السلام عليكم، مش معنى إن اليوم منظم (بمعنى متقسم حسب المهام المطلوبة منك) أو إنك عارفة هتعملي إيه إنك هتنفذي المطلوب خلال اليوم. أنتِ عندك فجوة بين التخطيط والتنفيذ. ومش معنى إنك بتسوفي أو مش قادرة تاخدي خطوات التنفيذ إن ده فشل منك أو ضعف إرادة، أنتِ بس محتاجة تحددي سبب الفجوة دي وإيه اللي بيدفعك للتسويف وتغيري طريقة تعاملك مع المهام اللي بتحدديها لنفسك. ** التسويف بيجي من إحساس الضغط أو كثرة المهام أو وضع توقعات عالية أو خوف من الفشل أو مثالية زائدة أو نقص الحافز أو مشتتات في البيئة. فلازم تحددي أنتِ إيه سبب مشكلة التسويف عندك. هل بتضعي لنفسك أهداف كبيرة ومهام تقيلة خلال اليوم؟ هل خايفة تبدئي أو عندك خوف من الفشل فبتفضلي مترددة تاخدي خطوة إنجاز المطلوب؟ هل فيه مشتتات كتيرة في البيئة المحيطة بتحبطك أو بتعطل إنجازك؟ تحديد السبب هيحل جزء كبير من المشكلة. ***** وحسب السبب هتحددي طريقة التعامل مع المهام، يعني لو بتحطي مهام تقيلة قسميها لأجزاء صغيرة، لو مشتتة بين أهداف كتيرة فحددي أولويات ومتقليش على نفسك بالأهداف اليومية. ممكن تستخدمي مصفوفة أيزنهاور لتصنيف وتنظيم المهام. https://tasksboard.com/ar/blog/eisenhower-matrix-guide *** لا تنتظري الشغف أو إن يكون عندك حماس عشان تبدئي، لو فضلتِ منتظرة مش هتاخدي خطوة البدء وهتفضلي تسوفي، فأنتِ ممكن تستعملي قاعدة الخمس ثوان، تعدي تنازليا من خمسة إلى واحد وتقومي على طول تنفذي المهمة، بعد الخمس ثوان عقلك بيبدأ يفكر ويطلع مبررات للتسويف فمتعطيهوش الفرصة لده. كمان، أول خطوة أو أول خمس دقائق بيكونوا الأصعب فلو تغلبتِ عليهم هتكسري حاجز البداية وهتندمجي بسرعة في المهمة اللي بين يديكِ. وده اللي بتعمله قاعدة الخمس دقائق.👇 https://www.ajmubasher.net/news/health/2025/5/18/قاعدة-الـ5-دقائق-حيلة-نفسية-بسيطة-تقضي ***** حددي أولويات يومك، وقسمي المهام لأجزاء صغيرة، وحفزي نفسك باستمرار عن طريق تذكيرها بأهدافك والصورة اللي منتظراكِ في آخر طريق الهدف وبإنك تكافئي نفسك مع كل مرحلة إنجاز حتى لو صغيرة. والأهم، استعيني بالله دائما ورددي كتير ذكر (لا حول ولا قوة إلا بالله العلي العظيم) وإن شاء الله ربنا هيمدك بالقوة والطاقة للإنجاز اللي بتنشديه. بالتوفيق. 💚💚
لعرض الإجابة في فدني اضغط هنا