السلام عليكم،
أنا طالب في أولى جامعة، وحابب أتكلم عن حاجة بمرّ بيها ومضايقاني جدًا الفترة دي.
مؤخرًا بقيت أحس بإحساس غريب مكنتش بحسه زمان، إحساس جه بعد ضغط نفسي من كل ناحية. بقيت ساعات أسأل نفسي: أنا هنا بعمل إيه؟ ليه الناس اللي حواليا مش شبهي؟ وليه عندي حساسية زيادة تجاه أي حد؟
بخاف أتكلم مع الناس الغريبة، وبتهرّب من الزحمة، وحاسس إني ضعيف اجتماعيًا، ومش عارف أبقى فهلوي أو جريء زي باقي الناس. الأفكار المؤذية بتقعد معايا بالأيام، وتجلدني نفسيًا بشكل صعب جدًا.
ليه انا مش زي بقية البشر اللي حواليا .. ليه بحس كل حاجه الضعف
بقيت مش قادر حتى أذاكر لامتحاناتي، مع إني عارف إنها مهمة، بس دماغي واقفة, و معنديش شغف ..
أنا كل اللي عايزه إني أتحرر من الفكرة دي وأفوق لنفسي، بس الحقيقة إن الفكرة عمالة تسحلني معاها واحدة واحدة، وتبعدني عن الناس، وتخلّيني قليل الكلام، ومش عايز أنزل الشارع أصلًا. وبعد ما كنت بدوّر على شغل بقالي فترة، وقفت تدوير خالص بسبب سيطرة الفكرة دي عليّ.
بقيت حاسس باغتراب نفسي عن الناس، وعن المجتمع، وعن البشر عمومًا.
غير كده اللي بيغذي الفكره دي اكتر، أنا مفتقد مشاعر الحب، ومش لاقي حد يحبني أو حتى يتقبلني، وأنا أصلًا مش متقبل شكلي. أغلب صحابي كل واحد فيهم عنده كراش أو شريك حياة، وأنا لا. وعمري ما كنت متقبل فكرة الكراش أو البيست فريند، لأن الحاجات دي بالنسبة لي بتخالف ديني وقناعاتي.
أنا مش طالب علاقة وخلاص، أنا بس عايز أعيش، وعايز أعرف: هل في فعلًا حد ممكن يتقبلني بشكلي ده؟ ولو اتقبلني، هل هيتقبلني بنفسيتي دي، وأنا ذات نفسي مش متقبلها؟ وهل أنا أصلًا أنفع في موضوع الحب ولا لأ؟
أهلي ربوني بحماية زايدة، ومن غير ما يحسّوا، الموضوع ده قلب ضدي. بقيت موسوس قهريًا، ضعيف اجتماعيًا، ومش عارف أواجه الحياة، ومش فاهم هكمل السنين اللي جاية من عمري إزاي
بقيت بحب النوم، لأنه بيبعدني عن العالم وعن البشر. أوقات بتمنى يبقى معايا مكوك فضائي أهرب بيه من المستنقع اللي حاسس إني غرقان فيه.
.
أنا مكنتش كده , انا بقيت حاسس اني لوح تلج عايش مش بني ادم، الفكرة دي كانت في الأول نقطة صغيرة خالص، بس للأسف انسحبت معاها لحد ما سيطرت عليّ. والمشكلة إنها مقنعة جدًا، ومش قادر أتحرر منها.
وللاسف لا في حد قادر اتكلم معاه في الموضوع ده و لا في فلوس اروح لدكتور نفسي او حتى ثيرابيست
دورت وبحثت، واكتشفت إن اللي بمرّ بيه اسمه الاكتئاب الوجودي. فلو حد مرّ بتجربة شبه دي ويقدر يفيدني أو ينصحني، ياريت.
ومن غير تريقة أو هزار لو سمحتم، أنا الأيام دي في أصعب حالاتي. وحابب أوضح إني بصلي وملتزم.
