كنت بتعرض لتنمر كتير من وانا صغير على شكلي بالذات لاني كنت تخين وكانت نفسيتي بتبقى زفت ساعتها كنت بقعد اعيط لوحدي وافتكر اللي اهلي واصحابي بيقولوه عليا بقيت بخاف ساعتها من نظرات الناس مكنتش عارف ازاي احرك ايدي وانا ماشي كنت بقول الناس هتتريق عليا عملولي عقده لسه بعاني منها حتى الان
كان بيجيلي وساوس كتير زي اني مش عارف احرك ايدي مش عارف اقفل بقي ازاي ببقا خايف تكون شفايفي مقفوله غلط فالناس تتريق عليا جالي بعدها اضطراب قلق معرفش اذا كان له علاقه ولا بس انا دايما بفكر في رأي الناس
أنا تخطيت الوساوس دي من فتره ولكن لسه بعاني منها بنسبه قليله دايما بحس اني مليش رأي ورأيي مش مهم حتى لو كان فحياتي الشخصيه مع اني مع صحابي الحالين شخصيه قويه وقياديه وكله بيحترمني لاني قدرت اغير من نفسي برا عيلتي واكن دلوقتي عيلتي دايما بيقللوا من رأيي وشايفين ان رأيي مش مهم
هما مش بيقولو كده بس انا بلاحظ دا في عدم اهتمامهم حاسس ان انا قليل ان انا مستاهلش مش عارف ليه مع اني متأكد من جوايا اني شخص كويس انا عايز يبقا ليا مكانتي ورأيي ومهمنيش رأي حد
من فتره كنت بفكر في موضوع معين فكان رأيي فيه حاجه معينه فأول ما جت في بالي قلت لنفسي لاإراديا لا، لا أخويا هيقول عليا اي واهلي هتريقو عليا حسيت ساعتها اني قليل اني مجرد تابع بقيت وسط اهلي دايما بتريق على نفسي بقيت بتريق على نفسي واقلل مني بمعنى كل نفسك قبل ما حد ياكلك مع اني قدرت اتغلب مع كل ده مع صحابي الجداد ومبعملش كده معاهم بس دايما عندي رعب من عيون الناس
وانا ماشي بيبقى كل تفكيري الناس الي ماشيه دي هتقول عليا ايه بحس اني ماشي كل الناس بتبصلي وبياخدوا بالهم من أي حاجة فيا مش مثاليه بجد انا عانيت كتير بسبب الموضوع ده ولسه بعاني فعايز حل اخرج بيه من دايره الهموم دي واكون شخصيه قويه وميهمنييش راي الناس وامشي في الشارع مش شاغلني الناس هتقول عني إيه واعتذر على الاطاله
السلام عليكم ورحمه الله وبركاته. طبعا التنمر وخصوصا اللي من جوه العيله بيبقى من اثقل الحاجات اللي بتعدي على البني ادم اي حاجه بتبقى جايه من من الاهل اللي هم بالنسبه لنا المصدر الاساسي والاول طبعا بتبقى تقيلة فخلينا هنا نشوف برافو عليك اولا جدا انك يعني لسه بتحارب في الموضوع وطول الوقت بتحاول تحسن من نفسك وما تبقاش ثابت على النقط اللي هي تخليك مش راضي عن نفسك عموما. خلينا كده نبص على الموضوع حله لما نركز على ايه، اكثر حاجه مهمه هنا. انه اولا احنا نتخلى عن احتياجنا لنظره اهلنا لينا دي من اكتر الاحتياجات اللي بتكون موجوده من مرحله الطفوله الطفل بيكون طول الوقت محتاج اهله يشوفوا ومش بس يشوفوه يشوفوه يكونوا فخورين بيه فلما بيبدا ده ما يحصلش يا اما ما بيشوفوهوش ما بيهتموش بانهم يبصوا وهو بيعمل ايه او يركزوا معاه او بيكونوا بيشوفوه لكن بينتقدوه او بيقولوا كلام مش حلو او بيشوفوه بصوره قليله فهو طبعا بيفتقد الاحتياج ده طيب بعد ما بنكبر بعد ما بنكبر احنا بنقدر. شوف اجزاء اخرى من شخصياتنا وهي ان احنا نقدر نكون يعني مبسوطين بنفسنا من غير ما نكون اللي قدامنا شايفنا كويسين طبعا لما بيكون عندنا الاثار السلبيه زي اللي حاصلة معاك دي ما بنجيش في المرحله دي وبنعرف نقولك نفسنا طيب نعمل ايه حاليا حاليا نبص على اهلنا ونبقى متاكدين من نقطه مهمه جدا الناس دي حاليا مش هتقدر تديني اللي انا محتاجه فببساطه كده انا هبقى عامل طول الوقت قدام اهلي