السلام عليكم
انا بنت داخله تالته ثانوي علمي علوم لغات بإذن الله ف كنت حابه اسال المفروض اعمل اي حاليا عشان ادخل مستريحه ..مع العلم انا ابيض يا ورد يعني داخله السنه لا توجد معلومات نهائيا يدوبك الكيمستري اعرف عنها حاجات بسيطه و الفيزكس كويس اني عارفه اسمها و البايو معرفش عنها حاجه لاني ماخدتهاش قبل كده هتسالوني مدخلتش رياضه ليه اقولكوا عشان مش فاهمه ماث بعرف احل اه بس مش فاهمه الاسئله و كمان الرياضه فيها ماث وكيمستري وفيزكس ف حاسه انه كتير عليا بصراحه ف دخلت علوم و مش عارفه مدرسيين عدليين لان المدرسيين اللي انا كنت معاهم مش حاسه اني فاهمه حاجه منهم بذات بتاع الفيزكس دة ف مش عارفه اعمل اي ياريت تنصحوني
السلام عليكم، أولا ربنا يوفقك في دراستك وتكون ثالثة ثانوي سنة لطيفة وسلسة معاكِ. ** مش هقدر أفيدك من ناحية المدرسين ونظام المواد عندكم لأني نظام قديم بس هقول لك شوية نقاط ونصائح عامة أرجو تفيدك. *** بالنسبة لأنك داخلة أبيض يا ورد فعادي، حتى لو مفيش أساسيات معك أنتِ ممكن تبدئي من الأساسيات سواء قبل ما الدراسة تبدأ أو بعدها. بس قبل ما تفكري ازاي تبدئي هنصحك بحاجة مهمة، خدي فاصل راحة بعد سنة تانية، متبدئيش مذاكرة على طول لأن ممكن تيجي بعد شهور تحسي إنك فقدتِ كل طاقتك وقدرتك على المذاكرة بسبب إنك حصل لك احتراق نفسي ووظيفي. ده حصل مع طلبة كتير بدأوا بدري سنة أو ١١ شهر وحاليا بيشتكوا إنهم حصل لهم إجهاد في آخر شهر ومش قادرين يراجعوا حتى. فأنتِ استجمي في فترة الإجازة، خدي فاصل كده افصلي تماما ذهنك من المذاكرة والمواد الدراسية والقلق على الثانوية عشان تبدئي بعد كده بذهن صاف. ** بعد ما ترتاحي ابدئي بقى شوفي إيه المواد اللي ناقصك فيها تأسيس (اليوتيوب بقى عليه كل حاجة تساعدك في ده) وحطي خطة مرنة تراعي فيها المواعيد اللي بتكون طاقتك وتركيزك فيها عالي، وظبطي روتينك اليومي ووقتك ونومك خلال فترة قبل بدء الثانوية، ولو عندك مشكلة في إدمان السوشيال ميديا والموبايل فاستغلي الفترة دي عشان تتخلصي منه لأن ده بيؤثر على تركيزك وقدرتك على المذاكرة خاصة لو حصل تعفن دماغي بسبب الريلز والتيك توك. ** ومهم جدا جدا، متدخليش سنة ثالثة وأنتِ قلقانة وحاسة إنها دي اللي هتحدد مصيرك أو تشيلي هم طموحات أهلك وآمالهم فيكِ. كل ده هيسبب لك ضغط نفسي ويتوتر وهيؤثر على مذاكرتك وإنجازك، خلي بس كل تركيزك إنك تعملي اللي عليكِ وتسعي وأنتِ موقنة إن ربنا مش هيضيع تعبك. ** أنصحك تبحثي على أسئلة الثانوية العامة والنصائح على التطبيق هنا هتلاقي إجابات تفيدك أكتر. وربنا يوفقك.
تم النشر الأحد، ٣١ مايو ٢٠٢٦
بصي من قلب الحدث انا قاعدلى شهر على امتحاناتى ف هقولك نصيحه السنه دى اكتر سنه ضغط نفسي وبدنى ف حياتك كلها اكتر سنه ممكن يحصل معاكى مواقف تبينلك الناس اللى حواليكي بجد اكتر سنه فيها احداث طويله ف نفس الوقت بتجرى بسرعه حاولى متراكميش امانه التراكمات والله والله هتخلي نفسيتك سالب وهتفقدى شغف اه هو مش بايدك الموضوع ده كل طالب ثانويه بيمر بيه لااازم تراكمى لكن تفوقي وتلحقي نفسك قبل مايفوت اى اوان بس تحاولى على قد ماتقدرى ماتراكميش حاجه ولو كان على المواد ف لو عندك مدرسين سنتر كويسين وبتفهمى منهم تمام معندكيش ف تابعى كيمسترى مع خالد صقر وبايو مع دكتور احمد الجوهرى وفيزيكس مع محمد عبدالمعبود ولو على انك مخدتيش حاجه فيهم قبل كده ف متقلقيش من اى حاجه المدرسين دول بيراعوا كل ده وبيشرحوا كل حاجة انتى كطالبه محتاجاها اهم حاجة تحلى وتفهمى كل حاجة متعتمديش على الحفظ بس حاولى متتأثريش بالكلام الكيليشيه بتاع كل الناس انا جبتلك خلاصه كل طلاب الثانويه المفيده متسمعيش كتير كل حد وليه تجربته وظروفه وحياته مش شرط اللى نجح معاه ينجح معاكى انتى كل حد وليه ال experience بتاعته يعيشها بظروفه اهم حاجة تبعدي عن الموبايل واى مشتتات عشان والله العظيم هتندمى انا الكلام ده اتقالى قبل ما ادخل بس للاسف برضو وقعت فيه احنا شعب مبيقتنعش بحاجه غير لما يجربها وعن تجربه اكبر مثال قدامك اهو ف امانه متكرريش الغلط ده خدى النصيحه على محمل الجد ومتستنيش تجربي ف نفسك وتيجي تقولى بعدين ياريت اللى جرى ماكان ربنا يعينك ويوفقك يعمرى وتكونى اشطر كتكوته ان شاءلله ❤ لو عندك اى استفسار قولي وبعدها امسحي الاسك عشان متسمعيش حاجات تشتت مخك تانى
تم النشر الثلاثاء، ٢ يونيو ٢٠٢٦
ابدئي مع المدرسين بجد وبلاش بدري علشان ما تزهقيش في الاخر نصيحه تحت باند ما تغلطتيش غلطتي السنه طويله ويا بخت اللي يكملها للآخر بنفس شغف البدايه وربنا معاكوا ويعينكوا قبل ما تبدئي بأسبوع اسمعي اساسيات دا اللي ممكن يفيدك وما تتوتريش بجد علشان ندمت كتير والله واعملي اللي عليكي وما تفكريش كتير استمتعي بالاجازه علشان كلنا كنا شبهك كدا
تم النشر الاثنين، ١ يونيو ٢٠٢٦
وعليكم السلام يا قمر 🌸 أول حاجة، اطمئني، كتير بنات بيدخلوا تالتة ثانوي وهم مش عارفين حاجة كتير، والموضوع مش مستحيل. المهم تبدئي دلوقتي بخطوات بسيطة ومنظمة عشان تدخلي السنة وأنتِ مرتاحة. نصائح عملية للاستعداد: راجعي الأساسيات دلوقتي (في الإجازة): ابدئي بفيديوهات يوتيوب مبسطة لمنهج أولى وتانية ثانوي في الفيزياء والكيمياء والبيولوجي. ركزي على المفاهيم الأساسية مش الحلول المعقدة. ابحثي عن مصادر كويسة : مدرسين أونلاين مشهورين بشرحهم السهل (جربي أكتر من واحد لحد ما تلاقي اللي يناسبك). استخدمي كتب الوزارة + ملخصات مبسطة. خطة يومية خفيفة : خصصي ساعتين يوميًا للمذاكرة، مادة واحدة في اليوم. ابدئي بالبيولوجي لأنكِ مش عارفة عنها حاجة، وبعدين الكيمياء، ثم الفيزياء. في فدني : ابحثي عن أسئلة مشابهة لتالتة ثانوي علمي، هتلاقي نصائح كتير من بنات زيك. لو محتاجة دعم نفسي أو خطة دراسية مخصصة، في خبراء تعليميين على: https://www.fedni.net/experts أنتِ قادرة يا روحي، الإرادة والاستمرارية هي اللي بتفرق. لو عايزة خطة أسبوعية مفصلة قوليلي وأساعدكِ فيها 💪
تم النشر السبت، ٣٠ مايو ٢٠٢٦
ما تقلقيش تالته غير أولى وتانيه
تم النشر الأحد، ٣١ مايو ٢٠٢٦
بحاول مقلقش بصراحه بس خايفه معرفش اكون قد السنه
تم النشر الأحد، ٣١ مايو ٢٠٢٦
لعرض السؤال في فدني اضغط هنا