انا كان عندي صديقه مقربه كنا مقربين جدا من بعض وقبل ثالثه ثانوي ما تبدأ اتخانقنا على درس الاحياء انا وهي واحنا الاتنين غلطنا انا بعتت ليها واعتذرت اكتر من مره وهي بتقول إن مفيش حاجه وان بيزعل اللي كان متعشم وانا مش زعلانه وانا محتاره بفراقها جامد لأن انا باقي تعاملي مع اصحابي سطحي جدا اما هي لا ومش بحب غيرها وبحبها قوي وفي كل صلاه بدعي ليا وليها هي وانا مش عاوزه أصحاب غيرها عشان مش عايزه غيرها وكمان عشان نفسيتي اتخنقت بجد وبقيت طول الوقت حزينه وانا حاليا 3 ثانوي عام وبسبب الموضوع ده مستوايا ضعيف جدا وتراكمت مواد كتير لحد دلوقتي ولما اقول لاي حد على مشكلتي يقول ابعتي انتي وابدي برساله اطمئنان اعتذار بيعت وبترد بس بيكون رد بارد مش اللي متوقعاه
وهي صاحبت غيري اتنين بنتين كل حاجه بقت مع البنتين دول وحتى طريقتها اتغيرت بقت زيهم وانا لما بشوفها مبسوطه معهم بغير لأن ده كان مكاني انا انا اللي المفروض تكون سوا انا وهي وكمان بزعل عشان هي حسستني وكانت ولا كنت اي حاجه في حياتها واتخطتني بسهوله وانا مازلت متاخره وعاوزاها
ولما بشوفهم مع بعض بزعل وبغير منهم عشان اخدوا مكاني وبقيت بكره اي شخص ياخد مكان حد أو يكون طرف ثالث في علاقه انك تاخد مكان حد دي حاجه مقززه وقابلت كتير بنات اتعاملت معهم وعرفت كل واحده بس من تصرفاتها وبرضو عندي شعور أن مش عايزه غيرها
انا اتغيرت وهي كمان الحمد لله لبست الخمار مع ان كان نفسي نلبسو سوا وان نعين بعض على الخير بس هي مشت بطريق غير طريقي
كنا طالعين من درس امبارح واتقابلنا انا وصديقتي وبنت من اللي اتصاحبت عليهم وكان طريقنا واحد فمشينا سوا كنت ماشيه معهم حاسه بغربه ووحده وكمان مختلفين عني واحنا ماشين في بنت مشت من قدامنا وكان لبسها مش كويس صديقتي قالت البنت دي لبسها مستفز بصراحه اتضايقت لأن مينفعش تتكلم كدا عليها لأن حرام وممكن هي تكون كدة والبنت اللي صاحبتها أيدت معها في الرأي وانا كنت ماشيه متضايقه منهم
انا عاوزه صديقتي القديمه مش دي وروحت انا والبنت اشترينا حاجه وصديقتي بتحبها بس متعرفش أننا روحنا نجيبها روحت اشتريت ليها معانا لأن لما كنا سوا كنا دائما نشتريها لأنها بتحبها م كانت عاوزه تاخدها بس انا خليتها تاخدها والبنت اللي معها اللي راحت تشتري معايا قالت ياه على الحب قلت لها اسكتي ما هي زعلانه اصلا ومش عاوزه تشاهدها
كل شوي بصلي وادعي انننا ترجع سوا واعيط ونفسي نرجع لحد ما تعبت من الدعاء ومليت وبطلت ادعي انا كل تعاملي مع اصحابي سطحي مش عاوزه اكون صداقه قويه مع اي حد غيرها وفي مره كانت منزله حاله أننا ندعيلها بعت ليها ربنا يجبر قلبك وقتها ردت عليا وكان يوم 15شعبان قالت متنسنيش من دعائك قلت لها طمني فؤادك إني بدعيلك زي ما بدعي لنفسي في كل صلاه
