السلام عليكم، إجابتي هتكون طويلة شوية، فأرجو تقرأيها للآخر وإن شاء الله تفيدك. أولا، مش عاوزاكِ تضايقي ولا تزعلي خالص... أنا فاهمة إحساسكِ جدا بس أنتِ المفروض طالما عارفة ربنا ومؤمنة بدينك ومتعلماه كويس مفيش أي كلام يهزك أو يشككك. ** الحوارات دي كلها بتبقى معمولة لإثارة الجدل، كل شوية هتلاقي حوار منها وخناقات على السوشيال ميديا وللأسف الشباب والبنات بيقعوا ضحيتها والفجوة بين الجنسين وكره الزواج وكره الدين نفسه زادت بسببها. ** أي شخص دلوقتي قرأ كتابين في الدين بيفتكر نفسه عالم وبيتجرأ على الكلام في الدين وإثارة الجدل وبيتكلم دون فهم للدين ولا إدراك لفقه الواقع. وبسبب الحوارات اللي ملهاش داعي دي، بنات كتير للأسف ألحدت أو ركنت أحكام الدين على جنب أو حتى انضمت للنسوية المتطرفة. *** حقوق المرأة في الإسلام موضوع كبير جدا وفيه تفاصيل، مينفعش تتلخص ولا تتاخد من جانب واحد، الإسلام مش بيحابي طرف على حساب طرف. ربنا لما أعطى الذكور امتيازات فعشان هدف ومسؤولية مش عشان هم جنس أعلى ولا أفضل مننا. الجنسين لهم حقوق وعليهم واجبات، أي خلل في المنظومة هينتج عنه مشاكل، واللي متمثلة في الواقع اللي عايشينه حاليا. *** بالنسبة لنقطة الضرب، فاهمة تفكيرك ومشاعرك ناحيتها، بس خلينا نفهم الآية أصلا نازلة في مين وتطبيق الآية إيه. الآية مش لكل النساء، دي للمرأة الناشز فقط، والناشز مش كلمة تتقال على أي واحدة تناقش زوجها ولا تقاطعه في كلامه ولا تتجرأ على إنها ترفض له طلب.. زي ما الشباب بيستهبلوا ويطلقوها على أي سلوك من المرأة لا يرضيهم حتى لو كان ضمن حقوقها الشرعية. ** لو جينا نبص على السيرة، فأمهات المؤمنين كانوا بيناقشوا الرسول عادي وبيخاصموه حتى إن السيدة عائشة لما غارت ورمت صحن الطعام وكسرته الرسول قال للصحابة "غارت أمكم" لا عنفّها ولا اتهمها بالنشوز ولا ضربها. الرسول زي ما قالت السيدة عائشة رضي الله عنها (ما ضرب رسول الله صلى الله عليه وسلم خادمًا له ولا امرأة ولا ضرب بيده شيئًا" والرسول المفروض قدوتنا، فمينفعش الرجال دلوقتي يتحججوا بالقوامة عشان يضربوا النساء... والرجل الحقيقي أصلا عمره ما هيمد إيده على أضعف منه. *** لكن للأسف، فيه نوع صعب وسيئ من النساء، سليطة اللسان ولا بتحترم زوجها ولا بتؤدي واجباتها تجاهه وممكن تتطاول وتهينه (خلينا واقعيين ونعترف إن النوعيات دي موجودة فعلا) ربنا قال للزوج يتعامل إزاي في الحالة دي، الأولوية بتبقى الحفاظ على البيت فبيلجأ لثلاث خطوات كإنذار للمرأة، الأول، يوعظها وينبهها لتصرفاتها، منفعش يلجأ للهجر في الفراش، والهجر مقتصر على العلاقة مش هجر الكلام... مجرد الرفض بيؤلم المرأة. وكل مرحلة من دول المفروض لها مدة، الإسلام مقالش اضربها على طول. منفعش كل دول، آخر مرحلة الضرب... ومش المقصود خالص الضرب القصد الإنذار. الرسول حدد إن الضرب المقصود في الآية، لا يسبب ألم ولا يترك أثر ولا يسبب عاهة وممنوع وحرام ضرب الوجه... يبقى إيه اللي فاضل من معنى الضرب؟ السواك خفيف، وضربة خفيفة منه على كفها مجرد إشارة إن ده إنذار أخير بعده هيحصل الطلاق. كأنك ضربتِ بسبابتك على يد طفل صغير وقلتِ له "كخ"... هل أنتِ قاصدة تألميه أو تضربيه أو كده فيه ألم نفسي أو إهانة؟ **** إساءة استخدام الآية أو لوي أحكام الدين عشان تخدمهم، مش غلطة الدين، دي غلطة اللي بيعمل كده وحسابهم في الآخر عند ربنا. ** بالنسبة للميراث، فمين قال إن الذكر بيرث دائما ضعف الأنثى. أحكام الميراث ملهاش دعوة بالجنس، الأحكام محددة بدرجة القرابة. فيه حالات كتير المرأة بترث فيها مثل الرجل وحالات تانية بترث أكبر منه وفيه حالات ممكن المرأة ترث والرجل لا يرث. فلازم ناخد الدين ككل ونفهم قبل ما نصدر أحكامنا. *** ملكيش دعوة بكلام الشباب وتعليقاتهم لأن أغلبهم بيتكلم من وجهة نظر ذكورية سامة، من غير علم ولا فهم، لدرجة إن لو شيخ تكلم في حقوق المرأة ودافع عن حقوقها الشرعية وتكلم بأدلة من القرآن والسنة بيهاجموه ويشتموه في التعليقات. فتجاهليهم خالص وركزي بس إنك تتعلمي دينك وتفهمي كويس حقوقك وواجباتك في الإسلام. *** ممكن أرشح لك تتابعي، د. عابدة المؤيد https://www.facebook.com/abida.alazem/?locale=ar_AR https://www.youtube.com/user/abidaazem وقناة كلمة نور https://www.youtube.com/@kalima.nour.ashqar وإن شاء الله تلاقي في دروسهم اللي يظهر لك الصورة الوسطية بعيدا عن الذكورية والنسوية السامة المنتشرة حاليا. وربنا يوفقك.
آمين وإياكِ يا دارين، سعيدة إني أفدتك.💚 هو للأسف الوضع بقى بشع جدا مؤخرًا، ناس كتير اتفتنت في دينها للأسف بسبب الكلام بدون علم والحوارات الكتير اللي شغالة دي... الأفضل عامة إن الواحد يبعد عن جدالات السوشيال ميديا والحرب اللي دايرة بين الجنسين ويفهم إن في الغالب اللي بيتكلموا ويفتوا هم أصلا مش فاهمين حاجة ولا يعرفوا دينهم أساسا.
تم النشر الاثنين، ٢ فبراير ٢٠٢٦
اه فعلا و مش حاسين أن كلامهم التقيل و تشويهم للإسلام ده هيودى الناس فى سكك صعبة و بعيدة
تم النشر الاثنين، ٢ فبراير ٢٠٢٦
اول مره افهم حكم الضرب جزاكي الله خيرا وعندك حق فعلا السوشيال ميديا الايام دي مينفعش بتاخد منها الدين والكومنتات اغلبها بيكون هبد شخصي من اي حد معدي وخناقات بين الجنسين واخر هبل الصراحة
تم النشر الاثنين، ٢ فبراير ٢٠٢٦
لعرض الإجابة في فدني اضغط هنا