كنت شخصية عاطفية بشكل زائد وبركز في كل حاجه حولي وأزعل من أقل فعل أو قول وأراعي مشاعر الآخرين بشكل مبالغ فيه ولو حتى هاجي على نفسي
لكن الآن أصبحت إنسانه واضحه لها حدود + أمنع أي حاجه بتحصل وتخصني ومش عاجباني
يعني مثلًا لو صديقة ليا بتتكلم معايا باستمرار عن ولد أو أي موضوع أنا عارفه إنه حرام وتضييع وقت ليا
زمان كنت بخاف أحرجها أو أسيب جواها أثر مش حلو ، لكن دلوقتي بقيت بعد ما تخلص أقولها أنا لاحظت إننا بنتكلم في الموضوع ... كتير وده ما ينفعش يبقا محتوى كلام خالص ،وهكذا بقا مع كل المواقف . بقفل اللي قدامي من غير مرحلة المجاملات أو خوف عالمشاعر
وبقيت بشوف أي حد عاطفي زياده حد ساذج ومش حابة اللي هو بيعمله
حابة شخصيتي دلوقتي لإنها ريحتني كتير أوي من حاجات كنت ساكته عليها من الاحراج أو مجامله بس في نفس الوقت حاسه اني مش عارفه اتأقلم مع شخصيتي الجديده
بصي يا بنت الناس مش مشكله اللي بيحصلك ده رد فعل طبيعي بعد ما كنتي بتيجي على نفسك كتير فجأة قفلتي الحنفية على الآخر بس خدي بالك الاسلام دين وسط يعني حلو إنك عملتي حدود ومنعتي تضييع الوقت في الحرام بس خليكي فاكرة إن الكلمة الطيبة صدقة والرفق مبيتحطش في حاجة إلا و بيخليها أجمل بكتير يعني خليكي حازمة في قراراتك بس من غير ما تبقي قاسية في أسلوبك أو تشوفي الناس اللي لسه عاطفيين إنهم سذج بالعكس دي رحمة من ربنا بس محتاجة توجيه فإنتي حاولي توازني بين إنك تحمي نفسك وبين إنك تفضلي لينة القلب عشان متخسريش حلاوة روحك وفي الآخر ادعي ربنا يرزقك البصيرة اللي تخليكي تعرفي امتى تشدي وامتى ترخي عشان تعيشي مرتاحة وراضية عن نفسك بجد وجد والله ربنا يحفظك ويسعدك 🌷
تم النشر الأحد، ٢٦ أبريل ٢٠٢٦
أنا شايفه إن اللي عملتيه ده كويس جدًا ومش أي حد يقدر يوصل له. إنك تبطلي تمشي ورا مشاعرك طول الوقت وتبقي عندك حدود واضحة… دي حاجة تحسب لك مش ضدك خالص. بس الفكرة بس إنك شدّيتي الحبل للناحية التانية شوية. يعني زمان كنتي بتسيبي نفسك زيادة، دلوقتي بقيتي قافلة زيادة. فـ طبيعي تحسي إن في حاجة مش مظبوطة. مش محتاجة ترجعي للي كنتي عليه، بالعكس كفاية كده. بس ممكن تخلي أسلوبك أهدى شوية مش أكتر. يعني بدل ما تقفلي الموضوع مرة واحدة، توضحيه وخلاص. كده كده انتي عندك حق في اللي بتعمليه، بس الطريقة أحيانًا بتفرق. والحلو فيكِ إنك واخدة بالك من نفسك ومن التغيير اللي حصل، وده في حد ذاته حاجة حلوه جدًا. ناس كتير بتفضل زي ما هي ومش بتفهم نفسها أصلاً فـ لا، انتي مش غلط… انتي بس محتاجة تزبطّي اللمسة الأخيرة عشان تبقي مرتاحة أكتر مع نفسك. ان شاء الله تقدري تتأقلمي مع كدا ف اقرب وقت..🤍
تم النشر الأحد، ٢٦ أبريل ٢٠٢٦
يا حبيبتي، أول حاجة أقولك إن التغيير ده رائع وصحي جداً ! ده نمو شخصي حقيقي، وأنتِ دلوقتي بتضعي حدود واضحة زي ما الإسلام بيأمر. زمان كنتِ "people-pleaser"، بتراعي الآخرين على حساب نفسك، وده بيؤدي للإرهاق العاطفي. دلوقتي بقيتِ assertive (واثقة وقوية في التعبير)، وده بيحميكِ من الضياع في حاجات حرام أو مضيعة وقت زي اللي ذكرتيه. ليه صعب التأقلم؟ عشان الشخصية الجديدة دي زي "عضلة جديدة"، محتاجة تدريب عشان تتقبليها. الدماغ بيحتاج وقت يتعود على الثقة الجديدة، وممكن تشعري بذنب مؤقت من "الرفق" اللي كنتِ متعودة عليه، بس الرفق الحقيقي مش مجاملة، ده صدق مع رحمة. نصائح عملية عشان تتأقلمي: ابدئي بلطف مدروس : قولي رأيك زي ما بتعملي، بس أضيفي "أنا بحبك وده رأيي عشان مصلحتك" – كده تحافظي على التوازن (الرفق أفضل). راقبي ردود الفعل : لو حد زعل، ذكّري نفسك إن مش مسؤوليتك مشاعرهم، بس لو حسيتِ إفراط، خففي شوية. مارسي يومياً : اكتبي 3 حاجات إيجابية عن شخصيتك الجديدة، واشكري ربنا عليها. لو عايزة دعم أكتر : شوفي أسئلة مشابهة في فدني، أو روحي للخبراء في https://www.fedni.net/experts – فيه متخصصين نفسيين هيساعدوكِ تثبتي التوازن ده. أنتِ قوية وفخورة بنفسك، استمري كده وهتتعودي قريب. ربنا يريّح قلبك 💕
تم النشر الأحد، ٢٦ أبريل ٢٠٢٦
لعرض السؤال في فدني اضغط هنا