ليتني ما حبيت 😩❤️🩹
اتعرفت على شاب من أربع سنين بالصدفة، وكان تعاملنا ما يدلش خالص إننا هنتعلق ببعض التعلق ده، أو أنا خصيصًا. أنا ضد الفعل ده خالص، وقبل ما أكمل كلامي، حراااام وعارفة، وأعوذ بالله من كده.
المهم، الشخص ده صعيدي للأسف 😂 وهو بارد جدًا في مشاعره، وعصبي، ومش مفهوم، وقليل الكلام، وأنا ثرثارة. مش عارفة أنا عايزة إيه منه، بس خلاني كنت تكّة وهتفجر من أسلوبه 😂 كان بيتعامل بغرابة، مرة أقول ده بيحبني، ومرة يقولي: ده إنتِ زي أختي! أخت فعينك، عايزة أقتله 😂😂
المهم، الأربع سنين دول مفضلناش نتكلم كتير، يعني كنت بختفي كتير، واختفائي خلانا نتعلق أكتر.
أنا بحكم حياتي حواليا ناس كتير، بس ده جذبني أكتر. صريح وواضح، وشخصية مظنش إن في منها نسخة تانية، طموح وناجح، ومن حيث الدين فهو توب التوب كمان.
أنا آه اجتماعية، بس استحالة أحكي لحد حاجة عني، فهو قدر يهد الحاجز ده.
أربع سنين متكلمنيش غير مكالمة واحدة صوت، وبسبب صحابي، هما اللي رنوا عليه غصب عني كمان 😂 ميعرفش شكلي، بس قالي: «بصي يا بنت الناس، أنا عايزك في الحلال، فهنبعد لحد ما ربنا يكرمني».
فبعدنا لحد ما ربنا يكرمه. حاليًا بكلم أخته، وأختي عارفة الموضوع، وهو أقسم بالله، أكاد أجزم إن البني آدم ده مش بيتعوض. خاف عليا حتى من نفسه، ومأذانيش، ولا عمل أي حاجة من اللي الذكور بيعملوها. أسلوبه وكلامه بكل احترام، حتى والله حاولت أوقعه كتير بالكلام، بس لأ، كان بيوقفني ويهزقني 😂😂
مشكلتي إني عايزة أكلمه بأي طريقة. بعتله قبل كده عملي بلوك 🙂😭
أنا مش عارفة أكمل حياتي عادي، مش مستوعبة غيابه، مفتقداه أوي. آه، وعدته إننا مش هنتكلم لوقتها، وأنا في ثانوي أصلًا، وهو أولى كلية، بس أنا أجلت السنة أصلًا علشانه، علشان يكون معاه وقت يجهز نفسه.
عارفة إن دي تضحية كبيرة، وبسببها مش عارفة أذاكر دلوقتي زي السنة الأولى، تااايهة ومشتتة، ومش عارفة أسيطر على مشاعري واحتياجي لوجوده. كان معوضني عن الدنيا، كنت مستغنية بيه، مكنتش بكلم حد غيره.