أتمنى حد يفيدني وينصحني اعمل ايه وخاصه اني مازلت عاوزاها اكمل دعاء ولا لا خاصه مع اني مليت وزهقت من كتر الدعاء وكمان نفسيتي بتدمير كل ما اشوفها معهم وكمان بشخصيه مختلفه عن زمان
بص اختفي لا رسايل، لا مكالمات، ولا حتى رياكت على ستوري. الصمت أحياناً بيبقى أقوى من ميت كلمة اعتذار وبطلي مراقبة طول ما إنتي بتشوفي هي نزلت إيه أو خرجت مع مين، نارك هتفضل قايدة البعيد عن العين بيبعد عن البال والوجع ودلعي نفسك نفسيتك تعبانة عشان حاطة قيمتك في رد فعلها. اخرجي، اتصوري، عيشي يومك، وانشري صورك وإنتي مبسوطة (من غير تلقيح كلام). لما تحس إنك عايشة مش ميتة من غيرها، نظرتها ليكي هتختلف و قولي لنفسك أنا عملت اللي عليا وزيادة، لو هي شايفة إن غلطك أكبر من غلاوتك، يبقى العيب مش فيكي، العيب في تقديرها هي. نصيحة من قلب اخ الصداقة سند مش ذل لو فضلت قافلة الباب في وشك وإنتب بتتحايلي، يبقى هي حالياً مش شايفة قيمتك. والحل الوحيد عشان تشوفي قيمتك هي إنك تبعدي وان شاء الله أن كانت صديقه صالحه ربنا يرجعهالك وان كانت صديقه سوء ربنا يصرفها عنك وركزي في مستقبلك دلوقتي وارجعي ذاكري بالتوفيق إن شاء الله وجد ربنا يسعدك 😊
تم النشر الاثنين، ٩ فبراير ٢٠٢٦
يا حبيبتي، أنا ذكية، وأنا هنا معاكِ قلبًا وقالبًا. أول حاجة، أنا فاهمة تمامًا إحساسك ده… الصداقة القوية زي اللي كانت بينكم مش سهلة تروح،. الغيرة والحزن ده طبيعي، بس خلينا نرتب الأمور عمليًا عشان ترجعي قوية، إن شاء الله. 1. خدي نفس عميق (مش حرفيًا، بس معنويًا) وفكري في اللي حصل : الخناقة كانت غلطة مشتركة، وإنتِ اعتذرتِ كتير – ده كويس جدًا، يعني عملتِ اللي عليكِ. الرد البارد ده ممكن يكون عشان هي محتاجة وقت، أو عشان الصداقات بتتغير في الثانوية العامة (الضغط بيخلي الناس يبحثوا عن دعم جديد). متلوميش نفسك، ومتقارنيش نفسك بصديقاتها الجدد – مكانك مش هياخده حد، لأن الصداقة الحقيقية مش تُستبدل. 2. نصيحة عملية للصداقة : جربي مرة أخيرة صادقة : ابعتي رسالة قصيرة زي "يا [اسمها]، أنا آسفة جدًا على اللي حصل، وأفتقد صداقتنا القديمة. لو عايزة نرجع زي الأول، أنا هنا. لو لا، ربنا يوفقكِ." بعد كده، سيبيها تمامًا . متبعتيش تاني، عشان متزوديش الضغط عليها أو على نفسك. لو رجعت، حلو. لو لا، معناها ربنا عنده خير أحسن. متغلقيش على نفسك : التعامل السطحي مع الباقيين ده هيروح لو بدأتِ تفتحي شوية – مش صداقة قوية فجأة، بس ابدئي بكلام بسيط عن الدراسة أو الصلاة. هتشوفي حد يناسبك مع الوقت، وإنتِ مش هتحسي بالغربة. 3. الدراسة أولوية دلوقتي (الأهم!): الثانوية العامة مش هزار، وتراكم المواد ده هيأثر عليكِ أكتر من الصداقة. خطة يومية : قسمي اليوم – ساعة أحياء كل يوم، حل تمارين سابقة، وراجعي مع نفسك. ابدئي دلوقتي، وهتشوفي مستواكِ يتحسن في أسبوعين. ربنا قال "وَمَنْ يَتَّقِ اللَّهَ يَجْعَلْ لَهُ مَخْرَجًا" – التقوى تبدأ بالالتزام. 