انت استخدمت كلمه انا عشان كده انت مفقدتش هويتك البشر بيحتاجوا للحب ادم فى الجنه واستوحش انا وانا بقرأ حسيت انى انا اللى كاتب احنا متشابهين لحد كبير لكن انا بقولك انا مميز وانت مميز واحنا متولدناش عشان نبقى زى الباقى البشر اتولدوا عشان يكونوا مختلفين فى الطول فى الجمال وفى الثروه مش معقول ان المجتمع يتوقع انهم يتصرفوا بنفس الطريقه انت اتربيت بحمايه زائده انا اتربيت بعنف زائد احنا الاثين اتفاعلنا بنفس الطريقه انغلقنا لكن انا بسبب العنف المتاصل عندى مشاكل فى التعامل مع الغضب انا بدون اصدقاء وانا فى السنه الثالثه للجامعه باختيارى الخاص كذا مره كان فى فرص للصداقه مشتركتش فيها عشان التفاعلات الاجتماعيه لما بتتعرض للتجاهل من اهلك هتسكت هتبدا تلاحظ التفاعلات انا غيرت كتير لحد ما فقدت القدره الغيره اتقارنت فى الحجات اللى كنت فيها اقل ولما اقارن بالحجات اللى هم فيها اعلى متقارنش نفسك بالناس يا سلام انا برضو عايز الحب ولكن انا لن اذل ليه ممكن محدش يفهم تماما اللى بتمر بيه لكن انا بأكدلك انا على الاقل حاسس ب 80فى ال 100 منه وانت طلبت النصيحه وككبيرك سانصحك تقبل شكلك لو كان شكلك وحش ايه المشكله خلق ربنا لو عندك نقص فى الثقه بالذات ده مش عشان انت اقل لا ده عشان معاييرك اعلى ف [٨من ١٠] مختلف عن[ ٨ من ١٠٠٠] تقبل اختلافك ولو عايز تتغير اتغير الوقت بيفوت لما تقول انه فات انا وجدت ثقتى بنفسى بطريقتى الخاصه انا بقرأ من الروايات الخياليه كثير عشان كده انا بقول لو قلت انى ثانى الناس ابداعا محدش هيتجرا انو يقول انو الاول حتى لو كان ده غير صحيح فمفيش طريقه لاثبات انى مش مبدع ده ارتكازى انى خيالى واسع وده كان احد اسباب الاستهزاء بى لكن دلوقتى هو مصدرى الوحيد للثقه بنفسى احنا معاييرنا مش طبيعيه اهدافنا بعيده مشاعرنا اتحرقت حتى لو بشكل مختلف (الانسان ليس نتيجه بيئته بل بطريقه تفاعله معها ) انا اتعرض للعنف انت تعرضت لحمايه زائده الاثنين انتهاك للحقوق انا صورتى الذهنيه فسدت انت صورتك متكونتش كويس نحن وجهان لعمله واحده لذا لا تحزن الله معنا يا اخى الصغير انا احبك فى الله وتذكر اسوأ شئ يمكن ان يحدث للانسان (الا اذا وعد بالنار ) هى ان يفقد الامل فى ان الامور يمكن ان تتحسن وطبعا انا من النهارده اخوك الكبير
تم النشر الثلاثاء، ١٣ يناير ٢٠٢٦
