انا عندي صاحبه من ٩ سنين حصلت مشكله صغيره فرقتنا بس انا عايزه ارجع أصاحبها تاني انا مليش غيرها قريبه مني وهي كذلك الأمر بس.لما جيت اعتذر او اهزر معها زعقت لي بصوت عالي في الشارع انا يمكن غلطت بس هي مش مصدقاني هل المفروض اعتذر؟
الموضوع هو اني قولت رايحه الامتحان عشان خاطر واحده غيرها وهي كنت عماله تقولي تعالي انا والله كنت رايحه عشانها بس قولت كده عشان أغيظها بس لما حد حاول يصلحنا على بعض هي مرضيتش وقالت عمري ما هعتذر
السلام عليكم، طالما اعتذرتِ وهي رفضت خلاص، إذا حابة تكرري الاعتذار بهدوء مع توضيح سوء الفهم اللي حصل تمام، اعتذري بس تكوني واخدة في بالك احتمالية رفضها عشان متحسيش بإحباط وكسرة. فكري مع نفسك إنك بتعملي اللي عليكِ تجاه صداقتكم. ممكن إذا متمسكة بصداقتكم تعطيها بعض الوقت، جايز هي شخصية حساسة وكلامك جرحها لكن المهم تنتبهي لنفسك ومشاعرك. سواء هي أو أي شخص حاولي تكون علاقتك متوازنة، يعني لا تتعلقي بزيادة ولا تكوني جافة أو سطحية. التعلق مؤذ وهيخليك دايما معتمدة على وجودها ومتأثرة بكل مشكلة تحصل بينكم أو أي بعد منها وده مش صح. ** ممكن لو جيتِ تعتذري اختاري مكان هادي مفيهوش ناس ولا في الشارع عشان ميتكررش اللي حصل ووضحي لها وجهة نظرك وإنك مقصدتيش تجرحيها وإنها كمان يعتبر جرحتك لما زعقت لك في الشارع فنعتبر كده خالصين وصافي يا لبن. إذا فضلت على موقفها فاعطيها بعض الوقت زي ما قلت ولو بعد كده صممت تنهي صداقتكم فأعتقد مش لازم وقتها تتمسكي بحد بايعك مهما كنتِ متعلقة به. وبالتوفيق.
تم النشر السبت، ١٨ أبريل ٢٠٢٦
اللي حصل بينكم شكله بسيط في السبب لكن كبير في إحساسها هي. فكرة إنك قلتي إنك رايحة عشان واحدة تانية حتى لو بهزار ممكن تكون وصلت لها على إنها تقليل منها أو إنها مش مهمة زي ما كانت فاكرة، خصوصًا لو هي متعلقة بيكي. آه، الاعتذار هنا مهم… بس مش أي اعتذار وخلاص. لازم يكون واضح وصادق من غير تبرير زيادة. يعني بدل ما تقولي كنت بهزر، ركزي على إحساسها هي: أنا عارفة إني ضايقتك بكلامي، حتى لو كنت بهزر، وحقك تزعلّي. أنا آسفة بجد ومكنتش أقصد أقلل منك ولا أغيظك بالشكل ده. كمان مهم تفهمي إن رد فعلها، الزعقة قدام الناس، مش أحسن حاجة… بس ده غالبًا طالع من زعل متراكم أو إحساس إنها اتجرحت. فلو دخلتي معاها بمنطق أنا غلطانة وهي كمان غلطت، الموضوع هيقف مكانه. جربي تديها مساحة شوية لو هي رافضة الكلام دلوقتي… وبعدين كلميها بهدوء أو حتى ابعتي لها رسالة لطيفة من غير ضغط. ولو لسه رافضة، يبقى ساعتها تكوني عملتي اللي عليكي. حاجة أخيرة… فكرة مليش غيرها دي محتاجة تهديها شوية. التمسك الزيادة ساعات بيخلي الواحد يقبل معاملة مش مريحة. صالحيها آه، بس كمان خليك محافظة على كرامتك وهدوءك. العلاقة الصح بترجع بالراحة مش بالغصب.
تم النشر الأحد، ١٩ أبريل ٢٠٢٦
يا حبيبتي، أول حاجة أشكرك إنك شاركتيني القصة دي، واضح إن الصداقة دي غالية عليكي بعد ٩ سنين، وده شعور طبيعي جدًا. 😊 الكذبة الصغيرة دي (حتى لو عشان تغيظيها) خلقت شك، وهي دلوقتي مش مصدقاكي، وده مفهوم لأن الثقة بتتأثر بسرعة. بس نعم، ابدئي بالاعتذار ، لأن الاعتذار الصريح من صفات المسلمة اللي بتحافظ على علاقاتها. خطوات عملية عشان تعمليها صح: اكتبي رسالة هادئة وصادقة (مش في الشارع أو مكالمة، عشان متزعقش تاني): قولي "أنا آسفة على الكذبة دي، كنت رايحة عشانك بس غلطت وغظتك، وأنا عارفة إني خسرت ثقتك. أنا بحب صداقتنا وعاوزة نفضل أصدقاء." متضغطيش عليها ترد فورًا. اديها وقت (أسبوع أو اتنين)، متلحقيهاش كل يوم. ركزي على نفسك: مارسي هواياتك، صلي، اقري قرآن عشان تهدي قلبك. لو مردتش ، خليكي صبورة ومفتوحة الباب. الصداقة الحقيقية بترجع لو الطرفين عايزين، بس لو مش هي، هتلاقي ناس تانيين يقدروكي. لو عايزة نصائح أكتر أو تشوفي آراء تانية، ابحثي في فدني عن "مشاكل صداقة"، أو شوفي الخبراء هنا: https://www.fedni.net/experts. أنتِ قوية وهتقدري، ربنا يصلح بينكم! 💕
تم النشر السبت، ١٨ أبريل ٢٠٢٦
اصدق النية وهتلاقى الظروف جمعتكم وحضنتو بعض وبدون اصل وفصل وكانى ومانى
تم النشر الأحد، ١٩ أبريل ٢٠٢٦
واضح أنها اتأثرت بحاجة بسيطة زي كدا فدا معناه أنها غالبا متعلقة بيكي فممكن بدل ما تعتذري ليها تعملي موقف مضاد للي أنت عملتيه، بمعنى أنك في الموقف بتاعتك حسستيها أنها مش مهمة، فاعملي موقف تاني يحسسها بأنها مهمة جدا وساعتها هترجع تاني، وبعد كدا ممكن تقرري تعتذري
تم النشر الأحد، ١٩ أبريل ٢٠٢٦
اعتذري واعملي اللي عليك رجعت زي الاول خير وبركه ما رجعتش يبقى على الاقل اعتذرتي عن غلطتك
تم النشر السبت، ١٨ أبريل ٢٠٢٦
لما حاولت هي رفضت
تم النشر السبت، ١٨ أبريل ٢٠٢٦
ممكن انتى تبدأى ب الاعتذار ودا تؤجرى على كدا وديه يدل على سماحة قلبك ولينة ف ابدأى انتى ومش هتخسرى حاجة بل هتاخدى أجر
تم النشر السبت، ١٨ أبريل ٢٠٢٦
لعرض السؤال في فدني اضغط هنا