كان في صديقه في حياتي كانت كل حاجه ليا بس هي باعتني وخذلتني لعبت علي مشاعري قطعت معاها وبعد فتره لاني بحب الكتب اكتشفت كتاب صديقي السيكوباتي واكتشفت أن كل المواصفات توفرت فيها عرفت تلعب علي عاطفتي ومشاعري وتحسسني بالذنب رغم اني الضحيه
المشكله دلوقتي اني مش قادره انساها بفتكر ذكرياتنا الحلوه والوحده برضو بدخل الشات عندها واكتبلها عملتي كدا فيا لي بس بمسح كل دا ومش بيعت حاجه عشان انا عاتبت قبل كدا وفضلت تبرر وحسستني اني انا الي ظالماها
ف اعمل اي 🥲
بصي يا حبيبتي. هي الحياة طبعا اكيد ما وقفتش على صاحبتك دي. بس لو انت مش عارفه تنسيها فمش عشان هي عملت معاكي حاجه حلوه. لا عشان انت واحده كويسه. فننسى بقى الوحش بالحلو ما دام حد آذانا في حياتنا احنا ما ينفعش ندخله حياتنا ثاني الا لو احنا غاويين الاذيه لنفسنا. يعني انت لو حابه تؤذي نفسك وحد اذاكي قبل كده فدخليه حياتك علشان ياذيكي تاني لأ اللي سهل عليه يؤذي مره هيؤذي الف مره واحنا مش هنفضل طول عمرنا فئران تجارب لغيرنا. احنا قيمتنا عاليه ولازم نحس بقيمتنا علشان خاطر نعرف نقدرها ونخلي اللي قدامنا كمان يعرف يقدرها. لان ما حدش مش هيقدر نفسه ومستني اللي حواليه يقدره. فما دام حد اذاكي بلاش تدخليه حياتك ثاني وانت ياما هتصاحبي وياما هتشوفي زي ما قابلتي وحش هتقابلي حلو بس اهم حاجه ان انت ما تاخديش الحلو على نفس طريقه منهج الوحش. وحاولي على قد ما تقدري انسيها تماما وانت عايزه تنسي شخص افتكري اذاكي في ايه ما تفتكرلوش حاجه حلوه.
تم النشر الثلاثاء، ٢٨ أكتوبر ٢٠٢٥
السلام عليكم، أنا مش عارفة كم عمرك بس أعتقد صغيرة شوية. المهم، محتاجة تعرفي إن الموضوع طبيعي هياخد منك وقت... مش سهل تنسي شخص كان قريب منك وفيه صداقة وذكريات كتيرة تجمعكم. حاولي تتفهمي مشاعرك وإن عادي تحزني وتتألمي وتحني وتفهمي إن الصبر والوقت هيعالجوا كل ده إن شاء الله. *** عاوزة بس أنبهك لنقطة، بلاش تحكمي على الشخصيات من كتاب قرأتِه أو فيديو سمعتِه، الوحيد اللي يقدر يشخص هو الطبيب النفسي. يعني ممكن تكون صاحبتك مش سايكوباتية خالص وتكون فيها صفات ما خليتك تعتقدي فيها ده أو حصل سوء فهم كتير ما بينكم، يعني مش بعيد تكون هي كمان لو قلنا لها احكي إيه حصل بينكم وحكت الأمور من وجهة نظرها تقول مثلا إنك حساسة وفهمتِ غلط أو أي حاجة تانية، وتكون مصدقة فعلا زاويتها من الحكاية لأن ده اللي حصل من وجهة نظرها. لما بتكوني برا المشكلة وبتسمعي لطرفين بينهم خلاف ممكن قوي تلاحظي سوء فهم كل طرف للتاني وإصرار كل واحد إن الحق معه والتاني اللي غلطان. فبلاش تتسرعي في الأحكام مهما كان اللي حصل بينكم. *** لو خلاص مفيش أمل لرجوع صداقتكم وأنتِ مصرة إنها أخطأت في حقك وباعتك يبقى خلاص قرري تنسي وتتجاوزي، والنسيان والتجاوز هيجي مع الوقت وإنك تشغلي نفسك بأهداف في حياتك وتملأي يومك عشان متلاقيش وقت للتفكير. *** نصيحة أخيرة، تعودي تكوني وسط في علاقاتك بالناس، يعني لا تتعلقي قوي فتنجرحي ولا تكوني جافة وحذرة طول الوقت. وربنا يصلح لك الأحوال.
