بصي يا بطلة اهدي خالص وارمي ورا ضهرك كل اللي فات ده لسه بدري والوقت فيه بركة للي بيستعين بالله ومفيش حاجة ضاعت عليكي صدقيني بس انتي شيلتني نفسك فوق طاقتك ومقارنة بغيرك وده اللي موقف حالك ابدأي دلوقتي حالا بالحاجة اللي تحسيها سهلة عشان تسخَّني وتفتحي نفسك وانسي موضوع الكتب الكتير ده خالص ركزي في الخلاصة وفي المهم وربنا هيفتحها في وشك وموضوع التعب النفسي ده حاولي تريحي بالك ومتحمليش بابا فوق طاقته لو الظروف صعبة واستعوضي ربنا في تعبك وهو اللي هيجبر بخاطرك ويظبطلك كيميا دماغك بكلمة منه وقربي منه باللي تقدري عليه حتى لو لو الصلاه المفروضة بالعافيه هما دول اللي هيسنودكي في الأيام دي وقومي كدة انفضي الغبار ده وانتي قدها وهتعدي وتفرحي وهتفتكري الأيام دي وتعرفي إن ربنا كان شايلك الأحسن دايما بس انتي استعيني بالله وقولي يا رب وصدقيني لسه فيها أمل كبير... هل في حد ممكن يساعدك يتابع معاكي من اهلك ؟... وحضرتك مخلصه المواد بنسبه كام واي المواد اللي مخلصاها بنسبه كبيره ..؟؟
بصي بقى سيبك من جو الخوف والتوتر ده عشان ده اللي موقف حالك ومخليكي حاسة إنك مغيبة إنتي محتاجة وقفة مع نفسك الشهر ده مفيش حاجة اسمها مش هلحق اللي عاوز يوصل بيوصل لو في آخر دقيقة المواد اللي بتقولي عليها دي لسه في إيدك الأحياء والكيمياء لمي الأبواب والدروس اللي باقية في أسبوع واحد بس بمذاكرة تخلص مش لسه هفهم والعربي مش لازم تحفظي كل حاجة افهمي الدنيا ماشية إزاي وحلي كتير الحل هو اللي بيثبت المعلومة مش الحفظ والفيزياء اللي خايفة منها دي شوفي لها فيديوهات مراجعة نهائية بتلم الفصول في حصة واحدة وركزي على القوانين والحل الكتير وبالنسبة للتوتر فده طبيعي بس إوعي تخليه يسيطر عليكي استعيني بالله وقومي دلوقتي حالا اقفلي موبايلك واعملي جدول لليومين الجايين بس بلاش جداول خيالية وابدأي بأكتر حاجة خايفة منها هتلاقي الموضوع أبسط بكتير من اللي في خيالك إنتي قدها والله العظيم والوقت لسه فيه بركة بس إنتي استرجلي وصدقي نفسك.. وخدي عهد مع ربنا انك تعملي اللي عليكي الشهر ده .. بدون تقصير ... ومتنسيش النبي عليه الصلاة والسلام قال .. "إن قامت الساعة وفي يد أحدكم فسيلة فإن استطاع أن لا تقوم حتى يغرسهـا فليغرسها" ... الفسيله اللي هو نواي البلح. .. يعني تخيلي القيامة خلاص بتقوم والدنيا بتخلص ومع ذلك النبي بيأمرنا نشتغل ونزرع لآخر ثانية فما بالك بقى وانتي قدامك شهر كامل بحاله يعني لسه فيه وقت نزرع ونحصد ونكسر الدنيا كمان الشهر ده كفيل يغير مصيرك كله لو استغليتي كل دقيقة فيه صح وبطلتي تفكير في النتيجة وسيبيها على الله هو مش هيضيع تعبك أبدا قومي يلا سمي الله وابدأي غرس في "فسيلة" مستقبلك دي ربنا معاكي يا بطلة... ولو احتجتي اي حاجه انا موجود هنا وان شاء الله اعرف أفيدك ربنا يوفقك ويكرمك.... لو في اي حاجه تاني اتفضلي .. ؟
تم النشر الاثنين، ١١ مايو ٢٠٢٦
انا بطبعي خوافه اوي وبتوتر بسرعه والموضوع زاد اوي اوي السنه دي حاسه اني مش موجوده او مغيبه مش عارفه هتفهمني ولا لا بس دي الحقيقه والله
تم النشر الاثنين، ١١ مايو ٢٠٢٦
اسفه اوي اني اتأخرت فى الرد على حضرتك ،أول حاجه لا مفيش حد ممكن يتابع معايا هنا فى البيت وبالنسبه للمواد انا فى الأحياء فاضل اخر باب اللى هى الأهم اصلا نفس الكلام فى الكيمياء بس فيه من كل باب مثلا درس او اتنين متفتحوش العربي يعني تمام إلى حد ما بس برضو مش قادره احفظ حاجه ومحلتش كتير خالص فى ولا ماده حرفيا انجليزي مش عارفه انا ماشيه مع المستر بس مش مقتنعه والفيزياء دي كوم تاني لوحدها دي فيه فصول معرفش عنها حاجه اساسا
تم النشر الاثنين، ١١ مايو ٢٠٢٦
لا لا مفيش مضايقة ولا حاجه بالعكس ... ربنا يوفقك ويكرمك
تم النشر الأحد، ١٠ مايو ٢٠٢٦
لعرض الإجابة في فدني اضغط هنا