يا بنت الحلال البنت مش هبلة ولا حاجة دي بتتقطع من جواها وشايفة اللي بيحصل وساكتة عشان مش بإيدها حاجة تعملها وصعبانة عليها نفسها وعليكي فنصيحة لوجه الله بطلي تشديها في خناقاتكم وسبيها في حالها وفي مذاكرتها عشان دي اللي هتطلعها وتطلعك من اللي أنتي فيه بكرة لما تنجح وتبقى حاجة كبيرة هتكون هي سندك الحقيقي اللي يخليكي تمشي وانتي رافعة راسك وماتخافيش عليها هي واعية وعارفة كل حاجة بس بتهرب من الوجع بالكتاب فاحتويها بكلمة حلوة وطبطبي عليها بدل ما تكسري بخاطرها هي كمان كفاية اللي هي شيفاه بعنيها ومستحملاه في سرها واحميها من المشاكل عشان ماتطلعش كارهة الدنيا والناس وخليكي انتي الحضن اللي يطمنها مش اللي يزود همها وضغطها وربنا يعينك ويصلحلك حالك وحال بنتك والخيانة وجعها كبير ومحدش يقدر يلومك على زعلك بس المواجهة مع راجل بايع ومستبيح مش هتجيب غير حرق دمك وتصغيرك قدام نفسك لازم تعمليها إنك تتغافلي مش عشان هو يستاهل لكن عشان تشتري نفسك وراحتك بلاش تدوري وراه وبلاش تواجهيه طالما النتيجة واحدة ركزي كل طاقتك في بنتك اللي في ثانوية دي وفي بناتك الصغيرين وحاولي تشوفي أي باب رزق أو شغل أو قرش يتشال للزمن عشان تأمني نفسك مادياً لأن الراجل اللي ملوش غالي ومبيصونش العشرة ميتأمنش ومحدش عارف بكرة فيه إيه بطلي تعيشي دور الضحية وابدأي عيشي دور الأم اللي بتأمن مستقبل لعيالها بعيد عن قرفه وبرود مشاعره ومتقوليش هسيب بناتي لمين بناتي أهم ليكي وإنتي قوية وسند ليهم طول ما إنتي هادية وعارفة بتعملي إيه مش وانتي منهارة وبتتخانقي في خناقة خسرانة مع واحد مبيحسش ربنا يقويكي ويبرد قلبك ويسخرلك اللي فيه الخير ليكي ولبناتك
يا ست الكل لازم وتفوقي لنفسك ولبيتك قبل ما الوقت يسرقك بنتك الكبيرة دي مش على نيتها ولا شخصيتها غريبة بنتك دي بتتحرق من جواها وبتمثل الثبات عشان المركب ماتغرقش انتي بتقولي إنها قوية وأقوى منك بس الحقيقة إنك حملتيها فوق طاقتها لما دخلتيها في قرف خيانات أبوها وشهدتيها على كسر جنيحك إنتي كدا بتدبحي طفولتها وبتحوليها لأم ليكي وده غلط كبير في حقها بنتك هادية عشان بتخزن الوجع وجواها غضب مكتوم ممكن ينفجر في أي لحظة أو يخليها تكره صنف الرجالة كلهم والاصغر منها اللي بقت عنيفة وعدوانية دي نتاج طبيعي للبيت اللي كله خناق ووجع هي بتعبر عن غضبها بالضرب والأخت الكبيرة بتهرب بالحنية على الصغيرة عشان تعوضها عن الحضن اللي مفقود في البيت يا غالية لازم تفصلي بنتك الكبيرة عن مشاكل أبوها وبطلي تحكي لها تفاصيل خيانته إنتي كدا بتلوسبي براءتها وبتهدي صورتك وصورة أبوها في نظرها حتى لو هو وحش هي محتاجة تركز في مستقبلها ومذاكرتها وبس بنتك مش قوية هي بس مضطرة تكون كدا عشان لقتك ضعيفة حاولي إنتي تكوني السند ومصدر الأمان مش هي اللي تشيل همك وهم خيانات جوزك لمي عيالك في حضنك وبطلي تقسي على الكبيرة عشان هي الحيطة المايلة اللي بتسندي عليها وبطلي تدخليها في معارك خسرانة مع أبوها عشان ما تخسرش نفسها قبل ما تخسرك خليكي إنتي القوية زي ما هي بتقولك بس بقوتك في حماية بنتك مش في شيلها همومك وربنا يهديلك حالك ويحفظلك بناتك ويصلح ما بينكم .. وكلمه ليكي بصي يا بنت الحلال انتي مستحملة اللي يهد جبال ومفيش بشر يقدر يلومك على تعبك ووجع قلبك ده إنتي ست أصيلة وشيلتي مع جوزك في الفقر قبل الغنى وصبرتي ونلتي وده دليل أن معدنك وماتخليش تصرفاته اللي متوصفش غير بقلة الأصل تهز ثقتك في نفسك أو تحسسك إنك قصرتي إنتي مكفية وموفية وبناتك دول وهما اللي هيعوضوكي عن كل دمعة نزلت من عينك إنتي محتاجة بس تطبطبي على نفسك الأول وتسامحيها وتعرفي إنك عملتي اللي عليكي وزيادة وماتشيليهمش هم إنتي مش قده وريحي قلبك واستودعي حياتك عند اللي عينه مش بتنام وقولي يارب وبإذن الله ربنا هيجبر بخاطرك جبر يتعجب له أهل الأرض والسما وعيالك دول هيبقوا سندك وضهرك اللي بجد وربنا هيردلك حقك تالت ومتلت عشان إنتي نيتك صافية وعايزة تفتحي بيت وتستري بناتك خليكي واثقة إن ربنا معاكي ومش هيسيبك أبدا يا ست الكل وطول ما إنتي فيكي نفس وبناتك حواليكي الدنيا لسه بخير وربنا هيفتحها في وشك من وسع يارب
تم النشر السبت، ٢ مايو ٢٠٢٦
الحقيقة معرفش بس بنتي الكبيرة هاديه جدا وطيبة جدا وفحالها وعلى نيتها زي ما بنقول وكمان بحس انها مش بتحبني اغلب الاوقات انا مبعرفش احتوي اولادي بصراحة وسلوكهم محتاج تعديل كلي وخاصة الواسطانيه لانها عنيفه جدا وعدوانيه عكس الكبيرة الي ديما بتعامل اختها الصغيرة خالص بحنيه لدرجت بنتي الصغيرة بتحبها اكتر مني ودي حاجة مش مزعلاني خالص بالعكس بسطاني انها بتحب اختها جدا الصغير انما هي شخصيتها غريبة جدا هي أصلا شخصيتها قوية جدا وبصراحة أنا ديما بدخلها فكل المشاكل وهي بتدافع رغم انها بيقع عليها اذى نفسي وجسدي الي انها قوية جدا بنتي أقوى مني بمراحل ديما بتقولي يا ماما انتي ضعيفه خليكي قوية وبرضو ديما كنت بشهدها على خيانات ابوها لكنها طول الوقت مكنتش بتعرف تتصرف فموضوع الخيانه ده غير انها تقولي ربنا يهديه وتسكت عكس باقي الواقف كانت بتدافع عني مع اني ظالمة بنتي دي جدا وباجي عليها كتير
تم النشر السبت، ٢ مايو ٢٠٢٦
لعرض الإجابة في فدني اضغط هنا