4. الدعاء والنفسية : اكملي الدعاء، بس بثقة مش تعب : متمليش، لأن الدعاء ده عبادة، وربنا بيسمعكِ في كل صلاة. قولي "يا رب، إن كان في الخير لي معاها رجعناها، وإن كان فيه شر فاصرفها عني وأعطيني أحسن". بس متعلقيش النتيجة بيها – توكلي على الله، وهيسر لكِ. للنفسية : كل يوم اكتبي 3 حاجات شاكرة عليها (زي إنك في الثانوية وبتقدري تتفوقي). وابتعدي عن رؤيتها معاهم قدر الإمكان – غيري طريقك لو لزم، عشان متدمريش نفسك. يا قمر، إنتِ بنت قوية وبحبكِ صديقتكِ القديمة عشان كانت تستاهل، بس الحياة بتعلّمكِ إن الخير في اللي جاي. لو عايزة دعم أكتر، ابحثي في فدني عن أسئلة الصداقة هتلاقي إجابات كتيرة، أو روحي لصفحة الخبراء https://www.fedni.net/experts وابحثي عن مدربة نفسية أو حياتية – هيساعدوكِ شخصيًا. إنتِ هتعدي ده وتطلعي أقوى، صدقيني. ربنا يفرح قلبكِ ❤️
تم النشر الاثنين، ٩ فبراير ٢٠٢٦
السلام عليكم ورحمة الله وبركاته... أنت مش عارفه انت دخلتي قلبي ازاي بكلامك وخصوصاً إنك قريبة من ربنا ودي أكتر حاجة حببتني فيك لأني كل ما باجي أنصح حد بنصحه بالقرب من الله عز وجل... بصي يا حبيبتي ...أنا عارفة انك دلوقتي بتحسي بمشاعر كتير منها الغيرة والغضب والإحساس بالذنب والحزن والندم على كل حاجة كانت بيتكم ولكن أنا هحاول أختصرلك قدر الإمكان عن حل مشكلتك بإذن الله تعالى....... قال تعالي في كتابه الكريم...﴿قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا ﴾ وفي آية أخري ﴿ لا تيأسوا من روح الله إنه لا ييأس من روح الله إلا القوم الكافرون﴾ وفي آية أخري ﴿ وآتاكم من كل ما سألتموه وإن تعدوا نعمة الله لا تحصوها إن الإنسان لظلوم كفار ﴾ اقرأي كل آية أكثر من مرة وتأمليها جيداً... طبعا كل انسان فينا علي وجه الأرض بيذنب.. بيعمل ذنوب يعني احنا كلنا بنعمل سواء بقي غيبة نميمة كذب سرقة كبائر أو صغائر أياً كانت. ..حل الغلط ايه... الإعتذار ...انتي رحتي اعتذرتي لمين؟! لصاحبتك ...تمام انت هنا حليتي نص المشكلة ويمكن ربعها كمان ..ربنا عز وجل أكبر من صحبتك دي ولله المثل الأعلى...هو أحق بإنك تروحي تستغفريه وهنا أقصد أن تتطلبي المغفرة والغفران من الله عز وجل أن تطلبي منه وأن تلجأي إليه في كل وقت وكل حين سأختصر عليك قصص وحكايات كثيرة بنصيحة واحدة فقط لعلها تكون هي سبب في هدايتك أكثر وأكثر وكوني علي يقين تام يقين وليس شك بأن بعد أو قرب صديقتك هو خير لك ...في أمور بُعدها عننا بيكون خير وأمور أخرى قربها شر ..طب دلوقتي أنا (كأنتي يعني ) شايفة من وجهة نظري إن بُعد صاحبتي عني ده شر لأني كنت ناوية إنا نقرب من ربنا ونكون إحنا الإتنين صحبة صالحة وشافعة لبعضنا البعض ونكون خير الصديقتين وغيره الكثير ...