السلام عليكم، أنا فاهمة كلامك وإحساسك جدا وفاهمة شعور استنزاف الطاقة وإنك في مرحلة ما مش بتقدري حتى تقاومي عشان تخرجي من الحالة وده بيزود الشعور باليأس وعدم الثقة في قدرة نفسك على الخروج من الوضع وممكن يوصل الحال لمرحلة تدمير ذاتي بتخليك تعملي كل الغلط وتستمري في كل السلوكيات اللي عارفة إنها غلط وضارة لك بهدف لاشعوري في تدمير الذات. بس ساعات كتير لما بتوصلي للنقطة دي بتبقي محتاجة ترتاحي ومتقاوميش لبعض الوقت... يعني ممكن بتمري باحتراق نفسي واستنزاف طاقة وقدرة... عقلك وجسمك ونفسك محتاجين فاصل. في الوقت ده مش محتاجة تفضلي تلومي نفسك ولا تحاولي تجبريها ترجع للنسخة الأولى أو تكون الشخصية الأفضل أو اللي الناس فاكراها. ترفقي بنفسك وتفهمي المرحلة لكن في نفس الوقت هتقومي بالحد الأدنى المطلوب منك، يعني إذا قبل كنت بتصلي الفروض كلها في موعدها أو بتضيفي نوافل ودلوقتي مقصرة أو حتى موقفة صلاة ارجعي صلي حتى لو بتقطعي أو لو مش يتحسي بخشوع أو بتلاقي إنك بتصلي بآلية وتأدية فرض. لو مش عارفة تتخلصي من ذنوب قرري تعملي خير أو حسنات بعد كل مرة تقعي في ذنب زي إنك تخرجي صدقة أو تستغفري ١٠ دقايق. وهكذا، يعني خدي الأمور بالتدريج.. الخطوات البسيطة والصغيرة قوي قوي قادرة مع الوقت تدفعك لحد ما إن شاء الله تخرجي من المرحلة دي وتكوني أفضل بإذن الله.
لعرض الإجابة في فدني اضغط هنا