السلام عليكم
انا هحكي لكم بكل صراحه لاني ادعو الله ان اجد حل يريح عقلي وقلبي انا طالبه في كليه الطب عندي 22 سنه بحب ابن خالتي هو أكبر مني بتلات سنين وشغال في السعودية لكن مش معاه شهاده جامعيه هو كمان بيحبني الموضوع دا بقاله سبع سنين
كنت وقتها لسه في الثانوي وهو حاول يفتح موضوع الخطوبه مع والدتي لكنها رفضت اصلا وقتها وقالت له اني لسه صغيره وانها مش عايزه تشغلني عن دراستي وقالت لي اقطعي علاقتك بيه تماما وفعلا قطعت علاقتي بيه لكن حبه في قلبي وكنت بدعيله في كل صلاه
و لما دخلت الكليه هو رجع يتواصل معايا كل فتره يبعتلي يطمن عليا وقالي انه لسه بيحبني ورجع كلم والدتي تاني في الموضوع بس هي رفضت وقالتله اني خلاص هكون دكتوره ومش هليق بيه وينساني بس هو قالها انه عمره ما هيقدر ينساني ومستعد يعمل عشاني أي حاجه وانا حاولت اقنع امي كتير بس هي رافضه الفكره اصلا
دلوقتي هو رجع يكلم والدتي تاني وجت سألتني انتي لسه موافقه عليه قولتلها اني لسه بحبه ومش عايزه اكمل حياتي مع حد غيره زعقتلي واهانتني وضربتني ضرب مبرح والله بقالي شهور كدا بتعاملني اوحش معامله وبتقولي ازاي تبقى دكتوره وتفكري فيه اصلا الناس هيقولوا علينا ايه هتفضحينا ووبتقولي انا بقيت بكرهك وانا هقول لوالدك اي دا ممكن يجراله حاجه لو عرف انك بتفكري في واحد زي ده ( انا والدي مسافر برضو في السعودية )
والدي نزل اجازه وامي قالتله كان نفس رده فعل امي وقالي عمري ما هسامحك انا ضيعت عمري عشانك وانتي عايزه تضحكي علينا الناس ازاي بعد ما علمك وكبرك عايزه تتجوزي واحد مش متعلم وبقت تدعي عليا وبتقولي موتك عندي اهون من كدا حتى اختي الأصغر مني بقت بتعاملني بإحتقار انا نفسيتي تعبت اوي وبعيط كل يوم بس هو في قلبي كل السنين دي رغم اني بعيده عنه مش قادره اتخيل انه ممكن مكملش حياتي معاه
انا والله العظيم ما كنت قاصده احبه اصلا ولا عمري فكرت في الموضوع دا ربنا ال جعل حبه في قلبي والدي ووالدتي عمرهم ما قصروا في حقي بالعكس هما وقفوا جمبي وكنت مقربه منهم جدا انا متوقعتش انهم ممكن في يوم يعاملوني كدا اصلا بس انا مش شايفه ان ارتباطي بيه حرام او عيب لان هو مسلم زيي واخلاقه كويسه الحمد لله
عارفه ان المستوى الاجتماعي يفرق ولكن هو مالي عيني وانا مش متقبله اي حد غيره انا عارفاه كويس وعارفه ظروفه لانه ابن خالتي وعارفه هو مكملش تعليمه ليه وعارفه هو مر بظروف صعبه ازاي وتعب قد اي ومتحمل مسؤلية نفسه وأهله
انصحوني اعمل اي ازاي اقدر اقنع اهلي يوافقوا انا مش عيزاهم يزعلوا مني كان نفسي الشخص ال قلبي يختاره يكونوا موافقين عليه ويفرحولي ولكن هما دلوقتي بيكرهوني وبيدعوا عليا انا خايفه اوي من زعلهم مني ودعائهم عليا وهل تمسكي بيه يعتبر عقوق لأهلي وفضيحه لهم
وعليكم السلام، عشان تلاقي حل لطريق معيّنة بغض النظر شو هي المشكلة ، لازم تروحي على الطريق المستقيم وربنا بيوفقك... وكبداية مهم تعرفي انه اصلا الكلام مع ابن خالتك كل هاي المدة كان حرام، حتى لو هو مسلم، هو اجنبي عنّك، والاصعب من الغلط هو انو ما نشوف انه غلط، وكل طريق مش صح بيكون صعب ومعقد ونهايته ما بترضينا في حالة اصرينا على هاي الطريق.... بالنسبة لنقطة رفض اهلك شخص بسبب انه ما تعلم، هاد كمان غلط،، في هاد الزمن اصبحنا نقدس الشهادات الرسمية بشكل فظيع مع انه التعلم ما بكون بس بالشهادة وانما بالحياة والشغل وحتى تعلم شخصي بدون الدخول لجامعة مثلا. وممنوع اي شخص يكون في قلبه مثقال ذرة من كبر او استعلاء. فالحل يا عزيزتي هو انه تستعيني بالله وتتركي الي بيغضبه ولو كلمة مع شخص اجنبي عنك، تصاحبي اهلك بالدنيا بالمعروف وتبريهن. تدعي الله وتقومي الليل وتكثفي الاستغفار. واذا اخلصتي بكل النقاط الي قلتلك عنها كل مشاكلك وامورك بتترتب بشكل انت ما كنتي رح تعرفي ترتبيه اصلا بإذن الله.
تم النشر الثلاثاء، ١٨ نوفمبر ٢٠٢٥
💔💔
تم النشر الثلاثاء، ١٨ نوفمبر ٢٠٢٥
لعرض السؤال في فدني اضغط هنا