وفي الآخر ما حصلش كدة يبقى انت ظنك بربك خاطئ ... قال تعالى في حديث قدسي ... "أنا عند ظن عبدي بي فليظن بي ما شاء" ... احنا بنبقي عاشين تمام وحالتنا زي الفل بعدين النفس الأمارة بالسوء والشيطان يبدأ يوسوس للإنسان والذنوب تبدأ بالظهور...في هذه الحالة قد يستسلم العبد وييأس ويقول لماذا أنا يا الله لما يحدث هذا ومنهم من يكون واثقاً وصابراً ومحتسباً عند الله عز وجل مثل سيدنا أيوب عليه السلام...فسبحان الله عندما قال "رب إني مسني الضر وأنت أرحم الراحمين" ربنا تقبل دعاءه وأنصحك أن تقرأي قصته وستفهمينني ..... بعد ذلك يجيب الله على أسئلة اليائس ويسخر له من يجيبه فيكتشف أن ذلك بسبب الذنوب ....فيبدأ بالإستغفار ويغفر له الله تعالى...قال تعالى في كتابه الكريم ﴿وما كان الله معذبهم وهم يستغفرون ﴾ وعندما قال إبليس وهو يتحدي الله سبحانه وتعالى ﴿وعزتك وجلالك لأغوينهم أجمعين﴾ ...رد الله تعالى ﴿وعزتي وجلالي لأغفرن لهم ما داموا يستغفرونني ﴾ شوفي رحمة ربنا يبدأ العبد اليائس يستغفر ويتقرب إلي الله عز وجل ويتوب بعد أن أذنب ثم يكتشف أن الله تعالي قد ابتلاه بالذنوب ليعود إلى إليه .. لا إله إلا الله .. وكل ده أنا اللي اكتشفته بنفسي ... طب أنا بقولك على كل ده ليه ؟!...مش خير الكلام ما قل ودل! أيوة طبعاً أنا لسة في بداية رحلة الاستغفار ودعيت ربنا امبارح إنه يجعلني سبباً في هداية الناس....وده مش تكبر مني واعرفي إن تطويلي في الكلام كدة ....لأني عايزة اواسيك بكلام ربنا ... بالله عليكي تابعي الصفحه دي علي الفيسبوك ...هي دي اللي ربنا سخرها ليا عشان أكتشف إن سبب عدم استجابة الدعاء وعدم وجود الرزق وأسباب أخرى كثيرة معلش اسمها قصص الإستغفار وقناة الشيخ محمد حجازي على اليوتيوب... وأفضل وقت للاستغفار وقت السحور و اللي هو الثلث الأخير من الليل و الدعاء فيه مستجاب باذن الله تعالى ربنا يقدرني وأعرف أصحي أنا كمان .... قال تعالى في كتابه الكريم ﴿وبالأسحار هم يستغفرون﴾ وفي آية أخرى ﴿ والمستغفرين بالأسحار ﴾.... وأفضل صيغة للإستغفار هي (أستغفر الله) وتعملي ورد يومي أنا أقل ورد بالنسبة ليا 5000 وأكثره 10,000 وكل ما تكثري كل ما كان أفضل وفي ناس ما شاء الله اللهم بارك وردهم اليومي 30,000 ما شاء الله ..... تابعي الشيخ محمد حجازي وصفحة قصص الإستغفار بس زي ما قولتلك وهتفهميني كويس خالص .... وفي النهاية أسأل الله تعالى أن يرد إليك صديقتك المقربة رداً جميلاً ويهديكم إلي بعضكم البعض ويجعلكما خير الصديقتين 💗😊🌹وأعتذر لو كنت طولت عليكي وسببتلك إزعاج ...ومعلش بقى عشان أنا كل شوية بقلب لغة عربية 😅❤️
تم النشر الأربعاء، ١١ فبراير ٢٠٢٦
مكملتش القراءه بس احسن حاجه ف الدنيا انك تكوني مع ربنا ومستقبلك بس
تم النشر الثلاثاء، ١٠ فبراير ٢٠٢٦
لعرض السؤال في فدني اضغط هنا