ممكن حد يساعدني أنا بقالي كتير اوي كنت بعاني من اكتئاب وقلق ، وجه وقت نتيجة الثانوي لاقيت اني مظلومة كتير اوي اوي وحاليا معرفش ليه م قادرة اعمل اي حاجة ف حياتي وحتى قبل النتيجة كنت حاسة بكدا بردو بقالي مدة مش قادرة اتعايش ابدا ونفسي اهدا ودماغي تهدا،غير ان موضوع النتيجة بقى محسسني ان كل حاجة ظنيت بيها خابت، أنا م فارق معايا كلية معينة ولا كان ليا طموح بس كان نفسي اتعوض بمجموع معين عشان احس اني حد يستاهل الحياة ويكون له انجاز، الطاقة عندي صفر الشعور بالحياة عندي معدوم والله ، لو حد يعرف ازاي اكون كويسة وغير كدا ازاي اغير نظرتي المتشائمة تجاه الحياة وخوفي المستمر ومش عاوزة كلام من بتاع الرضا والقدر لاني عارفاه انا بس بقيت حاسة ان كل حاجة بلا معنى
وشكرا ليكم
السلام عليكم، أولا ربنا يعينك ويخفف عنك وتخرجي من الحالة دي بأسرع وقت. أنتِ قلتِ إحساسك ده من قبل النتيجة أصلا، فنقدر نقول إن مش المجموع هو السبب، هو كان إضافة أو حتى نتيجة لوضع سابق وزاد عليه. ** اللي أنتِ فيه غالبا هيكون سببه تراكمات وضغوط حياتية معرفتيش تنفثي عنها لحد ما وصلتك لحالة من الاحتراق النفسي فحاسة بانطفاء وانعدام الشعور بالحياة وعدم تقبل للواقع حولك، مشاعرك وطاقتك المعدومة معناها إن جسمك وعقلك ونفسك مرهقين ومستنزفين لأقصى درجة ومحتاجين وقت للراحة والتعافي. *** ممكن تقولي أنا بقالي وقت فاصلة ومش بعمل حاجة ولا مهتمة بحاجة، بس ده في الآخر مش الراحة اللي نفسك عاوزاها، أنتِ طول الوقت ذهنك مشغول وأفكارك السلبية شغالة والقلق والتفكير الكتير عمال بيستنزفك فالتراكم يزيد وتنطفي أكثر. ** حاسة بمشاعرك وعارفة الإرهاق والانطفاء وانعدام الطاقة عامل إزاي وأي نصيحة أو طلب بأخذ خطوات معينة تساعدك هتحسيه صعب، بس الصغير خليه أصغر، أدنى قدر من الطاقة، بسطي الدنيا على نفسك وامشي خطوات بطيئة جدا وصغيرة جدا لكن مع الوقت من غير ما تحسي هتكون بتكبر وطاقتك بترجع واحدة واحدة. ** بس المهم إنك متضغطيش على نفسك إنك لازم تتحولي للنقيض حالا وتكوني متفاءلة وقادرة تبذلي أي جهد حالا، لأنك كده هتضغي جهد وضغط على نفسك المرهقة والمستنزفة مسبقا. ** اعطي وقت لنفسك متعمليش حاجة، متفكريش في حاجة. لا تشغلي نفسك بتحليل الدنيا والعالم وارمي كل حاجة ورا ظهرك، مجموعك والدنيا اللي عاوزة تدوري لها على معنى. (استكنيصي) زي ما بيتقال... عارفة الشعور ده؟ ** بعد كم يوم اقعدي مع نفسك، قعدة هادئة كده تكوني لسه فايقة من النوم، اعملي قهوة ولا مشروب بتحبيه واقعدي في مكان هادئ (غرفتك أو بلكونة أو حتى لو فيه حديقة عامة قريبة أو مكان قريب من بيتك تنفردي بنفسك فيه) مع ورق وقلم وابدئي اكتبي وفرغي كل أفكارك ومشاعرك على الورق. اكتبي كل اللي مزعلك واللي مخوفك وفضي الدوشة اللي في دماغك، الكتابة تعتبر من الوسائل العلاجية. كمان