السلام عليكم، مشكلتك كلها في أفكارك، أنتِ زرعت أفكار مدمرة في عقلك وصدقتِها لدرجة الإيمان فخلتيها تتجسد في الواقع. أوهمت نفسك بسبب بعض الأحلام، والأحلام المفروض تنسيها بعد ما تصحي ومتحكيهاش ولا تعتمدي عليها في تفسير وتقرير حياتك. عقلك الباطن بيصدق أي أفكار بتقوليها لنفسك، هتفضلي تقولي أنا فاشلة ومش هلحق وأكيد الحلم بيتحقق وكل صحابي سبقوا وخلاص ده قدر وانتهى يبقى أنتِ بنفسك هتوصلي نفسك لده عشان صدقتِه. لسه باقي شهور على الامتحانات، مين قال إن خلاص نتيجتك في الثانوية بقت قدر متحقق؟ هل كشفتِ عن الغيب وشفتِ اللي مكتوب لك؟ ليه بتسبقي الأحداث وبتتوقعي الأسوأ؟ ليه بتشلي نفسك بنفسك؟ ** ظروفك الأسرية صعبة أو حياتك فيها صعوبات أو أيا كان الوضع اللي أنتِ فيه، فيه ناس كتير في ظروف أسوأ ومع ذلك بيعافروا ويبذلوا أقصى ما عندهم فيكونوا عملوا اللي عليهم وربنا مش بيضيع تعب حد. بلاش تستسلمي للظروف ولشوية وساوس سلبية وتحكمي على نفسك بالفشل قبل ما تحاولي. ** ابدئي في تصليح أفكارك، ده الحل الوحيد عشان تنقذي نفسك. اقعدي مع نفسك واكتبي كل فكرة سلبية بتخطر على بالك حاليا وقصادها اكتبي فكرة إيجابية تنفيها وابدئي اغرسي الأفكار الإيجابية في عقلك لحد ما تصدقيها وتنفذيها على أرض الواقع. ** خدي لفة سريعة في التطبيق وشوفي مشاكل الطلاب في الثانوية وهتلاقي إجابات ونصائح هتنفعك بإذن الله. وربنا يوفقك.
@basma pi اللي أعرفه عن الوسواس، تقريبا كل الشيوخ والمختصين اللي قرأت لهم قالوا إن علاجه التجاهل... اعتبري الوسواس ده شخص رخم عمال يزن جنبك وتجاهليه لحد ما هيزهق ويمشي في الآخر.. هتفضلي تتطاوعيه وتسمعي له أو تقاوميه بالقوة هيزيد.. الموضوع صعب أنا عارفة بس جربي وجاهدي عشان نفسك. انسي خالص أهلك دلوقتي... اعتبري إنك لوحدك خالص في الدنيا وأنت الوحيدة اللي بيدك تساعدي نفسك. ملكيش دعوة حاليا مين طايقك ومين كارهك أو بيحاربك، ركزي على إنقاذ نفسك وبس. ونصيحة، واظبي على أذكار الصباح والمساء وردديها بيقين وحسي كل كلمة منها عشان تجيب نتيجة معك، واقرأي سورة البقرة كل يوم حتى لو هتقسميها على أيام المهم تقرأيها بنفسك يوميا وتسمعي رقية شرعية كمان عشان لو فيه أي مشاكل روحية زي عين أو حسد وغيره وكمان ربنا يحفظك ويذهب عنك الوساوس إن شاء الله. امشي شهر كده وإن شاء الله يحصل تحسن، بس أهم حاجة تكوني واثقة في ربنا ومتيقنة إنك هتتحسني بفضله إن شاء الله عشان العلاج يجيب نتيجة. وربنا يوفقك.
تم النشر الأحد، ٢٥ يناير ٢٠٢٦
يادكتورة ماى ازاى احل مشكله الوسواس صعب جدا جدا والموضوع بقى كروه من عيلتى ومش مستحملين حتى نفسى مش قادره استحملها
تم النشر الأحد، ٢٥ يناير ٢٠٢٦
لعرض الإجابة في فدني اضغط هنا