صباح الخير ويارب تكونى بخير.. اعتقد ان مشكلتك في نظرتك لنفسك.. أكبر غلط بتقعي فيه إنك بتقارني نفسك بغيرك أو بتحسي إنك مش كفاية.. الحقيقة إن كل حد عنده مشاكله وتحدياته واولوياته حتى اللي باينين إن حياتهم مثالية.. ركزي على نفسك وعلى رحلتك..مش على اللي ناقصك.. ووقت متعملى كدا هتدركى الى ناقصك.. ولازم تبدأى تغيرى تفكيرك فى نظرتك لحياتك ونص الكباية المليان.. فكرى فى النعم الى فى حياتك.. انتى ينقصك شعور الرضا فى حياتك.. وطول ماهو مش موجود مش هتعرفى تحسى بطعم السعادة.. الوحدة مش معناها إنك فاشلة أو مش محبوبة.. بالعكس ممكن تكون فرصة تكتشفي نفسك أكتر وتبني شخصيتك من غير تأثير من حد.. استغلي الوقت ده في تطوير ذاتك بدل ما تكرهيه.. حبى نفسك والظروف الى حوليكى تعايشي معاها وتعاملى وحسنيها ..نقمك عليها مش هيوصلك لحاجة غير تعب نفسك.. مش لازم كل حاجة تبقى واضحة دلوقتي.. الحياة مش جدول زمني صارم.. ولو دلوقتي حاسة إن كل حاجة متلخبطة ده مش معناه إن ده وضع دائم.. الصبر والتدرج في الحلول هو السر.. خطوة صغيرة النهارده ممكن تغير حياتك بعد سنة.. مافيش عصاية سحرية هتغير حياتك.. ما تستنيش حد ينقذك...انقذي نفسك بنفسك محدش هييجي فجأة يغير حياتك أو يحل مشاكلك التغيير لازم يبدأ منك..اربطى تغيرك بنفسك وبأنك تكونى احسن.. محتاجة اوى تزودى ثقتك ف نفسك. الحياة مش كلها علاقات، لكن علاقتك بنفسك أهم علاقة.. لو كل تركيزك على إنك محتاجة صديق أو شريك.. هتفضلي حاسة بالنقص.. بس لما تبني نفسك الأول..العلاقات هتبدأ تيجي لوحدها من غير ما تدوري عليها.. وعاوز اقلك ان الخوف طبيعي كلنا كدا حرفيا.. لكن ما تسيبيهوش يتحكم فيكي.. كل الناس خايفة بس الفرق إن اللي بينجحوا بيتحركوا رغم خوفهم.. حتى لو مش عارفة الصح من الغلط.. جربي وخدي خطوات.. لأن الوقوف في مكانك مش هيحل أي حاجة.. مافيش عيب في إنك تلجئي لكلام مع حد تثقي فيه أو حتى مختص نفسي لو حسيتي إن القلق والاكتئاب سيطروا عليكي ومش عارفة تتعاملى. . أوقات كتير مجرد الكلام بيريح وبيفتح لك زوايا وافكار جديدة.. واهم حاجة مش شرط كل حاجة تبقى مثالية عشان تبقي سعيدة.. السعادة بتبدأ من الرضا بالحاجات الصغيرة... قال صلى الله عليه وسلم " وارض بما قسم الله لك تكن اغنى الناس"
شكرا جدا
تم النشر السبت، ٥ أبريل ٢٠٢٥
لعرض الإجابة في فدني اضغط هنا