السلام عليكم، أنا مقدرة جدا إحساسك دلوقتي وصعوبة الموقف عليكِ، قدر الله وما شاء فعل. أنتِ قلتِ إنك تعبت واجتهدت وعملتِ كل حاجة وأنتِ عاوزة تفرحي أهلك ودعيتِ ربنا ووالدك دعى لك في قيام الليل. هل تفتكري كل ده ضاع؟ ليه حكمتِ إن درجة الثانوية معناها فشلك خلاص؟ ما دام عملتِ اللي عليكِ تيقني من قلبك إن ربنا اختار لك الخير ومجهودك ودعواتك ودعوات أهلك مضاعتش وربنا استجابها وهيوجهك للخير إن شاء الله. ******** أعرف ناس شخصيا من دفعتي وغيرها، اجتهدوا جدا وتعبوا ومع ذلك محققوش المجموع اللي هم عاوزينه ولا دخلوا كليات كانوا نفسهم فيها وحتى منهم اللي جاب مجموع كان صادم جدا بالنسبة لمستواه، كتير منهم تفوق وحققوا نجاحات بعد كده في كلياتهم أو المجالات اللي اختاروها بعد كده. واكتشفوا بعد كذا سنة من نهاية الثانوية إن ربنا فعلا كان شايلهم الأفضل ووجههم للطريق اللي فيه خير كتير فيهم. *** مش عارفة بالنسبة لحالتك هل اتظلمتِ في تصحيح الورق ولا فيه إمكانية تتأكدي أو تعملي كشف على نتيجتك ولا أنتِ عارفة إن دي إجاباتك. بس اللي متأكدة منه إن مش الثانوية العامة خالص اللي بتحدد مصيرك ولا تحكم على نجاحك في الحياة من عدمه. ** جايز كلامي ده متفهميهوش دلوقتي وأنتِ في حالة صدمة وممكن تفكريني ببالغ أو مش حاسة بوضعك، بس على فكرة أنا أكبر منك بسنين كتير فيعني شفت أكتر وعارفة الحياة بعد الدراسة والشغل عاملة إزاي وشفت تجارب غيري فبكلمك وبنصحك من خبرة (وإن كانت متواضعة) ** بتقولي أهلك زعلانين دلوقتي وانكسر خاطرهم، ليه تكملي زعلهم وكسرتهم دي بإنك تحكمي على نفسك بالفشل ومتكمليش وتختاري حاجة تدرسيها وتنجحي فيها وتصنعي اسم لنفسك يخليهم يفتخروا بك. أهلك هيفرحوا بعد كده إن شاء الله لما تعوضيهم بفرحة أكبر ولما يشوفوا إن الثانوية كانت مجرد عثرة في حياتك لكنها مكسرتكيش، بالعكس وجهتك لطريق أفضل إن شاء الله وخلتك أقوى. ** متاخديش قرارات دلوقتي وأنتِ في حالة صدمة. ومتحوليش نتيجة الثانوية لعقدة نفسية جواكِ، صدقيني مفيش حاجة خالص في الدنيا تستاهل. ** حبيبتي ركزي مع المادة الباقية لك ومتفكريش في أي حاجة ولا أي قرارات دلوقتي. بعد لما تهدي وتمر فترة ارجعي هنا اكتبي واطلبي نصائح لو محتاجة عشان تبدئي طريق جديد وربنا يعنيك. بدعي لك من قلبي ربنا يوفقك في حياتك كلها ويفرح أهلك بك إن شاء الله.💚💚
العفو، ربنا يوفقك.❤️❤️ ده تنسيق السنة اللي فاتت، مش شرط يكون مطابق للتنسيق الجاي لكن يعطيك مؤشر أولي للفرص المتاحة بحيث تقدّري فرصك مع الكليات المختلفة وتشوفي إذا مجموعك قريب من الحد الأدنى للكيات المتاحة فتقدري تعملي قائمة مترتبة بشكل واقعي مش اختيار عشوائي، وكمان تبقي عارفة البدائل المتاحة ومستعدة إن شاء الله لأي تغير في التنسيق.
تم النشر الاثنين، ٣ أغسطس ٢٠٢٦
شكرا لحضرتك 🎀💗 هو التنسيق دا صح
تم النشر الاثنين، ٣ أغسطس ٢٠٢٦
المفروض تركزي عليها حاليا وتستعدي لامتحانها، مش عارفة المفروض تمتحنيها بعد قد إيه ونظام امتحاناتكم عامل إزاي، بس اهدي الأول واقعدي رتبي أفكارك، احسبي الوقت الفاضل على امتحانها واعملي خطة تقسمي فيها الفصول وتراجعي بانتظام.. يفترض إنك هتكوني مركزة عليها لوحدها مش زي ما كنتِ شايلة هم مواد كتير فإن شاء الله تراجعيها كويس وحلي أسئلة امتحانات كتير، واعملي لنفسك زي لجنة امتحان، يعني حلي الامتحانات كأنك في لجنة وبتجاوبي في نموذج إجابة وفيه وقت محدد للإجابة مش مجرد حل مسائل في كشكول... ومتستهونيش وتقولي دول ٣٠ درجة ومش هيعملوا حاجة... درجة واحدة ممكن تفرق في التنسيق وتتيح لك اختيارات أكتر بعد كده.. فيه كليات ومعاهد تقبل من مجموعك وفيها مجالات مختلفة ممكن تفتح قدامك باب أفضل.. مش عارفة هل كنت محددة هدف معين ولا لأ بس ممكن تلاقي هدف جديد مكنتيش عاملة حسابه ويكون فاتحة خير لك بإذن الله. ده رابط لكليات قبلت السنة اللي فاتت من خمسين فيما فوق. https://www.almasryalyoum.com/news/details/4325900
تم النشر الأربعاء، ٢٩ يوليو ٢٠٢٦
المفروض اعمل ايه في الماده دي
تم النشر الأربعاء، ٢٩ يوليو ٢٠٢٦
لعرض الإجابة في فدني اضغط هنا