زي اللي واقف قدام حنفات ميه مكسوره طب حنفيه المايه المكسوره امتى هتنزل لي ميه عشان اشرب موضوع بعيد جدا جدا اللهم الا لو يعني ربنا اراد واتصلحت حد صلحها او صحابها صلحوها وجه فاعل الخير وصلحها ايا كان السبب اللي ممكن يكون ايه لما بنتاكد من ده وبنقتنع بده جوانا بناكد الفكره دي بنبدا نهدا واحنا واقفين قدام اهلنا ليه لان احنا بنبطل نبص لهم بالاحتياج انه شوفوني حلو انه شوفوني من غير ما تتريقوا عليا. احترموا رأيي، هبطل أنا من جوايا يكون فيه صوت بيقول كده، طبعا هي ممكن تفضل حلم، أمنية نفسي فيها بس هيكون صوتها ضعيف أو هتكون عابرة مش زي ما أكون طول الوقت أول ما بقابل أهلي أو أول ما بكون في البيت بيكون دي أكتر حاجة صوتها عالي جوايا. تاني خطوه احنا بنتحرك فيها هو ان احنا بنبدأ نعزز صورتنا الذاتيه ونعزز نظرتنا لنفسنا قصاد المرايه الشخصيه بتاعتنا يعني انا دائما بيكون المرايه بتاعتي اكبر من الناس اللي وراها تخيل كده معايا انه انت محتاج دلوقتي تجهز عشان تنزل فانا جايبه لك مرايه المرايه دي عباره عن 5 سم × 5 سم أنت متخيل دي هتكون قد ايه صغيره جدا طب المرايه دي هتظهرلي ايه المرايه دي يا دوبك هتظهر لي جزء من وشي مش اكتر من كده مش هقدر اشوف فيها حتى وشي بالكامل طب خلاص احنا هنكبر المرايه شويه هنخلي المرايه 10 في 10 برده ممكن يا دوبك اشوف فيها نص وشي طيب كل اما نكبر المرايه كل اما اخليها بمساحه جسمي كله. كلما اخليها كمان بتظهر الباك جراوند اللي ورايا الجزء اللي ورايا واقدر كده الف يمين وشمال فاقدر اشوف كل حاجه فيا ده هيخليني يكون نظرتي الاولى ورأيي الاول واعتباري الاول في نظرتي لنفسي هو اللي انا بشوفه في مرايتي اللي انا بشوفه بعيني انا الاول هل ده معناه ان انا معملش اعتبار خالص لنظره الناس اعتبار خالص راي اي حد لا هعمل اعتبار ولكن هيكون ده الشيء الثانوي الشيء اللي ورا المرايه فانه يكون ده اللي ورا المرايه غير بقى انا ألغي مرايتي خالص ويبقوا الناس هم اللي مرايتي ابقى حاطط اشخاص قدامي ومنتظر دائما انه اللي انا هشوفه في عينيهم هو ده اللي هيبقى بالنسبه لي المرايه تعزيز الصوره دي مهم جدا جدا عشان كده بيكون كويس قوي لو احنا بقى عندنا روتين بنقعد فيه احنا اللي نقييم نفسنا وهتقدر تعمل ده بشكل صح لما تلاقي نفسك بتقول انا شايف اني هنا غلطت انا شايف ان انا هنا كنت صح انا شايف ان انا محتاج هنا اعمل حاجه طيب انا ليه شايف كده انا جبت الفكره دي منين او انا حكمت على نفسي الحكم ده ازاي لو لقيت نفسي بقول عشان فلان قال لي الكلمه الفلانيه لا يبقى انا كده ايه واخد المرايه من الاشخاص مش واخدها من مرايه انا اللي شايفها مش من عيني انا لا هبدأ اعدل فيها واقول لا انا معجبنيش اللي انا عملته او انا شايف ان انا اخطات علشان انا حطيت نفسي في موقف مش لطيف خلاني سمعت كلمه مش لطيفه هنا انا عملت ايه انا شفت نفسي انا بس في المرايه ودي النظره الاهم بعدها ممكن بعد كده عادي جدا اقول بقى ايه انا ما احبش إن حد يقول لي كلمه زي دي او انا ما بحبش اغلط النوع ده من الغلطات لاني مش عاوز اسمع كلمه زي دي ده يعني مسموح بعد كده المهم ان يكون نظرتي الاولى جايه من نظرتي بعيني انا قدام مرايتي انا قبل اي حاجه ثانيه ده هيخليك الموضوع يختلف معاك كثير جدا بس حاول تتدرب عليه كثير وتركز على النقطه دي واتمنى ان شاء الله ان انا اكون افدتك يعني يعود عليك بالأثر الطيب ان شاء الله.
