"أنا بقالي حوالي تلات سنين عصبي.. عصبي بطريقة يعني أوفر، بطريقة وحشة، إن أنا بقيت طريقة كلامي الطبيعية أصلًا من غير أي حاجة إن أنا صوتي عالي أو عصبي والشدة عليا، لدرجة إن أنا بجز على سناني، عروقي بتشد، بيجيلي صداع، عيني بتوجعني.. عصبي بطريقة أوفر.
حاجة تانية إن أنا من حوالي سنة كده.. أنا حاسس بص، أنا بقالي علاقة.. بقالي في علاقة يعني حوالي ست سنين، علاقة مع بنت وكده، لحد ما من سنة كده اتخطبنا. فـ لحد طول الست سنين دول كان.. يعني العلاقة إيه؟ فيها شد شوية من ناحيتي بس أنا كنت مأوفر، كنت شايف نفسي إن أنا مأوفر يعني من ناحية حاجات كتير، فكنت أنا اللي بـ.. بصنع مشاكل يعني ما بيني وما بينها. فكانت العلاقة دي تقيلة شوية.. حاجة خفيفة يعني.
لما اتخطبنا وكده، قبلها كان في صدمة بيني وبينها من ناحيتها أنا، أنا اتصدمت فيها في حاجة كبيرة، وبعدها سامحت عشان أنا بحبها وكده فاتخطبنا، وبعد كده بأربع أيام فركشنا خطوبتنا. من ساعتها وأنا كل حاجة تقريبًا في حياتي يعني اتغيرت.. هي مش.. مش هي السبب الأساسي طبعا، هي كانت.. يعني المشكلة دي أو العلاقة دي كانت أسباب سبب في حاجات كتير أوي حصلتلي في الفترة دي من ساعة الموضوع ده، السنة اللي فاتت دي كلها من شهر 11 من شهر 11/25.
غير كده، أنا بقالي حوالي سنة ونص متواصلين بتعاطى مادة بتسبب اكتئاب واضطرابات نفسية. فـ أنا مش عارف إذا كنت أنا اللي أنا فيه محتاج علاج إدمان بس ومجرد إن أنا أبطّل المادة دي عامةً هيخليني أحسن؟ ولا أنا محتاج علاج نفسي قبل ما أكون محتاج علاج إدمان؟ مع العلم برضه إن أنا من بدري وأنا محتاج.. حاسس إن أنا محتاج أروح لدكتور من حوالي سنتين ونصف أو تلات سنين، بس الموضوع كان بسيط أوي يعني.. كانت حاجات بسيطة مش زي دلوقتي.
يعني أنا دلوقتي حاليًا أنا مش.. مش عايز أعد مع حد، مش عايز أخرج، مش عايز أروح في حتة، حتى الشغل مش عايز أشتغل.. مش مش عايز أشتغل إن أنا مش قادر، لا أنا مش جايلي نفس ومفتوحة إن أنا أشتغل أو إن أنا حتى أسافر أو أخرج أو أتفسح أو حتى أتعامل مع أي حد.
وغير كده بلوم نفسي في أي حاجة، وشايف إن أنا السبب في كل حاجة حتى لو أنا مكنتش السبب. يعني البنت اللي أنا وهي كنا مخطوبين دي، أنا حاليًا بتكلم معاها وشرحتلها كل حاجة.. أنا عمال ألوم نفسي معاها في كل حاجة، بقولها: أنا فعلاً السبب في اللي إحنا وصلنا له، أنا السبب في إن إحنا كل حاجة عملناها أنا وأنتِ ضاعت، أنا السبب في كل حاجة.. ما عدا أهلي لأن هما كانوا سبب في عرقلة بسيطة كده.. يعني أنا لحد 18 سنة كنت عايش برة فما كانش ليا اختلاط بقرايب، بأصحاب، بأهل، ولما جيت هنا مريت بفترة وحشة بسبب إن أنا ما عنديش خبرة في التعامل مع الناس.. حاجات كتير يعني حصلت.
