رجل غريب يتحدث لي على الفيسبوك وقال لي كلام مهين، وفي نفس الوقت لا يريد أن اتركه!

Question

السلام عليكم ورحمة الله وبركاته انا أولي كلية عايزة أسأل سؤال مش مشكله أوي لكن مجرد تأنيب ضمير ، انا مليش في جو الارتباط وان حد يكلمني برايڤت ويكون عايز يعرف عني كل حاجه وبخاف اعمل حاجه تغضب ربنا مني ، حد دخل لي برايڤت على الماسنجر وكان كلامه صريح من الأول ايه مواصفات الراجل اللي عايزة تتجوزيه ومش عارفه ايه ولكن بعد ما عرف اني صغيرة ومش بفكر في المواضيع دي أصلا بطل يسأل الاسئلة دي بس عايز يعرف عني كل حاجه وانا ارفض وهو كان مصمم يكلمني برضو وانا كنت بصد دائما ولما اتأخر في الرد يقولي انا بغير ومتتأخريش بس انا كنت بتأخر بمزاجي علشان مش عايزة أرد عليه وهو بقي بدأ يفكر اني بكلم حد تاني علشان كده مش عاملاله اهتمام بس انا أصلا لا كنت عايزه أكلمه ولا بكلم غيره وكان بيهيني كتير لما أتأخر ومرضاش اثبت له أن مفيش حد وكان الحل عنده أنه يتصل عليا ماسنجر ونتكلم ودا طبعا بالنسبة لي مرفوض خالص وهو طبعاً في تفكيره اني رافضة علشان حد تاني وعملت بلوك قبل كده بس كنت سألته قبلها قالي مش هعرف اعيش من غيرك وهتدمر ومش عارفه ايه ف فكيت البلوك وصراحة كلامه كويس وكان بيقولي اني زي بنته وكان بيعاملني كأب ليا ومشاعر الأب اللي أنا محرومة منها أصلا ف مكنتش عايزة اتعلق بحد أو أضعف واتكلم معاه عادي بدون حدود وفي نفس الوقت الكلام كده حرام أصلا ف بعد ما فكيت البلوك كان كلامنا كله مجرد خناق وانا بحاول اتكلم بطريقة مش كويسه علشان يعمل هو بلوك وتيجي من عنده بس هو برضو لا ومستمر في كلامه لحد ما جه يوم نمت كتير فيه طول الليل لحد الصبح صحيت لاقيت رسائل كتير وكلام مش كويس وانا أقوله خلاص احترم انك أكبر مني وبرضو بيزداد في الكلام بطريقة مش كويسه قمت عملت له بلوك من على الفيس كله بقاله اسبوع تقريبا وسبحان الله الفيس كله بقي رسائل عن ، غبيه اللي متختارش راجل بيحبها وعايزها وتفوت الفرصة وكلام زي دا يعني وانا اصلا مش جاهزة للخطوة دي خالص لسه صغيره على كده وهو كمان مش عايزاه ياخد عني فكرة اني وحشة أو اني زي بنات الأيام دي إلا من رحم ربي ف اعمل ايه ملحوظه هو أكبر مني بكتير وكان بيقولي اعتبريني زي بابا ف كده كده فكرة الجواز حتي لو بعد كده مرفوضة أصلا

Accepted Answer

وعليكم السلام ورحمة الله انتى صح من الاول خالص الموضوع من ناحية الفضول خلاكى تجربى متجربيش تانى بقى بلا بابا بلا اخويا الكبير ...يشوفك زى ما ييشوف ...هو كده كده شخص بيتسلى مش اكتر ....اى كانت الدخله هو بيتسلى الكلام كله حتى لو باحترام هو غلط فى غلط سيبك من الجمل الخايبة اللى بتتكرر ع الفيس بوك خليكى فى وصايا الشرع والدين وسنة الحبيب صل الله عليه وسلم

Answer

موش حبب اكن قاسي عليك في كلامي بس انتي كان ممكن تقفلي الباب من الاول بس تقفليه صح موش توربيه ،لكن علي العموم لا حجة عليك فانتي فإصعب سن هو مرحلة المراهقة وهي اصعب مرحله في حياة الإنسان مننا ،بالنسبة للابليس إلا كان بيقول لحضرتك إن هو ذي بابا دا كان عامل ليك فخ وهو قد اي معندوش كرامة اعرفك اذي ،إلا بحب بجد بيكون عنده كرامة وحساس علشان هو راجل فمجرد مايلقي عدم قبول من الطرف الآخر ينسحب بهدواء محافظاً علي كرامته ودا من صفات الرجولة لكن النصاب دائما لحوح علشان يصول إلي هدفه ،فهو لق منك انك شخصيه ضعيفة لدرجة أن هو كان بيهزقك وطبعا من الواضح أن دا اول تجربه لحضرتك منعاً للبس انا دائما اقول ان البنت ممنوع يكون عندها تجارب سابقة علشان دا بيكون فشل لاي علاقة مستقبلية وبذات الزواج بخلاف الرجل ،نرجع لموضوعنا ابليس دا لازم ودا فعل أمر أن حضرتك انك تبعدي عنها وارجوك بلاش فضول دا راجل عجوز وفاضي وحبب يتسل بيك لعله يحصل علي ما يريد ، علشان كده لاحسن مسح الفيس وعمل فيس برقم جديد ، والواتس نفس النظام ،وربنا يبعد عنك الشيطان الإنس والجن . ملحوظه انا لا اشكك في ادبك واحترامك ودليل على ذلك إنك لجأتي الينا وربنا يوفقك في الثانوية العامة 🌸🤲

Answer

وعليكم السلام ورحمة الله وبركاته.... انتي كنتي صح جدا لما رفضتي تكلميه، وطبعا كان المفروض انك من الاول خالص متخليش حد غريب يكلمك، ولا زي بابا، ولا زي اخوكي، ولا حابب نتعرف علشان نرتبط .. ولا اي حاجه من ديه نهائي. هما اذكياء جدا، وعارفين ازاي يدخلوا المدخل الصح .. ف متديش حد فرصة انه يستخدم الحيل الشيطانية ديه ضدك. اما بالنسبة انك مش عايزاه ياخد فكرة وحشة عنك، ده اساسا يا حبيبتي انسان غير سوي .. انتي عايزة تثبتي ايه ولمين؟ عايزة تثبتي ل ده!! انتي كفايا اوي انك تكوني محترمة وكويسة في نظرك .. وقدام ربنا. وده يكفيكي .. متخليش الشيطان يلعب بيكي.

رجل غريب يتحدث لي على الفيسبوك وقال لي كلام مهين، وفي نفس الوقت لا يريد أن اتركه!

اجتماعية

تربوية

علاقات

سؤال من احد أعضاء فدني

تم النشر الخميس، ١٩ أكتوبر ٢٠٢٣

4 إجابة

2 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك