السلام عليكم، شكرًا على مشاركتك تجربتك مع باقي الأعضاء وإن شاء الله ربنا يوفقك أنتِ وكل اللي في الثانوية. بالنسبة للخوف والقلق فطبيعي، ومش بضغطة زر أكيد هتتخلصي منهم تمامًا لكن التسليم لربنا واليقين إن مش مطلوب مني غير السعي وبذل الجهد ده بيساعد جدا. وإنك كمان تبرمجي عقلك على حاجة مهمة، الثانوية العامة أيوه مهمة لكن هي مش مصيرية.. بمعنى إن لو حد لا قدر الله متوفقش فيها أو مدخلش الكلية اللي كان هو أو أهله عاوزينها ده معناه إنه فشل في حياته وخلاص مصيره انتهى واتحدد زي ما الناس بتحكم. الثانوية مجرد مرحلة ومحطة لكن مش هي أبدًا اللي بتحدد المصير، وطبعا ربنا مش هيسألنا دخلتم كلية أو إيه أو جبتم مجموع كم في الثانوية لكن هيسألنا ويحاسبنا على الوقت والجهد والنية من وراء الدراسة. وتعويض الأهل وإنك تفرحيهم مش بس من خلال الثانوية، بنجاحك وبطرق تانية كتير ممكن تسعديهم وتعوضيهم. انسي التوقعات حاليًا وركزي بس على الطريق... خلي عينك باصة على خطواتك الجاية ومركزة على الطريق لحد ما توصلي بإذن الله. وما دام بذلتِ الجهد فتيقني إن ربنا هيوفقك ويعوض تعبك ويوجهك للطريق اللي فيه نجاحك بإذن الله. نصيحة أخيرة للمذاكرة، ظبطي جدولك مع مواعيد الصلاة والزمي أذكار الصباح والمساء وسورة البقرة يوميًا ولو بتفصلي بين جلسات المذاكرة خلي فاصل ولو خمس دقائق تقرأي فيهم صفحة قرآن... هيفرق كتير وعن تجربة. وبالتوفيق إن شاء الله.
العفو، تسلمي كتير، وربنا يوفقك في كل حياتك.💚💚
تم النشر الخميس، ٢ أكتوبر ٢٠٢٥
شكرا بجد على كلامك دا وربنا يطمن قلبك يارب
تم النشر الخميس، ٢ أكتوبر ٢٠٢٥
لعرض الإجابة في فدني اضغط هنا