فـ أنا حاليًا محتاج أعرف إذا كنت أنا بسبب المادة دي تعبان ومحتاج علاج إدمان بس ومحتاج مصحة لعلاج الإدمان، ولا أنا محتاج علاج نفسي وخلاص؟ مع العلم برضه إن أنا لما بكون شغال أو في حاجة ممكن ما أشربش المادة دي عادي أو ما آخدهاش.. ممكن عادي يعني، أنا الموضوع بالنسبة لي مش صعب عليا إن أنا ما أشربش، هو بس بيبقى موجود وقت الفراغ ولو الدائرة المحيطة بيا موجود فيها الحاجة دي أو لو الحاجة دي قدامي
أخي، أول حاجة أحب أقولها لك إن اللي بتمر بيه دلوقتي مش بسيط، وإنك قدرت توصف كل ده بالتفصيل ده خطوة كويسة ومهمة. الغضب الزائد اللي بيوصل للصداع وعض الأسنان والتوتر الجسدي، مع فقدان الرغبة في أي حاجة (شغل، خروج، تواصل)، ولوم النفس المستمر، كل ده بيرسم صورة واضحة إن فيه ضغط نفسي متراكم من فترة طويلة، والمادة اللي بتتعاطاها بتزوده وبتخليه أسوأ. بالنسبة لسؤالك الأساسي: هل تحتاج علاج إدمان أول ولا علاج نفسي؟ الإجابة الأدق إن الاتنين مرتبطين، والمادة دي مش مجرد "عادة وقت الفراغ"، هي بتأثر على مزاجك وطاقتك وقدرتك على التحكم في نفسك. لكن في نفس الوقت، المشاكل النفسية (الغضب، اللوم الذاتي، الاكتئاب) موجودة قبل المادة وبعدها، والصدمة في العلاقة زادت الضغط. يعني لو وقفت المادة بس بدون ما تتعامل مع الجذور النفسية، ممكن ترجع لها أو تظهر أعراض تانية. والعكس صحيح. الخطوة العملية اللي أنصحك بيها دلوقتي هي تبدأ بتقييم نفسي شامل عند طبيب نفسي (مش مجرد معالج)، عشان يقدر يحدد إذا كان فيه اكتئاب أو اضطراب في الغضب أو تأثيرات المادة، ويعمل خطة علاجية متكاملة. كتير من الحالات زي حالتك بتحتاج دعم دوائي مؤقت مع جلسات علاجية عشان ترجع تتحكم في حياتك تدريجيًا. ولو المادة بتسبب اعتماد نفسي، الطبيب هيساعدك تقللها بطريقة آمنة بدون ما تخش في فراغ كبير. أنت مش لوحدك في اللي بتمر بيه، وإنك قادر توقف المادة لما تكون مشغول ده مؤشر إيجابي على إن عندك قدرة على التحكم. ابدأ بخطوة صغيرة: احجز موعد تقييم، وخلال الفترة دي حاول تملأ وقت فراغك بحاجات بسيطة ومنتجة حتى لو مش بتمتع بيها دلوقتي. التحسن بيجي تدريجي، وطلب المساعدة مش ضعف، ده قرار قوي. لو عايز تتكلم أكتر عن أي جزء من اللي بتحسه، أنا هنا.
تم النشر الخميس، ٢٧ أغسطس ٢٠٢٦
متوقفش المادة اللي بتستخدمها إلا لما تروح لدكتور نفسي ، لإن بعض المواد التوقف عنها فجأة خطر وبيسبب أعراض انسحاب شديدة ، ف انت محتاج تروح لدكتور نفسي الأول وتحكيله عن المادة دي وغيرها وهيعطيك أدوية ويشخصلك الحالة .
تم النشر الخميس، ٢٧ أغسطس ٢٠٢٦
لعرض السؤال في فدني اضغط هنا