أنا في أولى ثانوي والمستر قالي ان التجهيز لتالتة ثانوي بيبدأ من أولى وده بيكون بإني أسمع شرح بالانجليزي لمنهجي وأشوف مصادر علمية أكبر من مجرد كتب المنهج بتاعي وكده بس أنا مش عارفة أبدأ ازاي وهل هعرف أوافق في الوقت
في البداية ممكن اقولك ربنا معاكي ويوفقك في مرحلة الثانوية العامة ودي مرحلة مهمه جدا والتجهيز ليها بيبدأ من اولى ثانوي حاليا مش مطلوب منك اكتر من انك تتقني المادة والمنهج بتاعك كويس جدا لانه مليان قواعد وأسس وحاجات كتير فهنشتغل عليه ونحاول منسبش اي تفصيله أو قاعدة من غير ما نطبق عليها كويس جدا وممكن تدعمي نفسك بمصادر خارجية بس في وقت الفراغ أو في الاجازه الصيفيه زي مثلا في قنوات تعليم اللغه الانجليزيه على اليوتيوب وافضل حد ممكن ارشحه هو قناه ابراهيم عادل القناه دي مميزه جدا وهتساعدك بشكل كبير جداً لكن حاليا هتتقني وتشتغلي على المنهج المقرر علشان ميحصلش ضغط في الوقت ربنا معاكي ويوفقك دايما🩷
تم النشر الجمعة، ١٤ نوفمبر ٢٠٢٥
ربنا يوفقك ويقدرلك الخير ..... في الأول بس أنا في تالته ثانوي ........ مش محتاجه من دلوقتي غير 6 حاجات انك تتعلمي افضل طريقى لدماغك انتي تذاكري بيها علي مدار السنتين بتوع اولي وتانيه انك تتقني المنهج بتاعك كويس جدا ثالث حاجه ودي هتفررق معاكي فعلا...... اكتبي المنهج ولخصي في كشكول خارجي(عربي رياضة وانجليزي) ده هيفرق معاكي جدا في الحاجات اللي هتحتاجيها في تالته ثانوي..... وخلي بالك من الفرنساوي لاحسن يرجع يتضاف للمجموع. .... كانت مفروض تكتب رقم واحد... بس اعتبري انها مكتوبة واحد.... علاقتك بربنا.... دي أهم حاجه ممكن تعمليها في حياتك اصلا.... اصدقائك ميبقوش اي نوع من أصدقاء السوء او حتى بيضيع جزء صغير من وقتك بدون فايدة أهم حاجة من الأسباب الدنيوية اللي ممكن توفقك.... تنظيم الوقت وعمل جدول مذاكرة ثابت (عادي ممكن تغيري مع تغير الظروف) المهم التنظيم في كل حاجه.... حاجه هتفرق معاكي جدا يعني ربنا يوفقك🤍.... واتمني منك تدعيلي دعوة من قلبك ربنا يوفقني واطلع من أوائل الجمهورية. 🤍
تم النشر الأحد، ١٦ نوفمبر ٢٠٢٥
الاستماع مهارة بتتطور بالممارسة المستمرة، كل ما تسمعي أكتر هتفهمي أكتر وهيتحسن السماع عندك... جربي الأول تسمعي قنوات للمبتدئين، دول بيتكلموا بهدوء وبطء، فيه ناس تانية بتتكلم بسرعة فلو مش متقنة اللغة ومهارة الاستماع عندك مش عالية مش هتلقطي الكلام ولا تفهميه. لو كتبتِ مثلا (english listening practice for beginners) هتلاقي نتائج بحث كتير تناسب مستواك... https://www.youtube.com/results?search_query=english+listening+practice+for+beginners وهتلاقي على يوتيوب بودكاستس وفلوجات في كل المجالات عامة فاختاري المجال اللي تحبي تسمعي عنه وابدئي في أي وقت فاضي حتى لو ربع ساعة كل يوم، هتفرق جدا.
