السلام عليكم، طيب المشكلة مش في إنك ضعيفة ولا مش بتعرفي تستحملي ولا إزاي تتحملي أكتر، عشان أنتِ مستحملة من كتير وفوق طاقتك. مشكلتك إنك مش قادرة تقولي لأ وتكوني حازمة في طلب حقوقك. *** أنتِ مش مطالبة خالص تلعبي دور (المنقذ) لإخواتك أو غيرهم، وغير مطالبة تحلي مشاكل الكون ولا مسؤوليتك خالص عشان أنتِ الكبيرة تتحملي مسؤولية إخواتك بصورة تفوق طاقتك. للأسف المتوقع في مجتمعنا إن الأخ الكبير يتحمل مسؤولية الأصغر، ممكن يساعد أيوه مع الأبوين لكن هي مش مسؤوليته الكاملة ولا المفروض يتحاسب عنهم. *** الإهانة هتستمر وتحميلك فوق طاقتك هيستمر طالما أنتِ واضعة نفسك في آخر القائمة وشايلة أدوار مش بتاعتك. والناس مش بتتعامل مع الطيبة والعطاء بلا حدود إنه شيء يستحق الشكر، بيستقبلوه إن صاحبه مش بيقدر نفسه فبييجوا عليه أكتر. فالمطلوب منك تقدري نفسك وتفكري فيها الأول، نفسك وجسمك وصحتك أمانة ربنا وبطريقة حياتك دي أنتِ بتضيعي الأمانة دي وتهلكي نفسك. ***** أنت ٢٤ سنة وطبيبة يعني كبيرة والمفروض مستقلة فإيه يجبرك تفضلي عايشة بنفس الطريقة؟ ** والدك اتكلمي معه تاني بس بهدوء ومن دون انفعال ولا غضب لأن الانفعال حتى لو ببكاء هيخسرك معركتك. دربي نفسك ترفضي أي حاجة أنتِ مش مسؤولة عنها أو عقاب خطأ ارتكبه غيرك وفكري نفسك دايما إنك كبرتِ وناجحة في حياتك ومش مجبرة على تحمل أي إهانة. *** وقفي دور المنقذ والمساعد بس تدريجيا... يعني ابدئي عوديهم إن مش كل حاجة مطلوبة منك وانسحبي بالراحة، ممكن حاجات صغيرة تعمليها وحاجات تانية تعتذري بهدوء عنها وتتحججي بانشغالك. مش لازم تدخلي في جدال طويل أو تبريرات.. قولي بس مشغولة، مش هقدر، بعدين لو لقيت وقت، وهكذا. ** ومتستخدميش مع أهلك فكرة إنك دكتورة فعشان كده المفروض تستحقي احترامهم، ممكن يستقبلوها بطريقة سلبية وإنك بتتعالي عليهم، غير إن حتى لو أنتِ مش دكتورة فتستحقي كل الاحترام وعدم التعرض للعنف والإهانة. *** ركزي أكتر على حياتك وإنك تظبطيها، واهتمي بشغلك واستقلالك المادي، حافظي على مرتبك وابدئي اهتمي بنفسك وصحتك واشتري حاجات لبشرتك وجسمك. ولو فيه إمكانية تنقلي في شغل أبعد وتستقلي عنهم، اعملي ده بدل ما استمرارك معهم يدمرك جسديا ونفسيا. *** لو بتفكري في الزواج فبلاش خالص تاخديه كمهرب من حياتك مع أهلك لأن طالما المشكلة جواكِ هتجذبي أشخاص وبيئة نفس اللي أنتِ عايشة فيها. فابدئي عالجي الوضع، وإذا لقيتِ صعب لوحدك فلا تترددي تطلبي مساعدة مع مختصة نفسية وأسرية تتابع معك بخطة عملية، وإن شاء الله ربنا يصلح أحوالك ويهدي أهلك. ربنا معك.💚
لعرض الإجابة في فدني اضغط هنا