وعليكم السلام ورحمه الله وبركاته، انا لما كان عندي حاجات من اللي حضرتك بتحسها دي واني بردو مش اجتماعيه ولو حد دايقني بكلمه بتعب جدا.. وإلخ... بس نيجي نبسطها.... هل لازم اكون بمعايير معينه عشان يتقال عني حلو... لاء ربنا خلقنا كل واحد عندو حاجه مميزه في نفسو مش لازم شكل بس دايما خليك عارف انو كل انسان هو احسن واجمل شكل من نسختو... انت محتاج تحب نفسك الاول... عشان مش تستني حب الناس ليك.. وكمان دايما دايما الناس بتحب الشخص الواثق من نفسو... مهما كان شكلو... بتابع بنوته ملامحها عاديه جدا.. بس واثقه اوي اوي اوي من نفسها.. والكل بيحبها... مش مهم رأي الناس بردو.. اهم حاجه اقعد مع نفسي وانا مقتنع انو انا كويس جدا مش محتاج زيادات ولا نقصان... موضوع الجيرل فريند.. اكيد حضرتك تعرف انو حرام يعني الكل عارف... مش لازم تعمل زي الكل... في آيه بتقول ؛ > ﴿وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ ۚ إِن يَتَّبِعُونَ إِلَّا الظَّنَّ وَإِنْ هُمْ إِلَّا يَخْرُصُونَ} > ﴿وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا أَلْفَيْنَا عَلَيْهِ آبَاءنَا ۚ أَوَلَوْ كَانَ آبَاؤُهُمْ لَا يَعْقِلُونَ شَيْئًا وَلَا يَهْتَدُون} ملناش دعوه بالناس .. عزز ثقتك بنفسك.. حط مبدأ انو الناس مش مخيفه ولا مؤذيه... بس عاوزين نبدأ واحده واحده... مع نفسنا.. احنا كويسين جدا... ويكفيني حب اهلي مش لازم الناس وحبهم... بس لو محتاج يعني... اشتغل على نفسك وعلى ثقتك بنفسك.. في الطريق الصح... وهتلاقي الكل بيقرب منك... بس يا رب تكون استفدت حاجه 🌸💗
تم النشر الثلاثاء، ١٣ يناير ٢٠٢٦
عليك السلام قال سبحانه تعالي : الشيطان يعدكم الفقر ـ يريد الشيطان دائما ان يجعلك هش وضعيف حتى يستحوذ عليك ويسيطر عليك فتكون لعبه في يده حتي يزين لك الشهوات فلا تكن في قوة تجعلك تجاهد ولا تكن في عقل يجعلك تفكر ـ واعلم يا أخي كما قال النبي صلي الله عليه وسلم ـ إنَّ الله لا ينظر إلى صوركم، ولا إلى أموالكم، ولكن ينظر إلى قلوبكم وأعمالكم. فلا تكترث لشكلك لكن حافظ علي نظافتك لكن لا تلقي بالا للمظهر هذا ليس بيدك واعلم ان الله مقدر لك الخير وان الانثى الحق ـ تبحث عن رجل قوام لا تكترث للشكل كثيرا بقدر ما تكترث لنظافة الرجل واهتمامه بنظافته وأن يكون حكيما ليس همجيا ـ اهتم بصلاتك والقرآن واسأل الله الصالحة فلا شك ان الصالح يرزقه الله بالصالحة فقد قال تعالي : الطيبون للطيبات ـ واعلم يا أخي ان عندنا في الإسلام المرأة متزوجة او عزباء أما مرتبطه هذه فالربط يكون للبهائم واسأل الله من فضله يا أخي وتوكل على الله ولا تجعل الشيطان يسيطر عليك فتهلك واسأل الله الثبات على الحق ـ اسأل الله ان يهديني للحق وإياك.
