بتغضب عليا و خالتي معاها هو انتي وراكي ايه متنزلي اقعدي مع ستك
مع ان محدش يتجرأ يقول لولاده و لا لولاد خالي و خالاتي اللي هما اصلا مش بيجوا لجدتي اصلا غير كل فين و فين علي الرغم اننا في نفس البيت و انا بحاول ارد بهدوء بس الرد مش بيوصلهم ان مش عايزة حد يتدخل في حياتي فبيزيدوا فيها و انا عايزة ارد بهدوء برضه بس اوصلهم ان ميتدخلوش في حياتي عشان خايفة مرة اكون غضبانة فيطلع في صورة غضب شديد و ساعتها هيغلطوني انا
أفهم تمامًا إحساسك بالضيق من التدخلات دي، وهي شائعة في البيوت العائلية. عشان تحافظي على خصوصيتك بهدوء: ردي بإجابات قصيرة ومحايدة زي "الحمد لله كل حاجة تمام" أو "مش مهم التفاصيل دلوقتي"، وغيري الموضوع فورًا. قللي المعلومات اللي بتشاركيها، ولو سألوا عن حاجة قولي "هقولكم لما أحتاج رأيكم". كوني ثابتة في الردود دي كل مرة، ده هيوصل الرسالة تدريجيًا بدون غضب. لو عايزة نصائح إضافية، ابحثي عن أسئلة مشابهة في فدني.
تم النشر الجمعة، ٥ يونيو ٢٠٢٦
السلام عليكم، الفضول متغلب عليهم ومشغولين بيكي لدرجة تخنق بصي هو عامةً مش هقولك أختصري أو تجاهلي، هقولك حل بسيط خليكي باردة معاهم بمعنى لما حد فيهم يسألك كنتِ فين؟؟؟ أعملي نفسك مسمعتيش، أو مثلًا ممكن ترودي رد بارد زي كنت برة عادي!!! الفئة دي بجد مش هينفع معاهم غير الرد دا ولو الأسلوب دا منفعش عادي تستخدمي الصد يعني لما يسألك عن حاجة تكلمي بصيغة الجمع بمعنى مثلًا حد سألك أنتِ مش بتشتغلي ليه؟؟ قولي ياريت نتعلم ما ندخلش في حياة حد أو مثلًا أنا مش عايزة أشتغل محدش ليه دخل عادي على فكرة دي مش قلة أدب بالعكس الفئة دي متعبة وعايزة حد يوقفها عند حدها ولو ركزتي في ناس معينة مش هيقدروا يسألوهم عن حياتهم ولا عنهم حتى؟؟ عارفة ليه عشان مثلًا خالتك وقفتهم عند حدهم لكن أنتو عشان ما شاء الله محترمين فـ هما طايحين فيكم بس في ناس معينة الاحترام مش هينفع معاهم حافظي على نفسيتك ومش من حقهم يعرفوا كل حاجة عنك غير سطحيات، وبرضو كلمي والداتك أن موضوع الأسئلة بيضايفك خليها ترود هي مثلًا رد سريع زي لما يسألك تغير الموضوع تقولك مثلًا أدخلي هاتي كذا عملتي كذا وتتجهالهم خالص ولا كأنهم موجودين بجد الطيبة مع الناس دي مش هتنفع مينفعش والداتك تكون طيبة معاهم
تم النشر الجمعة، ٥ يونيو ٢٠٢٦
لعرض السؤال في فدني اضغط هنا