وعليكم السلام ورحمة الله وبركاته، ولا مرة لازم نستهين باحاسيسنا ومشاعرنا، واكيد قرار الزواج هو قرار مصيري لأنه الزواج هو ميثاق غليظ، مشروع عمر ومسؤولية كبيرة . فأساس الزواج هو الاحترام قبل الحب، مادام الإحترام موجود فكل اشي بيتحسن مع الوقت مادام عقلنا ما عم يحط حاجز انو "مستحيل أحبه". كتير من الاشخاص(بحكي حتى عن صداقات ومش بس عن ازواج)، بكون بالبداية نفور رهيب، من الشخصية من كل اشي وبالآخر بيصيرو اعز الأصحاب، وحتى بيصير قبول للشكل بين بعض، الشخص الي منصير نحبو ونحترمه حتى شكله منصير نشوفو حلو وقريب... انا بنت وحاسة فيكِ، بس كمان في قرارات بحياتنا لازم نتحمل مسؤوليتها، لاننا بالاخر مسؤولين عنها. حاولي تقربي منو، اقعدو مع بعض احكو، ممكن يكون في كتير اشياء مختلفة بينكو حتى طريقة الكلام، حاولي اهتمي باهتماماته ممكن تلاقو اشياء مشتركة، وفي شخص نصحك تبنو ذكريات حلوة وجديدة، وانا بنصحك بنفس الإشي... توجهي لربنا، استعيني فيه اكثري من قراءة القرآن، اشكي لربنا عن شعورك وما تخلي اشي بقلبك، الله بحلّها سبحانه وتعالى... حاولي شوفي الاشياء الايجابية بزوجك، ولو كانت بسيطة، بكفي نعمة الستر والتعفف، الأنس... مادام الشخص محترم وما بإذيكي، مادامه بخاف ربنا، فبإذن الله مشاعرك بتتغير للاحسن، بشرط انه ما تخلي هاد التفكير قانون براسك وكإنه مش رح يتغير (لا صدقيني قابل للتغيير)، والشرط الثاني استعيني بالله وتقربي منه. وانتبهي انت زوجته، يعني الك حقوق وواجبات، ما تقصري بحقوقه بسبب هاد الشعور عشان ما تاخذي اثم..
لعرض الإجابة في فدني اضغط هنا