إجابة علي السؤال: كيف اثق في من حولي مرة أخرى، لأني تركت الشخص الذي أحببته!

مساء النور .. بصي يا جميلة .. لاحظت في كلامك حاجه مهمه جدا .. وهي انك بنيتي احلامك وطموحاتك في هذا الشخص .. طيب هو انتم لسه في الاول .. ف ليه تعشمي نفسك بحاجه انتي اساسا المفروض انك لسه بتسكشفيها! ف ديه غلطة كبيرة ... اي علاقة مفيش فيها ضمانات ولكن ع الاقل مينفعش تبني عليها كل حياتك خاصةً لو انتوا لسه مش متجوزين، يعني انتي لسه بتعرفيه. تاني شئ طبعا بحيكي انك تركتي شئ اكتشفتي انه مش نافع ليكي، لان كتير اوي مش بيقدروا انهم ياخدوا الخطوة ديه. لكن واضح انك شجاعة كفاية انك تاخدي بالك من نفسك وكمان خايفة عليها. ده سؤال فيه خطوات ازاي تعملي موف اون من علاقة .. https://fedni.net/q/23362448/ازاي-ممكن-الانسان-يعمل-move-on اتمنى تشوفي اجاباته ولو حابه نتناقش فيه اكتبيلي طبعا 💛. تاني شئ .. انا متفهمه جدا جزء انفصال والدك ووالدتك عن بعض .. بس صدقيني مينفعش ابدا اننا مثلا نقارن ده بده .. والدك مش هو الولد اللي كنتي مرتطبة بيه. ولا انتي زي ماما. كل علاقة ولها ظروفها، ومينفعش نقارن علاقة ب علاقة .. والدك ووالدتك نصيبهم وقف مع بعض... زي ناس كتير .. فهل ده معناه ان الناس تخاف تدخل في علاقات؟ اكيد لا

إجابة من Jehad Abd Elsalam

تم النشر الأربعاء، ٢٩ نوفمبر ٢٠٢٣

16 تعليق

طيب معلش لو انتي ماكلتيش ومشربتيش كنتي هتعرفي اساسا تشتغلي ازاي؟ ما هو اكيد لما تموتي نفسك في الشغل انتي اصلا هدوري ع صحتك بقى بعدين!! كويس اوي انك سبتيه، لان ده كان هيبقى اهم حاجه عنده وف حياته الفلوس .. واي حاجه بتتقال ليكي ف فترة الخطوبة ركزي فيها اوي، متعديش وتقولي يلا مش مهم دي زلة لسان، لا ركزي فيها لان ديه بيترتب عليها حاجات تانيه كتير بعدين.

تم النشر الجمعة، ١ ديسمبر ٢٠٢٣

فهماكي يا قمر .. المرحلة اللي انتي فيها حاليا عادية زي ما قولتلك .. وهي مرحلة الانكار انك مش مصدقة ومش قادرة تتقبلي اي شئ من اللي حصل، وهتمري بكذا حالة بعدها لحد ما توصلي للتقبل. ولكن لحد ما توصلي للمرحلة ديه فيه حاجات لازم نعملها من اهمها انك تسيبي نفسك تخرج كل المشاعر ديه، وده كويس جدا، متحاوليش تكبتي اي شئ، تاني حاجه وهي ازاي تتصرفي مع كل الكلام اللي في دماغك، وديه من اهم الحاجات اللي لازم تتعمل صح، علشان لو اتعاملتي معاها غلط هتتاخري شوية ف انك تعدي الموضوع. طيب ازاي تتعاملي مع مشاعرك صح؟ بانك تفكري ف الموضوع بطريقة عقلانيه شوية، كل الاسئلة اللي جواكي تحاولي تدوري ليها على اجابات منطقية .. لان لو سبتي نفسك لكل الاسئلة ديه ملقتيش عليها رد .. هتفضل تتكرر معاكي .. طيب اول شئ، انتي قولتي انك قولتي له انا مش عايزة اتأذي .. بصي مينفعش عموما نقول لشخص كده ابدا، علشان انتي كده بتبيني له ضعفك، او بأنك خايفة ومهزوزة ودي حاجه مش حلوة .. تاني شئ انتي قولتي اشمعنا انا اللي يعمل فيا كده؟ هو كده كده الموضوع مفهوش اشمعنا انا!! ديه حاجه ممكن تحصل لكل الناس، وطبيعي اننا كلنا بشكل او باخر فيه حد ممكن يأذينا سواء بعلاقة حب او ب اي علاقة تانيه. ف احنا معرضين كلنا لكده. فهماني ؟ وهو ماختاركيش انتي مخصوص علشان يأذيكي لان لو محصلتش منه كانت ممكن تحصل من غيره، ولو محصلتش معاكي كانت ممكن تحصل في غيرك ..

تم النشر الجمعة، ١ ديسمبر ٢٠٢٣

حاجه كمان هو كان شخص نرجسي وشخص محب للفلوس بدرجه مش طبيعيه انا لسه متخرجه فبشتغل شغلانتين مع بعض املي وقت باخد مرتب محترم الحمد لله كان بيقولي بالكلمه كده حتي لما تعبت قالي متاكليش ومتشربيش بس اشتغلي