السلام عليكم، قدر الله وما شاء فعل. عارفة الموضوع صعب عليكِ بس مش نهاية المطاف، لا كلام ونظرات الناس ولا نتيجة امتحانات هي اللي هتحدد قيمتك أو نجاحك في الحياة.. قيمتك ونجاحك أنتِ للي بتصنعيهم. ياما ناس مستواها التعليمي كان قليل، حتى مدخلتش ثانوي لكنهم حققوا نجاحات كبيرة في حياتهم فبلاش تخلي نظرتك للنجاح قاصرة على موازين المجتمع وهم اللي يحددوا لك إذا كنتِ ناجحة أو لأ. ** أهالي كتير للأسف بيكون أول حاجة يفكروا فيها كلام الناس والشماتة لكن المفروض أنتِ يكون لك حكمك الخاص. المهم قيمتك عند ربنا ونظرتك لنفسك. طالما متأكدة إنك عملتِ اللي عليكِ واجتهدت وربنا قدر اللي حصل فاعتبريه خير والابتلاء الحالي أكيد له حكمة وراها خير ممكن تعرفيه مستقبلا. وأنتِ نفسك لا تهتمي بكلام الناس، لو مش مهم عندك كلامهم أنتِ بنفسك هتكوني قوية قصاد لوم أهلك لك بخصوص النقطة دي، مش هتهتمي وقتها حتى بغياب دعمهم وهتخلي تركيزك كله إزاي أتخطى الكبوة دي وأنجح. *** حتى لو كنتِ وحدك ومفيش أي دعم حولك، فدعمك لنفسك صدقيني كافي بعد اعتمادك على الله واستعانتك به، فتوكلي على الله وارجعي قفي على رجليكِ وإن شاء الله تتخطي الأزمة وتكوني أقوى. ابدئي من النهاردة فكري في صورة النجاح اللي عاوزة توصلي له وارسمي خطتك واشتغلي وخلي آخر همك رأي الناس وتقديرهم، كده كده أهلك والناس نظرتهم هتتغير لما نظرتك لنفسك تتغير وثقتك بها تكبر. استعيني بالله وابدئي، وربنا يوفقك.💚💚
لعرض الإجابة في فدني اضغط هنا