تم النشر الثلاثاء، ١٨ نوفمبر ٢٠٢٥
شكرا 🤍
تم النشر الثلاثاء، ١٨ نوفمبر ٢٠٢٥
@Aya ahmed الأستاذ عاوزكم تخرجوا من الإطار التقليدي للتعليم النظامي، وأحييه بصراحة على تفكيره، للأسف توجهنا في تعلم اللغة سواء إنجليزي أو فرنسي كان سيئ وتقريبا ده النظام في دراسة المواد عمومًا.. اللغة عاوزة ممارسة واستماع كتير لمتحدثين أصليين زي ما الأستاذ قال. المنهج المدرسي بيعتمد على حفظ المفردات وصم قواعد النحو وفي النهاية الطالب مش بيعرف يمارس اللغة صح وممكن حتى ميقدرش يجاوب في الامتحانات. إذا مشكلتك بالوقت والمصادر فأنتِ ممكن تفصلي تعلم اللغة أصلا عن الدراسة... بمعنى، متلزميش نفسك إنك بتعملي ده عشان المنهج المدرسي. اعتبري إنك بتتعلمي مهارة خارج الإطار التعليمي عشان تفيدك في حياتك مش امتحاناتك بس... أعتقد لو مهتمة مثلا بتعلم الكروشيه أو أي مهارة هتخصصي وقت محدد لها فممكن تتعاملي مع اللغة على هذا الأساس. أنا متأكدة إن عندك وقت كتير بيضيع في حاجات تانية مش مهمة حتى لو تسويف... فلو مثلا بتفتحي سوشيال ميديا استغلي الوقت ده في متابعة فيديوهات مفيدة على يوتيوب في مجال أنتِ بتحبيه وتسمعي.. هحاول أشوف لك بعض المصادر اللي ممكن تفيدك وهكتبها لك هنا بإذن الله واختاري الأفضل بالنسبة لك. وبالتوفيق.
تم النشر الثلاثاء، ١٨ نوفمبر ٢٠٢٥
المستر أصلا قالنا بلاش تاخد منهج تالتة غير في تالتة ماتخدوش في تانية كمان هو بيقول نسمع يوتيوبرز أجانب حول الدرس بحيث أكيد ناخد معلومات أكتر ونشوف كتب ومصادر أكبر مش مجرد كتاب الدرس بحيث اما نوصل لتالتة نتعود على النظام ده من الآخر مش عايز اعتمادنا كله يبقى مقتصر على المستر وكتاب الدرس أيا كان عايزنا نبحث وندور self learning من الآخر ونسمع فيديوز بالانجليزي عشان نتعود على اللغة كل ده بقى عشان في تالتة نكون اتعودنا ونطور نظام تعليمنا ميبقاش تقليدي
تم النشر الثلاثاء، ١٨ نوفمبر ٢٠٢٥
أنا موضوع اللغة كقراءة وممارسة كويسة المشكلة عندي في الاستماع بحس اني مش بفهم كلام كتير يعني لو فيديوهات لازم الكلام يكون مكتوب تحت بالانجليزي عادي بفهم لكن استماع بس صعب
تم النشر الثلاثاء، ١٨ نوفمبر ٢٠٢٥
لأ شكرا
تم النشر الثلاثاء، ١٨ نوفمبر ٢٠٢٥
بس الموضوع صعب خاصة مع المدرسة والدروس وكمان مش عارفة مصادر مش عارفة أبدأ ومضغوط في وقتي فكنت بسأل يمكن حد يفيدني
تم النشر الثلاثاء، ١٨ نوفمبر ٢٠٢٥
مش المقصود أخد من أولي منهج تالتة يمكن معرفتش أوضح المقصود
تم النشر الثلاثاء، ١٨ نوفمبر ٢٠٢٥
لعرض السؤال في فدني اضغط هنا