عندي 16 سنه و حقيقي معنديش اي ثقه ف نفسي ولا ف شكلي ولا ف جسمي
عندي حبوب ف وشي حاولت اعالجها كتير يمكن قلت بس لسه موجود كتير
جسمي مش قادره اتحكم فيه
كل يوم نفس الروتين انا مليت حقيقي ونفسي اكون احسن و مختلفه ف اولي ثانوي ف ممكن حلول ؟
أول حاجه مرحلة حبوب الوجه دي طبيعية جدآ و أنا مريت بيها و حرفياً كنت بحط مراهم و زي ما اشترتها كنت برميها كان ولا كأن جسمي رافض أصلا المراهم ديه ولا كأني عندي مناعة منهم فده حاجه طبيعة و مع الوقت هيروح بس أنتي متحطيش إيدك على وشك كتير و قللي من اكلك للسكريات و الشبسيهات و أى حاجه بنجبها من السوبر ماركت (بلاش تقولي أنا مقولتش الشوكلاته فهكلها عادي 😂) تاني حاجه كل واحده و جسمه مختلف عن التاني يعني أنا جسمي مش شبه جسم صديقي جسمك مش شبه جسم صديقتك كلنا مختلفين و علشان كلنا مختلفين بقى فى ازواق كتير و أنواع كتير من كل حاجه فده شئ جميل يعني تخيلي أنت عندك شكل فريد و جسم فريد و فكر فريد و كل حاجه فيكي فريده مميزة حرفياً ده فى حد ذاتوا شئ مبهر تالت حاجه بالنسبة للروتين اليومي كل يوم بنعيد نفس الحاجه أقوم من السرير أنزل أقعد تحت اغسلي الموعين أكلم صحبتي أشوف الاستوري أقعد قدام الباب مفيش أى حاجه جديده الموضوع ملل صح أوي أوي و حقك الصراحه طب أقولك على فكره مثلا أنتي لما بتصحي من نومك بتمسكي التلفون على طول و تشوفي مين بعتلك رسايل و تردي... لا متعمليش كده و حطي التليفون بعيد و أول ما تصحي دقيقتين كده فكري فى هتعملي إيه النهارده و جهزي نفسك علشانه و بعدها لما تغسلي وشك و لو هتصلي صلي بعدها امسكي التليفون و ردي على الرسائل براحتك المقصد اليوم قدامك طويل فى إيدك تعملي حاجات كتير بدل ما انتي بتتفرجي على فيلم كوري و الواد اللي بيحط مكياج😂 اتفرجي على فيلم مصري يعني شجعي بلدك شوية بدل ما بتسمعي أغاني اجنبيه زي حالاتي اسمعي اغاني مصرية اسمعي نشيد وطني يا وطني 😂😂😂 آخر حاجه ربنا معاكي فى الثانوية أنتي قدامك شوووط طويل أوي و لازم تنهيه بكل قوة و عزيمة و إصرار و أتمني إني أكون أفدتك حتى و لو بحاجه بسيطة. وبس
تم النشر الأربعاء، ١٩ يوليو ٢٠٢٣
انا مقدرة الفترة اللي انتي فيها كويس وحاسه بيكي ... لكن عايزة اقولك واطمنك ان كل ده طبيعي جدا .. مرحلة بتغير فيها حاجات كتير جدا فيكي وف جسمك عموما .. والحبوب ديه كمان طبيعية هتاخد وقتها بس هي اكيد مش هتروح في لحظتها، + ان ده طبيعي زي ما قولت ليكي بيحصل لبنات كتير في سنك مش انتي بس. حاولي تعالجيها كويس .. وتعتني ببشرتك .. وباذن الله هتتحسن هضع ليكي رابط لصفحة منتجات كويسة جدا والمنتجات ديه من مواد طبيعية وكتير جدا بيشكروا في المنتجات كلميهم وقولي له على المشكلة بتاعتك وهما هيرشحوا ليكي المنتج المناسب https://www.facebook.com/ashry.natural اما عن الروتين الملل .. روتينك ملل حاولي تغيري فيه متسلميش نفسك للواقع وزهقه اعملي حاجات جديدة .. روحي الجيم، روحي مثلا انشطة تطوعية روحي اتعلمي حاجه جديدة موهبة مثلا .. العبي لعبة رياضية معينة .. غيري من يومك بأي شكل حتى لو بحاجه بسيطة.
