ازاى تستحمل نفسك وتستمر في محاولاتك انك تخليها احسن مع ان رغم كل اللى بتعمله مفيش حد ملاحظ حاجه وانا معنديش مشكله ان مفيش حد لاحظ ولا عاوزه حد يلاحظ بس لسه شايفيينك مش كفايه وفيك عيوب الدنيا والمشكله انهم اهلك .
طب أعاملهم زى مهم بيعاملونى بس كدا هخسرهم وانا اصلا معنديش غيرهم ولا افضل زى منا وانا اللى اتعب كالعاده .
نص احلامى تقريبا بتتلاشى منى بسبب خوفهم الغير مبرر وبسبب تصرفاتهم معايا اللى بتخليني اضيع وقتي في الحزن
انا مش عاوزه احلامى تضيع ولا عاوزه أندم انى ضيعتها اعمل اى
اولا ممكن تكونى محتاجة تبقي مرنه اكتر فى الحلم بتاعك عشان الخطوات اللى بتعمليها دلوقتى فى اتجاه الحلم تناسب الظروف المتاحة مع اهلك. ثانيا ..احتياجك انهم يشوفوا ويلاحظوا اللى بتعمليه ده طبيعى ..مفيش حد مش محتاج ده من اهله ...بس ممكن ميعرفوش يشوفوا الخطوات بس يشوفوا النتيجة النهائية . طول الوقت هيكون فينا مميزات وعيوب ...ايوه غلطهم انهم يحكوا فى العيوب بس وكأن مفيش مميزات ...وهما بيفتكروا ان بالشكل ده بيدونا دفعة للامام وميعرفوش ان كده بيكسروا اولادهم...وده بيحتاج صبر ومعافرة عشان بيكون تحدى صعب ف البيت لو وضحنالهم وهما متغيروش فيه. وطبعا مهما حصل تتعاملى معاهم بالصح وبكل الاحترام واللى ضايقك متعمليش زيه .
تم النشر السبت، ١ يوليو ٢٠٢٣
ممكن جدا يكونوا مش ملاحظين كم الجهد اللي انتي بتعمليه، لان مثلا ممكن يكون يهمهم النتيجة النهائية للموضوع. طيب ازاي تخليهم يخلوا بالهم، اقعدي اتكلمي على الحاجات اللي انتي بتعمليه من انجازات في يومك قدامهم. طيب افرض كانوا واخدين بالهم وعاملين نفسهم مش واخدين؟ يعني ايه الكلام ده .. ي\في بعض الاهالي بتكون طريقة تشجيعهم لأبنائهم شديدة شوية او نقدر نقول انها غير سوية، يعتبروا كل اللي بيعملوه مش كفاية، علشان بس يشجعوهم ويخليهم احسن واحسن، هنا نيتهم بتكون كويسة بس للاسف الفعل بيكون سئ .. سئ جدا. علشان كده حاول هنا تاخ النية وتترك الفعل ده. متركزيش على اللي بيحصل .. لانك لو فضلتي تركزي على اللي بيحصل هترجعي لورا .. وعلشان كده اعملي محاولة معاهم اخيرة ... اتكلمي معاهم بصراحة وقولي لهم ان الكلام ده بيضايقني ، وبيخليني ارجع لورا ديما وبيسبب ليا اثر وحش في حياتي .. اتكلمي معاهم بصراحة وبهدوء .. ولو الكلام مجابش نتيجة يبقى الافضل انك تفضلي مركزة على حياتك، علشانك انتي وعلشان تشوفي نفسك احسن، وابدأي انك تكافئ نفسك من الوقت للتاني ع اي انجاز بتعمليه.