عايزة أركز في حياتي، عايزة أبطل أفكر فيه. هو ساعات كنت بحسه مش بيحبني، هو أول حب ليا وأنا كذلك، وصعب، وكمان مختلف علشان صعيدي، مش زي الشباب اللي حواليا اللي بيقربوا مني. طباعه صعبة، بس حنين جدًااااااا بطريقة هباب وعسللل بطريقة يععع 😂😂
اللي أثبتلي إنه بيحبني إنه حافظ عليا. كان لما أحاول أوقعه وأقوله: ليه مش بتقولي كلام حلو؟ يقولي: «الحلو كله هيتقال لما أشوف عينيكي وتبقي حلالي، متستعجليش، الصبر حلو». 🥺😩😂 كان بيثبتني ابن الإيـه 😂❤️
خايفة منبقاش لبعض، أو علشان هو في كلية تقرب منه أي بنت. خايفة أخسره، وكل يوم بحبه أكتر. احم احم، خلينا في المفيد 😂❤️🩹
**إزاي أتخطى العلاقة دي علشان مش وقتها خالص؟ وإزاي أطلع من السنة دي بمجموع عالي؟**
أنا أزهر، تاني سنة ليا، ودروسي أونلاين، ومراكمة، حالتي حالة. يا ليتني ما حبيت ولا دُقت طعم الحب 😩😩😩
نسيت حاجة: ليه أنا اللي ظاهر عليا التعلق والحب؟ يعني أنا دايمًا بدور عليه، وبعمل أي حاجة علشان أكلمه، لدرجة إني كلمته من تليفون بابا 🙂😂
الصعيدي خبل عقلي 🙂😂❤️🩹
عايزة حل 😭😭😭😭😭❤️🩹
مجنونة يا بوي جننها الصعيدي 😅 الله يهديكي يا بنتي ركزي في دراستك وسيبك منه انتم صغيرين دلوقتي ولسة قدامكم عمر طويل مشاعركم هتتغير كتير وعقلكم هيتغير كتير ركزي على دراستم وحياتك وبس والله ربنا كرمه وتقدم يا أهلا وسهلا والله جا غيره مناسب أهلا وسهلا انشغلي الفراغ وحش وجاهدي نفسك ولو مقدرتيش تواصلي مع أخصائية نفسية
تم النشر الثلاثاء، ٢٠ أكتوبر ٢٠٢٦
قبل إى حاجة عايز احيكلك موقف اتقال في فيلم كده كالاتي: تخيلي إن في بنت في اوضة فيها 10 شباب و كلهم مهتمين بيها و كلهم مستنيين غمزة بس من عيونها او لمحة (حاجة لله ونبي 😅) و هيا مش مدياهم إى اعتبار ولا مهتمة، لحد ما يدخل الشاب رقم 11 و يكون فعلا مش مهتم ولا في باله أصلاً 😃، ولا كأنها موجودة من الأساس، كلامة مش منمق ولا فارق معاه وجودها أصلاً، هنا البنت لازم تنجذب للشاب ده، لأنه "الفعل الشذ"، هو مش قاصد يجذبها ولا هيا قاصدة تعجب بيه لكن إى حاجة خارجة عن العادة دائماً و أبدأ بتشدنا مهما كانت إى هيا. واضح جداً قدامي أنك عارفه كويس ليه مينفعش اللي بيحصل و ليه لازم يقف علشان كده أنتي بتسألي من الأساس، مش هقولك مكنش لازم تعملي كذه و كذه، لأ لأ خالص اللي حصل حصل، و لكن المهم دلوقتي. طيب الحل إى أنا تعلقت بيه جداً، خليني أقولك قصة حد حكهالي، مره واحد قالي يا كمال أنا اتعرفت على بنت من لعبة و فضلت معاها لمدة اسبوع و لكن لو حلفتلك انهااا أنا بس على شكل بنت مش هتصدق لدرجة آني ضعفت قدامها نفسياً و مبقتش قادر اخبي على نفسي حاجة(كان بيقول عليها نفسه علشان هيا فعلا من الصفات اللي قال عليها هيا فعلا كانت هو علشان هو لو كان بنت كان هيبقى زيها)، بعد الأسبوع ده هو قالها اللي بنعمله ده مش صح و كده احنا بنهلك في نفسنا ممكن رقم والدك؟