خصصي نوتة حلوة وأقلام ملونة وسجلي كل يوم على الأقل ٣ حاجات عملتِها حتى لو كانت "فسفوسة" وكمان أي حاجة في حياتك مهما كانت بسيطة لكنها مش عند غيرك أو مكنتيش واخدة بالك منها في ظل العتمة والسلبية اللي مانعاكِ تشوفي أي جزء ممتلئ من كوب حياتك. ***** المجموع مش هو اللي كنتِ محتاجاه عشان تحسي إنك عملتِ إنجاز. صدقيني، الإنجاز ممكن يبقى حاجات بسيطة في يومك، لكن احنا اللي بتأثير من المجتمع والسوشيال ميديا بقينا متخيلين إن الإنجاز والحياة معناها إن نكون عملنا حاجة كبيرة ومدوية. والمجموع مش نهاية العالم، لما تتعافي من اللي أنتِ فيه إن شاء الله وتبدئي من جديد هتكتشفي إن فيه طرق تانية ومعان كتيرة ممكن تعيشيها بس الاكتئاب والخوف هو اللي بيعمينا عنها. ***** مش عارفة هتحسي إن نصائحي تقيلة ولا بعلي عليكِ، لكن عاوزة أقولك إني مريت بمرحلة الاحتراق دي لأسباب معينة وفاهمة يعني إيه طاقة معدومة لكن صدقيني مفرقش معايا غير الاستعانة بربنا ومشي الخطوات الصغيرة جدا، شدتني واحدة واحدة عشان أرجع زي ما كنت، صحيح لسه مش زي الأول خالص لكن أفضل أكيد. الموضوع صعب في الأول لكن مع الوقت إن شاء الله هتسترجعي نفسك وطاقتك. **** وإذا لقيتِ مش قادرة تتجاوزي لوحدك، لا تترددي تستعيني بمختصة تساعدك بخطة عملية ومتابعة... ومش عيب إنك تطلبي المساعدة. المهم ترجعي أفضل، أنتِ تستحقي ده فترفقي بنفسك وإن شاء الله تقدري تتجاوزي أي صعب. ** طولت عليكِ قوي بس أرجو أكون أفدتك ولو بأي شيء، بالتوفيق دايما. 💚💚
تم النشر السبت، ١ أغسطس ٢٠٢٦
أنا آسفة جدًا إنك بتمري بهذا الشعور الثقيل، وأقدر تمامًا مدى الإرهاق اللي بيخلّي كل حاجة تبدو بلا معنى أو طاقة. الاكتئاب والقلق بيأثروا على النظرة للحياة بشكل عميق، وده مش ضعف منك، ده عرض حقيقي بيحتاج تعامل عملي وصبور. ابدئي بخطوات صغيرة جدًا وملموسة عشان ترجعي الطاقة تدريجيًا، مثل تخصيص 10 دقائق يوميًا لنشاط بسيط زي المشي في مكان هادي أو كتابة ثلاث ملاحظات عن أي شيء حدث حتى لو تافه. ده بيساعد الدماغ يعيد بناء الروتين بدون ضغط. كمان، جربي تقنية إعادة صياغة الأفكار: لما يجي الشعور إن "كل حاجة خابت"، اكتبي الحدث الفعلي ثم سؤال "إيه الدليل الملموس على إن ده يعني إني مش مستاهلة؟" وهكذا، عشان تقللي من تأثير التشاؤم خطوة بخطوة. للتعامل مع الخوف المستمر والشعور بعدم الوجود، ركزي على بناء إنجازات صغيرة يومية زي تنظيم غرفة أو تعلم مهارة بسيطة عبر فيديوهات قصيرة، وده بيعيد تدريجيًا الإحساس بالقيمة الذاتية. لو استمر الشعور ده فترة طويلة، ابحثي عن أسئلة مشابهة على فدني عشان تشوفي تجارب أخرى، وتذكري إن تغيير النظرة بيحتاج وقت وممارسة مستمرة. أنتِ مش لوحدك في ده، وكل خطوة صغيرة بتقربك للراحة.
تم النشر الجمعة، ٣١ يوليو ٢٠٢٦
لعرض السؤال في فدني اضغط هنا