تم النشر الأربعاء، ١٩ يوليو ٢٠٢٣
السلام عليكم ورحمة الله وبركاته يا حبيبتي، ما تقلقيش. ١٦ سنة دي مجرد بداية العمر. لسه قدامك طريق طويل. الثقة في النفس بتيجي بالوقت والصبر. أهم حاجة تبدئي تحبي نفسك وتقبليها زي ما هي. الجمال مش بس في الشكل، الجمال الحقيقي جوه الإنسان. بالنسبة لحبوب الوش، فالحبوب ممكن تعالجيها بمنتجات طبيعية زي زيت شجرة الشاي. و ممكن تروحي لدكتور جلدية يقدر يساعدك. ركزي على الرياضة والنظام الغذائي الصحي وهتلاقي جسمك بيتحسن. غيري روتينك شوية وابدأي هوايات وأنشطة جديدة تستمتعي بيها. الروتين، ممكن تبدئي تغيريه ببطء. مثلاً تدخلي هواية جديدة أو تتعرفي على أصحاب جدد. التغيير بيبدأ بخطوة صغيرة. أهم حاجة تفضلي قريبة من ربنا، وادعيله كتير. هو اللي بيغير القلوب وبيرتب الأمور. ثقي فيه واستعيني بيه، هيوفقك. وأي مشكلة عندك في المدرسة ممكن نتكلم فيها مع بعض ونحاول نلاقيلها حل إن شاء الله.
تم النشر الأربعاء، ١٩ يوليو ٢٠٢٣
بصي يا ستي انا ممكن اكون مريت بحاجه مشابه ليكي كده اولا الحبوب اللي عندك هي مش وحشه ومتخفيش مع الوقت هتمشي عادي بس انتي متبهدليش نفسك معاها وبالله عليكي بلاش لمس كتير ماشي.... انا كان عندي انميا فكان عندي لون ابيض تحت عيني وانا كانت بشرتي قمحي فمكنش احسن حال فقعد اجري وراها وفي الاخر هي مشيت لوحدها... ثانيا الجسم وده صراحه احنا كاشخاص ملناش اي دخل فيه تبارك الله احسن الخالقين دي خلقت ربنا لازم نحمده عليها وممكن ناس تانيه يكون عجبك اجسامهم بس لقدر الله عندهم اي مرض الله اعلم فاحنا نحمد ربنا علي اللي عندنا ونرضي ثالثا الملل... انا دلوقتى داخل سنه تالته ثانوي يعني ممكن اقول ان انا اصعب بس لا مفيش حاجه اسمها كده انا برضو بحس بملل وكل الناس بالعموم كذلك بس نصحتي ليكي حاولي تقربي من ربنا هو حللا كل المشاكل والهموم واخيرا الازم تثقي في نفسك لان الثقه دي قادره علي حاجات كتيره اووي وربنا معاكي ويوفقك.
تم النشر الأربعاء، ١٩ يوليو ٢٠٢٣
غيري اصحابك .. ورحى لدكتور جلدية .. واعرفي انك ١٦سنة لسه قدامك كام سنة تكونى عروسة مكتملة الأنوثة وطبعا صحباتك ممكن يكونوا بقوا كدا فعلا ولكن الموضوع بيختلف من حد لآخر لحد ما يكتمل نموه ... وفى النهاية لازم تؤمنى انك افضل خلق الله واحسنهم ولو كان في خلقة غير كدا اكيد مش هتبقي جميلة .. كمان الجمال شىء نسبي اللى اشوفه حلو غيري ميحبوش .. والا الناس كلها كانت ارتبطت بشكل واحد أو شخص واحد... حبي نفسك اكتر من كدا
تم النشر الأربعاء، ١٩ يوليو ٢٠٢٣
انا فاهم كلامك بس عندي نقطة صغيرة هقولهالك.. اما تحبي نفسك الناس كلها هتشوفك جميلة و واثقة
تم النشر الخميس، ٢٠ يوليو ٢٠٢٣
ده طبيعي في سنك و الله العظيم .. و عادي جدا معناه ان هرموناتك شغالة و بتتغير و ده طبيعي جدا برضه .. اقتكري دايما ان فيه ناس ناقص ايدين و رجلين و عيون و لو سالتيهم هيقولوا لك الحمد لله راضيين جدا بقضاء الله و قدره ، الرضا ده لازم يبقي راسخ جواكي ، طول ما انتي بتهتمي بمظهرك و نظافتك الشخصية يبقي خلاص لازم تثقي في نفسك علشان اولا احنا مش في مسابقة ملكات جمال الكوكب ثانيا انت في مصر او في اي بلد عادي برضه الناس حواليكي مش فنانين و رياضيين .. ناس عادية بسيطة مليانين عيوب ، و كالعادة دي حياتك انتي و من بطولتك بس مش تمثيل حقيقية تحبي البطلة تبقي معندهاش ثقة في نفسها و مهزوزة ولا راضية عن نفسها و سعيدة و مبتسمة ، مش مطلوب من حد انه يقيم جمالك او شكلك ربما حلقك في احسن تقويم ممكن ، لازم ترضي عن نفسك و كمان تكون شاكرة ان ربنا خلقك زي ما انتي .
تم النشر الأربعاء، ١٩ يوليو ٢٠٢٣
لعرض السؤال في فدني اضغط هنا