بقالي سنين لوحدي ومن وانا طفل كنت لوحدي لما كان بيحصلي مشكله او لما كانت الناس بتتنمر عليا وانا طفل كنت بغطي وشي وأعيط من غير صوت يوميا عشان محدش يعرف ومكنتش بحكي لحد لان مكنش حد من اهلى بيسمعني
كبرت واتعرفت على تلاته صحاب في حياتي على مدار حياتي كلها هما الي كانو معايا بس محدش فيهم كمل كل واحد فيهم كان عباره عن فتره في حياتي وخلصت وكانو احلى فترات حياتي
طول عمري انسان اجتماعي وبحب الناس واللمه والصحاب بس اتحرمت من الصحاب بقالي سنين لوحدي لما بزعل بشكي لربنا واما بفرح بفرح لنفسي معنديش حد احكيله يومي معنديش حد اقابله كل يوم ننزل نقعد على قهوه واحكيله يومي
معنديش حد يشجعني معنديش حد يبين لي اني غالي عنده وانه بيحبني من كتر منا اتاذيت فصغري ومكنش حد بيسمعنى وكانو بيتنمرو عليا بقى عندي تعلق مرضى باي حد يديني اهتمام او يسمعني ويحسسني اني مهم وان وقته ليا
انا نفسي حد يسألني مالك او يشيل عني الحمل بدل ما أنا شايله لوحدي نفسي حد يفرح لفرحي وهو الي يكلمني يقولي انه عايز يشوفني نفسي في اهتمام بسبب ان موضوع الصحاب مهما اتعرفت على ناس مبيبقوش صحاب بجد فكرت اني اتعرف على بنت ونبقا صحاب لان من علاقاتي القديمه مع البنات لما بتعرف على بنت بتديني يومها كله
المشكله اني بتعلق وفي ناس انا لسه متعلق بيهم لحد انهارده مش قادر انساهم وخايف ده يتكرر وبسبب الهم والضغط الي بشيله لوحدي اتجهت للتدخين وانا عمري ٢٠ سنه انا مش عارف اعمل اي انا اتعودت على الوحده بس تعبت نفسي مبقاش لوحدي مره نفسي حد يشيل عني ويديني اهتمام آسف لو طولت
السلام عليكم، أولا ربنا يصلح أحوالك ويرزقك الصحبة الصالحة إن شاء الله. بالنسبة لمشكلتك مع الوحدة فليه مجربتش الأنشطة التطوعية؟ جرب تنضم لمؤسسة خيرية أو أي أعمال تطوعية، هتقابل ناس وتتعرف على أشخاص جدد، ومش شرط يكونوا أصحاب قريبين، هيكون بينكم تواصل والعلاقات بتتبني تدريجيا، يعني حتى لو هتكون علاقتك بهم سطحية بالأول وفي نطاق الأنشطة اللي بتعملوها وتتقابلوا عشانها ممكن مع الوقت والقرب تتحول صداقة وحتى لو فضلت زمالة ورفقة فهي أفضل من الوحدة اللي بتشكي منها. وكمان توسيع الدائرة الاجتماعية هيساعدك تتغلب على التعلق بشخص واحد أو تركيز تفكيرك ومشاعرك على شخص أو اثنين. ** كمان جرب تنزل ورش، شوف مهارة عاوزة تتعلمها حتى لو مش بتميل لها دلوقتي فجرب مش هتخسر حاجة. الورش برضه هتلاقي فيها تفاعل ونشاط مع أشخاص بتتشاركوا نفس الاهتمام. حاول بس متركزش على إن عندك مشكلة، التفكير في الجزء السلبي ومحاولة مقاومته بيزوده ولو قلت متفكرش في شيء معين تلقائيا هتفكر فيه. فأنت ركز على إنك تبدأ تشوف الجوانب الإيجابية في حياتك، أكيد لو بعدت التفكير السلبي ورجعت تفكر بهدوء وتتأمل في حياتك هتلاقي نعم ربنا أنعم عليك بها وناس كتير محرومة منها. فالوحدة إن شاء الله مقدور عليها بس لما تصلح أفكارك وتنزل تتفاعل مع الناس ومن دون توقعات مسبقة إن على طول هتبني صداقات قوية. خد الأمور بالتدريج. ** جزئية التعلق والآثار النفسية لنشأة الطفولة فلو مش قدرت تتخلص منها بعد نزولك وتفاعلك مع الناس فجرب تتواصل مع مختص يتابع معك بخطوات عملية، وإن شاء الله ربنا يوفقك.
تم النشر الأربعاء، ١٢ أغسطس ٢٠٢٦
أنا آسفة إنك بتمر بكل ده، وأقدر إن الوحدة اللي عايشها من طفولتك لحد دلوقتي خلّتك تحس إنك محروم من أبسط حاجة وهي وجود حد يشاركك اليوميات والمشاعر. اللي حصل معاك في الصغر من تنمر وإهمال من الأهل طبعًا أثر على طريقة تعلقك دلوقتي، وده شيء طبيعي جدًا، بس المهم إنك تعرف إنك مش لوحدك في الشعور ده، وإن في طرق عملية تقدر تبدأ بيها عشان تخفف الضغط ده. أول حاجة، حاول تبني علاقات صحية تدريجيًا بدون ما تركز على شخص واحد يملأ الفراغ كله. ابدأ بأنشطة جماعية زي الرياضة في نادي أو مسجد، أو حتى مجموعات دراسية أو تطوعية، عشان تلاقي ناس بتشترك معاهم في اهتمامات مشتركة. ده هيساعدك تبني صداقات طبيعية بدون تعلق مرضي، لأن العلاقة هتبقى مبنية على نشاط مشترك مش على "الاهتمام الشخصي" بس. ولو فكرت تتعرف على بنت كصديقة، خلي بالك إن ده ممكن يزود التعلق زي ما حصل قبل كده، فالأفضل تركز على صداقات مع الرجالة في البداية عشان تبني ثقة بنفسك أولًا. بالنسبة للتدخين اللي بدأت فيه بسبب الضغط، ده حل مؤقت بيضيف مشكلة جديدة، فحاول تستبدله بحاجة تانية زي المشي اليومي أو هواية بتحبها بتفرغ فيها الطاقة. وتذكر إنك بتشتكي لربنا لما بتزعل، وده حاجة قوية جدًا، استمر فيها وادعي إن ربنا يرزقك بصحاب صالحين يخففوا عنك. أنت إنسان اجتماعي بطبعه، والوحدة مش قدرك، بس بناء العلاقات بياخد وقت وصبر. لو عايز أفكار أكتر عن كيف تبدأ في بناء صداقات صحية أو تتعامل مع التعلق، ابحث عن أسئلة مشابهة على فدني عشان تشوف تجارب ناس تانية. أنت قادر تتغلب على ده خطوة بخطوة، وأنا هنا لو حبيت تتكلم أكتر.
تم النشر الأربعاء، ١٢ أغسطس ٢٠٢٦
لعرض السؤال في فدني اضغط هنا