تم النشر الثلاثاء، ١٣ يناير ٢٠٢٦
وعليكم السلام ورحمة الله وبركاته، يا أخي العزيز. أول حاجة، أشكرك إنك فتحت قلبك وشاركتنا ده كله. أنت مش لوحدك في اللي بتمر بيه، والاكتئاب الوجودي ده شعور حقيقي بيحصل لكتير من الشباب في سنك، خاصة مع الضغوط الجامعية والتغييرات الكبيرة. هو زي إحساس "أنا هنا ليه؟" واغتراب عن الناس والدنيا، وغالباً بيجي بعد ضغط نفسي زي اللي وصفته. بس الخبر الحلو إنه مش قدر، وفي طريقة تخرج منه خطوة بخطوة، وأنت قادر عليها إن شاء الله. خطوات عملية عشان تتحرر، يا بطل: رتب يومك بالصلاة والذكر : أنت ملتزم، ده أساس قوي! واظب على الصلوات في أوقاتها وزد من النوافل، والتزم بورد من القرآن. قول "لا إله إلا الله" 100 مرة صباحًا ومساءً والتزم بأذكار الصباح والمساء واربط كل يوم بجدول صغير: صلاة، مذاكرة، مشي 15 دقيقة في مكان هادئ. حارب الأفكار المؤذية : خد دفتر صغير واكتب كل فكرة سلبية زي "أنا ضعيف"، ثم رد عليها بحقيقة: "أنا طالب جامعي، ده إنجاز، والله خلقني كده وقدرني". كل يوم، اكتب 3 حاجات شاكر عليها (حتى لو صغيرة). ده بيعيد برمجة دماغك تدريجيًا. ابدأ صغير في الاجتماعيات : مش لازم تبقى "فهلوي" فجأة. قول "السلام عليكم" لزميل واحد في الجامعة يوميًا، أو رد على سؤال في محاضرة. الضعف ده من الحماية الزايدة، بس التعرض التدريجي بيبني الثقة. تجنب الزحمة أولاً، وروح مكان هادئ زي مسجد الجامعة. الدراسة والشغف : استخدم تقنية "بومودورو": ذاكر 25 دقيقة، استراحة 5. بعد أسبوع، هتلاقي الدماغ بتتحرك. للشغل، حدد هدف واحد: ابعت CV لفرصة واحدة أسبوعيًا. قبول الذات والحب : الله سبحانه قال "لقد خلقنا الإنسان في أحسن تقويم" الحب الحقيقي (الزواج الشرعي) هيجي لما تكون أقوى، مش قبلها. ركز على تطوير نفسك دلوقتي، وهتلاقي ناس تتقبلك لأنك هتتقبل نفسك. أنت تنفع، بس الوقت لسه مجاش. النوم ده هروب مؤقت، بس لو زدت نشاطك اليومي، هيقل. لو استمر، فكر في فحص طبي بسيط للحديد أو لفيتامين د. يا أخي، أنت مش "لوح تلج"، أنت إنسان حي بيحس وبيفكر بعمق – ده ميزة مش عيب. ابدأ النهاردة بخطوة واحدة، وهتشوف الفرق. دور في فدني على أسئلة مشابهة عن الاكتئاب هتلاقي إجابات كتيرة من خبراء. ولو عايز استشارة متخصصة، شوف الخبراء هنا: https://www.fedni.net/experts – في متخصصين نفسيين بأسعار معقولة أو مجانًا أحيانًا. أنت قوي، وهتفوق إن شاء الله. ربنا يفرج همك وييسر أمرك. 💪❤️
تم النشر الاثنين، ١٢ يناير ٢٠٢٦
السلام عليكم.. أولا مفيش حل سحري يغير حياتك ومفيش حياة مثالية ومفيش حل لكل المشاكل ... والناس اللي بتشوفهم اجتماعيين وبيضحكوا بشدة وحياتهم ملاهي فحابب اقولك ان دا اللي بيظهر لك والمظاهر خداعة .. فعلا منهم اللي مبسوط بس في اللي بيضحك بشدة عشان ينسى التوتر اللي مسهره الليل وفي منهم إلي بيموت من القهر لأنه انسان مشوه بيعيش ورا قناع السعادة وارضاء الناس ! ... عموما احمد ربك انه رزقك حب دين الإسلام فأعمل الخير وحب نفسك من خلال انك تديها حقها واسألها هي بتستمتع بإيه فعلا بعيدا عن رأي الناس وصخب الزيف ... وفي النهاية دي دنيا وانت فيها انسان وكائن ضعيف جدا فمتحملش نفسك الضعيفة شئ فوق طاقتها ولا تطلب حل كل المشاكل بل أخلص مع الله .. صلي عالنبي
تم النشر الثلاثاء، ١٣ يناير ٢٠٢٦
لعرض السؤال في فدني اضغط هنا