تم النشر الاثنين، ٢٧ أكتوبر ٢٠٢٥
السلام عليكم ورحمه الله وبركاته بصي هو يعني بصرف النظر عن اتفاصيل اللي حصل بينكم الصح الواحد ميتعلقش بحد بالطريقة دي يعني ما ينفعش يتعلق بحد بالطريقه دي لا لازم يكون انا في وسط علاقات كتير مع الناس واحد علاقتي به راحت يبقى في ناس ثانيه السبب اللي بيخلي الانسان يدخل في حاله مش كويسه او مش ظريفه او يتعب لما يفقد حد ما يكونش عنده الا هو فده هي دي المشكله ولكن الطبيعي الانسان يكون على علاقات بناس كتير وعلاقات كلها كويسه وفي مسافه بينه وبين كل العلاقات اه في الناس اللي بتقدرش تعمل المسافات ديت لان احنا مش مش ماسكين مسطره أو مش هنقدر ننس قلوبنا مع الناس الكويسه. ولكن على الاقل على الاقل ما يكونش واحد بس في حياتي يكون واحد واثنين وثلاثه واربعه لما الانسان بيحصل له مشكله مع حد يبقى الاتنين تلاتة الاربعه التانيين موجودين حواليه فمبيحسش إنه فقد حد اه بيتاثر بس الموضوع بيروح بسرعه ولكن لو ده الواحد حد الوحيد اللي في حياتك او الاقرب تماما واحد بس والباقي كله معارف هتتأثري جدا لو فقدتيه يعني فالحل بعد كده خلاص هتقومي وهتنسيه الحياة كده زمن كفيل انه يعالج الكلام ده يعني لكن لما تقومي بعد كده وسعي علاقتك شويه بالناس عشان لما تفقدي احد فيهم ما تزعليش قوي وتلاقي بدايل طول حياتك فالموضوع بقى ايه ميسببش صدمه بالطريقه دي يعني
تم النشر الثلاثاء، ٢٨ أكتوبر ٢٠٢٥
مرحباً حبيبتي، أنا ذكية، وفهمت تماماً مدى الألم والارتباك اللي بتحسي بيه مع الموقف ده. مش بس فقدان شخص كنتي تعتبرينه كل حاجة، لكن كمان خيانة الثقة والاستغلال العاطفي بيخلي الموضوع أصعب بكتير. خليني أساعدك بخطوات عملية علشان تساعدك تنسي وتتخطّي الألم ده بطريقة صحية: اعترفي بمشاعرك : مش من الضعف إنك تحسّي بالحزن أو الغضب أو حتى الندم. دي مشاعر طبيعية لما حد بيخذلك. فرغي مشاعرك بالكتابة أو التحدث مع نفسك بصوت عالي أو حتى مع شخص مختص لو قدرت. امتنعي عن التواصل معاها : حتى لو بتدخلي الشات وبتكملي المحادثة، ده بيخلق حلقة مفرغة بتجعلك تفتكري أكتر وأكتر. مش هتقدري تنسي غير لما تخلي المسافة دي موجودة. ركزّي على نفسك : ابدئي تهتمي بيك وبحاجات بتحبيها - الكتب اللي بتحبيها مشروع ممتاز. يمكن تجربي تدوّن أفكارك ومشاعرك في يوميات. حاولي تملأي وقتك بشغل أو هوايات جديدة تعلّميها أو نشاط بدني يساعدك تفرغي الطاقة السلبية. تقبلّي الواقع وتحرري من الذنب : مهم جداً ما تسمحيش لحد يبرر أفعاله على حسابك أو يحاول يقلب الحقائق ويحمّلك إحساس بالذنب. احكي مع نفسك بلطف : لما تجيكي الذكريات الحلوة والوحشة، قولي لنفسك "رغم اللي حصل، أنا موجودة دلوقتي وأستحق حياة تمانية وسعيدة." دي طريقة تعيد بناء احترامك لذاتك. ولو حسيت إنك محتاجة مساعدة أكتر أو حابة تتكلمي مع استشاري نفسي أو مدرب حياة، تاني ممكن تلاقي في محترفين في صفحة الخبراء في فدني https://www.fedni.net/experts واللي ممكن يدعموك في رحلتك دي. في النهاية، خدي الموضوع خطوة خطوة، وما تضغطيش على نفسك. انتِ قوية وقادرة على تخطي ده، بس محتاجة شوي صبر واهتمام بنفسك. لو حابة تحكي أكتر أو تسألي عن أي خطوة، أنا هنا معاك دايماً. ❤️
تم النشر الاثنين، ٢٧ أكتوبر ٢٠٢٥
لعرض السؤال في فدني اضغط هنا