، محبش فكرة انه هيكمل كده حتى و هو عارف كويس أنه مش هيغلط أو مش هيتخطى لحدودة و لو فكر البنت اللي قدامه مش حد غريب ديه هو و هتحرجة جاامد جداً فكان عارف هو رايح على إى فدخلها في الموضوع على طول و الحمدلله قالهالي بنفس مكسورة محصلش نصيب لأن البنت كان عندها شوية مشاكل منعاها تخليه يكلم ابوها علشان يتقدم فهو مقبلش بامر الواقع الصراحة و كلمها مره و اتنين و تلاته و احرجته مره و اتنين و تلاته لحد ما عمل حركة بسيطة مكنش متأكد أصلاً انها هتبعتله بسببها لكن لما بعتتله و حاول معاها تاني نهى الوضع و قالها يا فلانه أنا زهقت و مش هستنى تاني ولا هشيل آمل من آنك في يوم ما هترجعي و بس كده خلص كلامة و حد نقطة للقصة دي و قالي مبقتش افكر فيها زي الأول و أنا هتوكل على الله و هسيبها على الله، يعني ببساطة محبش يدخل في الدوامة الطويلة دي. إى المغزى من القصة دي معلش؟ المغزى هنا مش أني احبطك ولا أقولك أنو غلطان، لأ المغزى هنا إن اللي ليكي هيكون ليكي و لو اجتمع اهل الأرض علشان يغدوه منك و اللي مش ليكي و أنتي عايزاه ليكي لو ملكتي الكون و ما فيه في كف ايدك مش هيبقى ملكك، هيا ديه سنة الحياة و سيدنا النبي قالها لابن عباس " رفعة الأقلام و جفت الصحف" فخلاص كله مكتوب ( و كله خير كبير جداً و أحسن من اختيارنا كمان) طيب و بعدين اللي اقدر اقولك تعمليه دلوقتي هو هو نفس كلام استاذة ألاء ولكن بشياكة شوية، مش هقولك متقطعيش الأمل في إنه ممكن يجيلك لأ هقولك ادعي في صلاتك و كل ما تفتكريه ادعيله بالتوفيق و يسر الحال، و هو لو ليكي يبنت الناس هتشوفيه قاعد مع ولدك و بيقرأ الفاتحة. طيب لو مجاش خير يا بنت الناس الله اعلم مش يمكن لو كنتي كملتي معاه كانت حصلت مصيبة؟ مش يمكن كنتي اضايقتي منه جامد بعدين؟ مش يمكن يطلع اسلوبة مش عجبك بعدين؟ مش يمكن ديه كتيره أوي. طيب اعمل إى دلوقتي؟ بكل بساطة ادخلي امسحي رقمة و امسحي إى حاجة تخليكي تتواصلي معاه نهائي(بالمعنى الحرفي "نهائي")، و ركزي في حياتك و دنيتك و شوفي أمورك و اعرفي إن اللي شاريكي عمره ما هيكلمك على النت و حطي نفسك مكان بنتك و اختاري زي كأنك أم نيابة عن نفسك و هتعرفي قد إى مينفعش نحرق في مشاعر بعض من خلال النت أو العلاقات العاطفية الغير شرعية اللي ملهاش لازمة. و اعرفي إن الوقت مش بيقف لحد كملي للآخر و اللي فيه الخير دائماً و أبدأ هيطرق بابك، و تيقني بالله خير، رب الخير لا يأتي إلا بالخير والله. أخيرا حاولي تخلي التجربة دي تجربها نهائية بحيث أنك متدخليش ولا تتعاملي بأي موقف مشابة نهائي في المستقبل ولا تخلي نفس الأسباب تحصل و خلي دائماً التعامل بحدود مش معنى اننا عارفين أنو حرام و حطين حدود يبقى نعمله خلي بالك اجنا اللي عارفين مصيبتنا اكبر من اللي مش عارفين ﴿قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ ۗ إِنَّمَا يَتَذَكَّرُ أُولُو الْأَلْبَابِ﴾ [سورة الزمر، الآية 9] خلي بالك و ركزي علشان كلنا هنتحاسب لوحدنا محدش هيشيل شيلتك غير نفسك و اعرفي إن سيدنا النبي وصانا بيكوا تلات مرات فاللي مش هيبتغي الحلال كخطوة اوله معاكي مش عارف قيمتك وفقط. هسيبلك صور تحت ممكن تساعدك أو توصلك معلومة جديدة. وبس اتمنى يكون في إفادة...
تم النشر الثلاثاء، ٢٠ أكتوبر ٢٠٢٦
لا عادي اللي عنده حل يناسبني ياريت يقول
تم النشر الثلاثاء، ٢٠ أكتوبر ٢٠٢٦
سؤال معلش أنا شايف حضرتك عامله منشن لأستاذة ألاء هل مستنيه رد تاني من إى حد ولا حضرتك كنتي عايزاها هيا بس؟
تم النشر الثلاثاء، ٢٠ أكتوبر ٢٠٢٦
لعرض السؤال في فدني اضغط هنا