تم النشر الثلاثاء، ٢٩ أبريل ٢٠٢٥
عزيزي، أقدر مشاعرك وما تعانيه من آثار التنمر، وأفهم أن هذه التجارب قد تترك جروحًا نفسية عميقة تؤثر في شخصيتك وثقتك بنفسك. التنمر، خصوصًا في مرحلة الطفولة، يمكن أن يؤدي إلى مشاعر عدم الأمان والقلق من آراء الآخرين. للخروج من هذه الدائرة، من المهم أن تتبنى بعض الخطوات العملية: الاعتراف بالقيمة الذاتية : حاول أن تعيد تقييم نفسك ورأيك في قيمتك. استمر في التأكيد لنفسك أنك شخص جيد ومهم، وأن لديك ما تقدمه للعالم. التواصل الإيجابي : حاول محاورة الأشخاص المحيطين بك بطريقة إيجابية وفتح نقاش حول مشاعرك. قد تتفاجأ بدعمهم وتفهمهم. التخلص من الأفكار السلبية : عندما تتسلل إليك الأحاديث الداخلية السلبية، حاول أن تصرف انتباهك إلى أفكار إيجابية. يمكنك أن تسجل صفاتك الجيدة أو إنجازاتك حتى تذكّر نفسك ما هو جيد فيك. استشارة متخصص : لا تتردد في طلب المساعدة من معالج نفسي أو مستشار، فهم قادرون على تقديم استراتيجيات للتغلب على المخاوف والقلق. الدعم المجتمعي : حاول الانخراط في أنشطة تمكّنك من بناء علاقات جديدة وصداقات. بيئة داعمة يمكن أن تساعدك على استعادة ثقتك بنفسك. تذكر أن التغيير يحتاج إلى وقت وجهد، لا تتعجل النتائج. كن لطيفًا مع نفسك، وامنح نفسك الفرصة للنمو والتحسن. إن شاء الله تجد طريقك للسلام الداخلي والثقة بالنفس التي تبحث عنها.
تم النشر الأحد، ٢٧ أبريل ٢٠٢٥
هون على نفسك يا اخي الكريم واعلم ان كلنا عيوب واخطاء مهما كنا حتى اللى تشوفه وسيم في نظرك مليان عيوب ومش لازم تحاول تداري او تخفي تصرفاتك ولا تحركاتك وعلق قلبك بالله وصاحب اهلى الدين والاحترام مستحيل حد فيهم هيتنمر عليك وممكن تحول التنمر لو انت شايفه تنمر لفكاهه ظريفه من غير ما تزعل واخلع كل همومك عند باب ربك الكريم وعمرك ما هترضى كل الناس ولا كل الماس هترضى عنك
تم النشر الأحد، ٢٧ أبريل ٢٠٢٥
كلنا بنتعرص للتنمر وانا لغايه دلوقتي بتعرض للتنمر عشان طيب بزياده الوحش بس هو اللي بياذي الناس بالكلام مفهمش خير وانا عمري ما شوفت حد تخين أنه وحش بالعكس كنت يشوفه مرح ومميز الموضوع مفهوش علاقه بالشكل ممكن يكون شكلك رائع جدا وبردو محدش يسيبك في حالك اللعب جيم وابعد عن الناس المؤذيه ولما تشوفهم قول في وشهم حسبي الله ونعم الوكيل يمكن يحسوا
تم النشر الأحد، ٢٧ أبريل ٢٠٢٥
انا برضوا اتعرضت لتنمر كتير اووي وانا صغيره ولحد دلوقتي معنديش ثقه بنفسي وبرضوا زيك بالضبط بهتم بكلام الناس هتقول وتعمل وتخلي ولما كان حد بيطلب مني طلب كنت باجي علي نفسي واعملهوه علشان يقولو عليا كلام حلو اتعرضت برضوا لتنمر علي جسمي كنت تخينه شويه والله عشت فتره من الاضرابات النفسيه ما اتمني حد يعيشها بس دلوقتي ومن فتره فوقت من كل دا وبدات اشتغل علي نفسي لنفسي بس يعني خسيت وبقيت حابه نفسي اكتر ودا اداني ثقه بنفسي متهتمش بكلام الناس اعمل الحاجه الي هتريحك انت طلاما مش بتأذي حد ودايما لو الحاجه مش عجباك قول لا هتفرق في نفسك وثقتك بنفسك واشتغل وطور من نفسك وحته الناس دي انت بس زي ما قولت عند وسواس منها بس دي مش حقيقه وشكلك شخص طيب وناجح فهتقدر علي كل دا وتقدر ترجع احسن من الاول وصدقني انت احسن من الناس دي كلها واسفه اني طولت
تم النشر الأحد، ٢٧ أبريل ٢٠٢٥
حاول تشوف شغل ف مكان بعيد وتعمد تاخد سكن وتبعد عنهم فتره كبيره وتيجي إجازات بس وابدا من جديد مع ناس جديده وانجح بس قبل دا تكون مقرر انك ليك شخصيه قويه ف المكان الجديد ولما تنزل إجازات لبيتك وعيلتك تعمد انك تغير شخصيتك واسلوبك معاهم حتي لو هتكون قاسي ف المعامله الموضوع هايبقي صعب اول مره بس صدقني بعدها كل واحد هايخاد حذره كويس اوي قبل مايتكلم معاك
تم النشر الأحد، ٢٧ أبريل ٢٠٢٥
وفي نقطه تانيه لو الناس دي بتحبك مهما كان فيك من أخطاء وعيوب كانوا ساعدوك ونصحوك وطوروك عشان كده بقولك المشكله مش فيك المشكله أنهم مفهمش خير
تم النشر الأحد، ٢٧ أبريل ٢٠٢٥
لعرض السؤال في فدني اضغط هنا