ماذا أفعل مع خيانة زوجي؟

Question

سلام عليكم عندي 36 سنة ومتزوجة من وانا عندي 13 سنة وللاسف انا مش متعلمة و معايا 3 بنات الكبيرة 17 سنة وقعدت فترة صعبة اوي مع جوزي واستحملته وكانت حايتنا في قمة الفقر ومكنش معانا اطفال لحد ما ربنا رزقنا ببنتي الكبيرة بعد 5 سنين جواز ومع الوقت ربنا فتحها علينا وامورنا المادية بقت كويسه لكن بعدها جوزي بدأ يخوني وبدأت امسكه كتير جدا واواجه لدرجة أنه بيخوني قدامي عادي جدا ويقولي مش عاجبك اطلقي وقمة في الوجع والحزن مش بيقولي كلمة حلوة ولا بيجبر بخاطري ولا أي حاجة ديما بيهني قدام عيالي وبنتي الكبيرة عارفه خيانة ابوها وعاملة نفسها عبيطة وهي بتركز فمذاكرتها بس وديما بتحب تنعزل عننا بس انا وابوها كنا بنتخانق فيها ونبهدلها لحد ما تقعد معانا وانا مش عارفة اعمل اي فخيانة والمشكلة اني مش عايزة اطلق هسيب بناتي لمين بس تعبت من خيانته ومش قادرة استحمل اعمل اي ياريت حد يفدني

Accepted Answer

يا بنت الحلال البنت مش هبلة ولا حاجة دي بتتقطع من جواها وشايفة اللي بيحصل وساكتة عشان مش بإيدها حاجة تعملها وصعبانة عليها نفسها وعليكي فنصيحة لوجه الله بطلي تشديها في خناقاتكم وسبيها في حالها وفي مذاكرتها عشان دي اللي هتطلعها وتطلعك من اللي أنتي فيه بكرة لما تنجح وتبقى حاجة كبيرة هتكون هي سندك الحقيقي اللي يخليكي تمشي وانتي رافعة راسك وماتخافيش عليها هي واعية وعارفة كل حاجة بس بتهرب من الوجع بالكتاب فاحتويها بكلمة حلوة وطبطبي عليها بدل ما تكسري بخاطرها هي كمان كفاية اللي هي شيفاه بعنيها ومستحملاه في سرها واحميها من المشاكل عشان ماتطلعش كارهة الدنيا والناس وخليكي انتي الحضن اللي يطمنها مش اللي يزود همها وضغطها وربنا يعينك ويصلحلك حالك وحال بنتك والخيانة وجعها كبير ومحدش يقدر يلومك على زعلك بس المواجهة مع راجل بايع ومستبيح مش هتجيب غير حرق دمك وتصغيرك قدام نفسك لازم تعمليها إنك تتغافلي مش عشان هو يستاهل لكن عشان تشتري نفسك وراحتك بلاش تدوري وراه وبلاش تواجهيه طالما النتيجة واحدة ركزي كل طاقتك في بنتك اللي في ثانوية دي وفي بناتك الصغيرين وحاولي تشوفي أي باب رزق أو شغل أو قرش يتشال للزمن عشان تأمني نفسك مادياً لأن الراجل اللي ملوش غالي ومبيصونش العشرة ميتأمنش ومحدش عارف بكرة فيه إيه بطلي تعيشي دور الضحية وابدأي عيشي دور الأم اللي بتأمن مستقبل لعيالها بعيد عن قرفه وبرود مشاعره ومتقوليش هسيب بناتي لمين بناتي أهم ليكي وإنتي قوية وسند ليهم طول ما إنتي هادية وعارفة بتعملي إيه مش وانتي منهارة وبتتخانقي في خناقة خسرانة مع واحد مبيحسش ربنا يقويكي ويبرد قلبك ويسخرلك اللي فيه الخير ليكي ولبناتك

Answer

طب ما تهتمي ب نفسك اكتر ولما يشوفك اتغيرتي ممكن يتغير ولو متغيرش دخلي حد كبير علشان كله إلا الكرامه وعزه النفس وهو طول ما هو شايفك ساكته وراضيه ولا حول ليكي ولا قوه هيتمادي في الي هو بيعمله لو لقاكي واخده موقف جامد هو ممكن يتراجع اصلا لأن طول ما هو شيفك خايفه من الطلاق وخايفه أنه يبعد ويسبك فهو كده عارف نقطه ضعفك فهيقول هي هتفضل ساكته فاعمل الي انا عاوزه بقا لما يحس أن الدنيا هتبوظ منه وهيخسرك ممكن يتراجع وربنا يصلح لك حالك يارب

Answer

ربنا يبارك في عمرك ويهدي زوجك وسبحان الله الحياة لما كانت ضيقة معاكم كان هو كويس ودا بيأكد قول الحديث القدسي فيما معناه * أن من عبادي ما يصلحه إلا الفقر ولو اغتنى لفسد حاله * طبعآ هو في اختبار من ربنا ولو لم يستقم ويتقي الله هتسلب منه نعم الله بعد ضيق وطول انتظار وعلشان كده لازم وضروري انك لا تيأسي من النصح والتذكير بتقوى الله وإن لم يستجب فمن المهم تدخل احد المقربين منكم سواء عم او خال او تي شخص ويفضل ان يكون من اهله هو ويكون له كلمه عليه بحيث ان يعينه على صلاح حاله وان يتقي الله في حرمات الله وما لا يرضاه لأهل بيته لابد والا يرضاه للاخرين وتلك السلوكيات عليه ان يبتعد عنها جتى لا يخرب بيته واولاده خصوصآ ان لديه بنت واصبحت عروسة ويارب يحفظها هي واخواتها لكن تفكيرك في الطلاق مش حل لانه بتلك الخطوة هتكون فرصة له لممارسة انحرافه بدون رقابة او حساب وعليكي بالمحاولة وعدم اليأس في نصحه وتدخل احد الحكماء بينكم وكذلك لو لم يستقم فمن الممكن ان يستعين بمرشد اسري لمعاونته على اصلاح سلوكه والحفاظ على بيته ويارب يهديه ويصلح حاله ويعينك بالصبر ويحفظ اولادك

ماذا أفعل مع خيانة زوجي؟

نفسية

اجتماعية

زواج

سؤال من احد أعضاء فدني

تم النشر السبت، ٢ مايو ٢٠٢٦

4 إجابة

4 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك