بقالي فترة كبيرة كل ما أجي أتوضأ أحس نفسي نسيت أعمل العدد صح، أو فيه حتة مجاش فيها مياه، ولو شعرية جاءت على أذني وأنا بمسح بحس كده إن الوضوء باطل وأفضل أعيد وأعيد، يعني احتياطي حتى لو أنا عارفة الوضوء صح، علشان لو طلع غلط أكون اتوضأت صح.
والموضوع ده بقى بيخليني أأخر الصلاة جداً، ممكن أكون داخلة أتوضأ في أول الأذان وأصلي في الآخر.
حتى الصلاة، من ساعة ما عرفت إن لازم القراءة بالتشكيل علشان المعنى ميتغيرش، وأنا بعيد الفاتحة وأعيد، بقيت أشك أنا قلت الآية دي ولا لأ، ولما أركع وأروح أسجد أقعد أفتكر: هو أنا رفعت من الركوع؟ طيب أفرضي كل ده غلط؟
وبقيت ببحث عن طريقة الصلاة الصح وأحاول أركز عليها وأقول هبقى أصلي احتياطي مرة كمان. وأي حركة في بطني بحس نفسي ضيعت الوضوء وأخاف أكمل وأطلع فعلاً ضيعت الوضوء، حتى لو فيه رخصة زي ما بيقولوا، بخاف ممكن ميكونش فيه رخصة والعلماء غلطانين أو أنا معنديش وسواس.
السلام عليكم، الوسواس حله التجاهل، توضأي مرة واحدة ولا تعيدي الوضوء أو الصلاة والفاتحة اقرأيها مرة واحدة حتى لو شكيت بخطأ في القراءة أو التشكيل، وحتى لو نفسك شككتك في الآيات أو إنك عملتِ أي غلطة في حركات الصلاة تجاهليها وكملي. لما بتعيدي أو تنفذي الحاجة اللي الوساوس شككتك فيها وبتطيعي الوساوس أنتِ كده بتسمحي لها تتحكم في أفكارك وتزيد أكتر. تعاملي مع الأفكار الوسواسية وإلحاحها على إنها شخص مزعج عمال يزن جنب ودانك وافضلي متجاهلة الزن بتاعه لحد ما يزهق وينصرف، أما هتفضلي تسمعي له فهيفضل لازق فيكِ. تحري الصح والخطأ شيء كويس لكن لو زاد عن الحد هيقلب تمطع ووسوسة هتوصل لك للشك في كل حاجة بتعمليها وهتنفرك من العبادة في الآخرة وده اللي الشيطان عاوز يوصل له. ربنا يعنيك ويبعد عنك الشيطان والوساوس كلها.
تم النشر الأحد، ١٦ أغسطس ٢٠٢٦
حاولي تقربي من ربنا جدا لان الوسواس والشيطان بيكون قليلين من القرآن حصني نفسك يعني قولي الأذكار دايما لسانك دايما بيستغفر خلي ليكي ورد من القرآن كل يوم وبالنسبه للصلاة اتوضي قبل الاذان مش هتكسلي هتكوني مستنيه الاذان علشان تصلي حتي لو في وسواس صلي
تم النشر الاثنين، ١٧ أغسطس ٢٠٢٦
أنا آسفة إنك بتمري بكل ده، وأقدر إن الموضوع ده بيسبب لك تعب نفسي كبير ويأخر صلاتك ويخلّي العبادة مصدر توتر بدل ما تكون راحة. اللي بتصفيه ده شكل شائع من الوسواس القهري اللي بيستهدف الطهارة والصلاة تحديداً، وهو مش ضعف إيمان ولا تقصير، لكنه دورة ذهنية بتغذي نفسها بالشكوك المتكررة. من الناحية الشرعية، العلماء بيقولوا إن اليقين لا يزول بالشك، يعني لو توضأتِ وأنتِ متأكدة في اللحظة دي، فالشك اللي جاي بعد كده ما يبطلش الوضوء. نفس الشيء في الصلاة: الركوع والسجود والقراءة لو عملتيها مرة وأنتِ مركزة، فالإعادة الاحتياطية مش مطلوبة وبتزود العبء. الاحتياط الزائد ده بالضبط اللي بيخلي الوسواس يقوى، لأنه بيدرب الدماغ إن الشك ده مهم ويستاهل الاستجابة له. عشان تكسري الدورة دي عملياً، جربي تحطي قاعدة واضحة مسبقاً: "هتوضأ مرة واحدة فقط وأمشي، ولو جالي شك هقول لنفسي إن الوضوء صح وأكمل". نفس القاعدة في الصلاة: هقرأ الفاتحة مرة واحدة بتركيز، ولو شككتِ هتجاهلي الشك وتكملي بدون إعادة. ابدئي بصلاة واحدة في اليوم تطبقي فيها القاعدة دي، وبعدين زودي تدريجياً. كمان، لو قدرتِ تتوضئي بسرعة معقولة وتدخلي الصلاة فوراً بدون تفكير زائد، هيساعدك إن الوقت ما يطولش. الموضوع ده محتاج صبر مع نفسك، وكل ما ترفضي تنفذي الوسواس (يعني ما تعيديش)، كل ما يضعف تأثيره مع الوقت. لو حاسة إن الأمر بقى بيسيطر على يومك كله، ممكن تفكري في استشارة معالج نفسي متخصص في الوسواس القهري عشان يديكِ أدوات أقوى تتعاملي بيها. ولو عايزة تقرئي تجارب مشابهة، ابحثي عن أسئلة مشابهة على فدني عشان تشوفي وجهات نظر إضافية. أنتِ مش لوحدك في ده، وتقدري تتحسني خطوة بخطوة.
تم النشر الأحد، ١٦ أغسطس ٢٠٢٦
دا مش وسواس قهري ولا حاجه دا الشيطان بيفضل يشكك في الطهاره والوضوء عشان تملي من العباده والموضوع ده حصل معايا وبفضل الله تغلبت عليه بأني معدش حاجه مهما حصل. الحل هو انك متعيديش حاجه اتوضي ولو شكيتي كملي مهما حصل وربنا هيقبل خليكي فكره كلامي ده مهما شكيتي متعيديش دا الشيطان فضل يوسوس لك في العباده ولم غلب معاكي في انه يبعدك عن العباده بدء يحاربك بالعبادات انك نسيتي حاجه متغسلتش في الوضوء وحاجات كتير من دي زي مثلا ان ربنا مش هيقبل صلاتك او العمل الفلاني او الحاجه دي عملتيها رياء وربنا مش هيقبلها وحاجات كتير من دي متسمعيش وكملي وربنا يحفظك ويعينك إن شاء الله
تم النشر الثلاثاء، ١٨ أغسطس ٢٠٢٦
لازم دكتور نفسي
تم النشر الاثنين، ١٧ أغسطس ٢٠٢٦
ده وسواس قهري روحي لدكتور نفسي بسرعه
تم النشر الأحد، ١٦ أغسطس ٢٠٢٦
اعملى اللى اتعلمتيه صح ولو فيه غلط ف حاجه الذنب عليهم مش عليك .. وكويس جدا انك بتتحرى الصح
تم النشر الأحد، ١٦ أغسطس ٢٠٢٦
لعرض السؤال في فدني اضغط هنا