السلام عليكم، مشكلة العلاقات دي إنها بتستنزف المشاعر وبتعيشكم كل اللي المفروض يحصل بعد الزواج سواء تفاهم ولحظات حلوة أو خلافات ومطبات حياتية بتعدوها سوا مع تمسككم بالرابط بينكم ورغبتكم في الحفاظ على بيتكم، لكن في علاقة غير رسمية التمسك بيكون أضعف والعلاقة هشة مش مبنية على أساس حقيقي فالخلافات المتكررة والبعد بينخر فيها أكتر. فيُعتبر في الخمس سنين أنتم استنزفتم نفسكم ومشاعركم فطبيعي تحس بكده وتلاقي صعوبة في خطوة الخطبة والزواج. دلوقتي أنتم قدام أمر واقع، بلاش تضغطوا على نفسكم تكملوا لأن المسار اللي ماشيين فيه مش هيؤدي إلا لفشل العلاقة سواء كملت لخطوبة أو لو قدرتم تتزوجوا وأنتم محملين بكل الأعباء النفسية الحالية والاستنزاف العاطفي، فرأيي تبعدوا لحد ما ربنا يسهل وتشوفوا الوضع مستقبلا عامل إزاي، لو البعد ساعد على التعافي ولقيتم إنكم لسه عاوزين تكونوا مع بعض وكانت الظروف ساعتها اتحسنت فتقدمها لها وربنا يكتب لكم اللي فيه الخير، لو مع البعد ارتحتم ولقيتم إن إنهاء العلاقة كان الأفضل ومش هتقدروا تكونوا سوا فخلاص يبقى ده الأصح لكم، مش كل علاقات الحب بتكمل للزواج ومش نهاية العالم لو ده حصل. *** المفروض دلوقتي، تركز على إنك تلاقي نفسك من تاني وتتعافى من تراكمات الفترة السابقة عشان تقدر تهتم بدراستك وشغلك وتأسيس نفسك عشان حياة ومستقبل أفضل سواء بعد كده تزوجت منها أو من غيرها. *** لو مش هتقدر تتجاوز التراكمات دي وحدك استعن بمختص نفسي يساعدك بخطة عملية ومتابعة وإن شاء الله تتعافى وتلاقي نفسك وشغفك من تاني. ** استعن بالله وخد القرار الصعب وتكلم معها بصراحة وفهمها إن البعد حاليا هو أصلح قرار بالنسبة لكم والأمل الأخير، وإنك مش بتتخلى عن وعودك لها لكن البعد ده عشان ربنا في الأول، وعشان تلاقوا نفسكم من جديد وتقرروا إذا كنتم هتقدروا تكملوا سوا وإن كنتم بعد فترة البعد لسه متمسكين ببعض أو لأ. خذ بالأسباب وابدأ وإن شاء الله ربنا يعينك ويوفقك للي فيه الخير. بالتوفيق.
لعرض الإجابة في فدني اضغط هنا