السلام عليكم، إذا كنتِ شايفاه شخص كويس وعنده مميزات تغلب السلبيات وفيه قبول مبدئي فممكن تعطيه فرصة وتقعدي زي ما والدتك قالت بعد ما تصلي استخارة، وممكن يكون فيه اتفاق من الأول أو تلميح من الأهل إن دي مجرد قعدة تعارف عشان تشوفي فيه قبول أو لأ وإنك مترددة، يعني يبقى فاهم مسبقا إن فيه احتمالية رفض من ناحيتك وميتعلقش زي ما قلتِ. موضوع بيت العائلة ده ممكن تتناقشوا فيه أثناء القعدة وتبيني موقفك بوضوح وهو لو مش هيقدر يجيب لك سكن منفصل يبقى محددين ده من الأول وعلى أساسه توافقي تكملي أو ترفضي. ممكن يقولوا لك ده مؤقتا لحد ما يجهز نفسه بس للأسف فيه شباب بيعتمدوا على فكرة (الأمر الواقع) يعني بيبين الأول للبنت إنه موافق على أي حاجة وده وضع مؤقت أو إنه هينفذ لها الحاجة الفلانية، وبعد ما تتعلق هي في فترة الخطوبة وتحبه أو يكتبوا الكتاب ساعتها يحطها أمام الأمر الواقع ويفرض عليها شروطه هو وقتها وغالبا البنت عشان بتحبه أو خايفة من لقب مطلقة بتضطر توافق وتتنازل عن حاجات كانت مستحيل تقبلها. فأنتِ عامة صلي استخارة وأنت محيدة مشاعرك تماما وتاركة الاختيار لربنا بيقين وساعتها لو الزواج منه فيه الخير ربنا هييسره لو العكس هيبعده عنك. لو حصل خطوبة، تأكدي إنك تفصلي مشاعرك تماما وتحكميعقلك بس خلال الفترة دي (سواء هو او غيره) المشاعر للأسف بتعمي البصيرة وبتخلي البنت تقبل بعيوب وأوضاع مش مناسبة لها وبتكتشف ده بعد الزواج. وربنا يوفقك للخير ويرزقك الزوج الصالح.
لعرض الإجابة في فدني اضغط هنا