تم النشر السبت، ١ يوليو ٢٠٢٣
طلاما انتي بتجري ورا حاجة مش غلط وانتي حباها وربنا شايفك يبقى لا حلمك ولا تعبك ضايع.. أوقات بتيجي لينا وساوس وأفكار من دي وطبيعي فى رحلتك لتحقيق أهدافك هتلاقي تحديات فى طريقك عشان لما توصلي للهدف ده وتيجي تعملي مراجعة على رحلتك تحسي إنها تستاهل وأهم حاجة استعيني بالله وتوكلي عليه بالنسبة لموضوع الأهل ممكن بسبب إن حلمك غريب وجديد أو مختلف عليهم طبعاً بسبب إختلاف الزمن وانتي جيلك غير جيلهم وإختلاف الإمكانيات وزمان مكانش فى الحاجات اللي موجودة دلوقتي وكلنا عارفين كدة وبسبب كدة بقينا نلاقي ناس ناجحة فى سن صغير فانتي حطي فى دماغهم وخلي الوعي بتاعهم يستوعب إن فى إختلاف أزمنة وأن هدفك مفيهوش حاجة تخوف وأكيد أي حلم وهدف هيبقى فيه صعوبات وحاجات هتقابلك وطلاما انتي شايفة نفسك فى الحاجة دي مكانش ربنا هيزرع جواكي حبك وشغفك ليها لو ملكيش فيها نصيب
تم النشر السبت، ١ يوليو ٢٠٢٣
العفو يا جميلة ♡ موفقة بإذن الله
تم النشر الأحد، ٢ يوليو ٢٠٢٣
انتي لازم تتقبلي اهلك ع وضعهم وتراعي ان زمانهم غير زمانك وجيلهم غير جيلك كلامهم واحكامهم السطحية اللي بيلقوها عليكي متخليهاش تأثر ابدا ع نفسيتك محدش فيهم مر باللي انتي مريتي بيه ولا حد حس باللي انتي حسيتي بيه ولا تستني من حد يحس ولا تستني حد ياخد باله من خطواتك وجهادك مع نفسك في تطوير ذاتك واعرفي انك انتي لوحدك اللي مريتي بكل التجارب دي وانتي لوحدك اللي عارفه قد ايه اتألمتي وقد ايه عافرتي وارهقتي نفسك وقد ايه عانيتي ولا حد هيدرك اي حاجه انتي بس اللي لازم تبقى قويه وتستمري ف محاوله تحقيق حلمك ومتتخليش عنه مهما حصل♡
تم النشر الأحد، ٢ يوليو ٢٠٢٣
العفو أنا معملتش حاجة ومبسوطة إن كلامي فرق معاكي وربنا يسعدك يارب ❤️
تم النشر السبت، ١ يوليو ٢٠٢٣
بجد كلامك ادانى شعور حلو يعنى حسسنى انى بعمل مجهود مش عادى يعنى زى مانا شايفه ويا رب اكمل يا رب وبجد شكرا جدا ربنا يجازيكى خير
تم النشر السبت، ١ يوليو ٢٠٢٣
العفو على ايه؟ وإن شاء الله ليكي نصيب وناس زيك اللي بيطلبوا مساعدة وفى نفس الوقت متمسكين بحلمهم قليلين ونادرين دلوقتي فخليكي زي ما انتي انتي كدة ماشية صح المهم هتستحملي أهلك حبتين بس لحد ما هتلاقيهم اتعودوا خلاص هم بس قلقانين من التغيير
تم النشر السبت، ١ يوليو ٢٠٢٣
شكرا بجد ويا رب كلامك يكون صح ويكون ليا نصيب انى اوصل
تم النشر السبت، ١ يوليو ٢٠٢٣
أنا مش مقتنعة ان الحل هو انك تعامليهم بنفس الطريقة. ده مش هيحل المشكلة وهيخلي العلاقة أسوء. أنا شايفة انك ممكن تحاولي تتكلمي معاهم بهدوء وتشرحيلهم ازاي بتحسي وازاي كلامهم بيأثر عليكي. قوليلهم انك بتحترمي رأيهم بس انتي عاوزة تعيشي حياتك. طالما انتي مش بتعملي حاجة غلط، مفيش سبب يخليهم يشككوا فيكي كده.
تم النشر السبت، ١ يوليو ٢٠٢٣
شكرا جدا لكلامك ويا رب اكون قدها واقدر احققه يا رب شكرا بجد
تم النشر الأحد، ٢ يوليو ٢٠٢٣
خليك مع ربنا ولا تعاملهم بالمثل وركز علي نجاحك
تم النشر السبت، ١ يوليو ٢٠٢٣
اتكلمت معاهم ومش فاهمنى مش حاسه انهم فاهمنى
تم النشر السبت، ١ يوليو ٢٠٢٣
لعرض السؤال في فدني اضغط هنا