اتخطبنا 3 سنين مشفتوش غير قبل الفرح بشهر وده بسبب انه كان مسافر..
قبل الخطوبه كنت رفضاه بس بضغط اهلي عليا اتخطبتله..
فترة الخطوبة كنت كل شويه اعيط لأمي واقولها اني مش عايزاه واقول لأختي الكبيره اللي هي اصلا سبب خطوبتي..
هو انسان كويس ومحترم ومسؤول بس المشكله ان انا مش عايزاه اوقات بحس فهمه على قده وكمان هو صعيدي فساعات دماغة بتقفل على حاجات انا شايفاها عاديه ومش بحب اسلوبه فالكلام ولا ضحكه وهزاره مش متقبلاه نهائي بس مع ذلك خضعت لكلام أهلي استني اما ينزل يمكن مشاعرك تتغير لما تقعدي معاه وبعد 3 سنين عاشهم معايا فجفاف عاطفي حرفيا مبقولش ليه اي كلمه مهما طلب او اشتكى لأختي انا ثابته على مبدأي واني مش هقول كلام يعلقه بيا طالما انا مش حساه نزب وانا مازلت زي منا بس كل اخواتي قالوا طالما عاجبنا كلنا يبقى انتي رأيك غلط وهتتجوزيه يعني هتتجوزيه فأنا جمدت قلبي ولاول مره صارحته قبل كتب الكتاب بإسبوع وفتحت معاه الموضوع تاني قبل كتب الكتاب بيومين وبعد كتب الكتاب قبل ما يمضي على القايمه قلتله انا حزينه كله ماشي برغبته ومحدش مراعي مشاعري هو كل ردوده كانت "والله متخافي مني مش هعمل حاجه غصب عنك ومع الوقت هتحبيني" وكلام زي كدا المهم اتجوزنا وانا من اول يوم جواز وانا بستسمحه يسيبني وميقربش مني وانا واحده واحده نفسيتي هتتحسن بس هو لحوح ومكنش بيسيبني بسهوله غير بعد محايله وخوف وانا اصلا مقضياها عياط واحساس بالخذلان من أهلي واحساس بالندم اني كنت محترمه مشاعرهم ومراعيه الفضيحه اللي كانت ممكن تحصل لو فشكلت الخطوبة بعد 3 سنين او اتطلقت بعد كتب الكتاب..
المهم تالت يوم ودوني لدكتور نفسي وبدل ميسمعني كهربني وانا مروحه كان كل تفكيري اني ههرب منهم عشان مرحش للكهربه دي تاني بس هديت مع الوقت ولغيت فكرة الهروب دي.. جابولي اكتر من شيخ ومع ذلك انا مش بخليه يقربلي بل كرهي ليه زاد مع انه صعبان عليا بس مش عارفه اراضيه واسيبله نفسي فقلتله يطلقني رفض قلتله خد دهبي وجهازي واتجوز واحده تانيه ومتطلقنيش بس متجيش جنبي رفض برضه كان بيقولي اخد حقي الأول وبعدين نشوف... الموضوع صعب وانا مش قادرة استحمله سادس يوم الفرح جه ياخدني بالعنف كان بيكتم نفسي بإيده وبيشد هدومي عشان يقطعها بس ربنا سترها معايا جاتلي حالة تشنجات فإيدي ووشي وبؤي اتعوج ورحت المستشفى واخواتي جم والدكتوره قالت بلاش ضغط نفسي عليها..
بعد اسبوع كمان وقت صلاة العشا دخل الاوضه اللي بنام فيها وقفل الباب ومصمم انه هياخد حقه دلوقتي فضلت اعيط وهو يخوفني ويهددني بالكلام هكتم نفسك وهعمل اللي انا عايزه برضه الشمس طلعت وهو قاعدلي نفس القاعده وانا من كتر العياط دموعي نشفت وحاولت معاه بكل الطرق انه يسيبني وهو مرضيش لحد ما بدأ يكتم فنفسي ويشد فهدومي وبرضه ربنا سترها معايا بس بعد منا استسلمت خلاص واعصابي باظت وقولت خلاص كدا كل حاجه راحت بس سبحان الله ربنا ما أرادش انه يعملي حاجه..
عرفت اروح لأهلي وأهلي اتعاطفوا معايا فالأول بس عشان هو كان ضاغط على بؤي وعلى وشي فكان فيه جلطات فوشي وشفايفي وارمه وبؤي من جوه مهري بسبب سناني وجسمي فيه كدمات كتيره بسبب ضغطه عليا بإيده ورجله..
بابا عايز يطلقني واخواتي بيقولوا هتبقى فضيحه وهنمشي وسط الناس حاطين راسنا فالأرض وكل اخواتي مغلطني وان شطاني كبير وان انا بحاول اخلي بابا يتعاطف معايا عشان يبقى فصفي وان اللي بعمله دا غلط ومش فمصلحتي..
طولت اوي فالكتابه بس انا عايزه اعرف اتعامل ازاي واعمل اي اثبت على موقفي عشان نفسيتي وحياتي الزوجيه اللي مش هتكون حياه صحيه ولا أراضي اخواتي واراضي جوزي اللي انا ظلماه دا واجي على نفسي واعيش عيشه انا مش قادره اتخيل حتى نفسي وانا عايشاها..
أهلك غلطوا أنهم زوجوك بالإكراه وزوجك غلط أنه تزوجك وهو يعرف أنك كارهة ومُكرهة وأنت غلطت أنك أكملت في موضوع الزواج ثم بعد ذلك منعت زوجك حقه الشرعي منك ليس أمامك حل إلا ما يلي أن تطلبي الخلع من زوجك عن طريق القضاء وتردي إليه كل ما أنفق أو أن تظلي في عصمة زوجك وتؤدي إليه حقه الشرعي منك وتعطي نفسك مهلة لمحاولة التأقلم معه - ولعل العلاقة الحميمة تذيب هذا الحاجز النفسي الكبير بينك وبينه
تم النشر الأحد، ٨ أكتوبر ٢٠٢٣
اوعي تتنازلي عن حقك، انتي اتنازلتي عنه في الاول لما اتجوزتي غصب عنك، والله اعلم اساسا جوازك منه باطل اساسا ولا لا. طالما اتجوزتي غصب. متتنازليش عن حقك ابدا. وموضوع الطلاق .. مالها لما كنتي انفصلتي عنه ايام الخطوبة مكانتش هتبقى فضيحة ولا حتى بعد كتب الكتاب، الموضوع بيحصل وبيختلفوا حتى قبل الفرح بساعة. وكل واحد بيروح لحاله. وشوفي هو بيقولك ايه بعد قولتي ليه خد الدهب وخد كل حاجه وسيبني، قالك (اخد حقي الاول)!!! ركزي في رده، يعني هو مش هامه غير انه بس ياخد اللي عاوزه منك، وبالغصب كمان! انتي متخيلة حجم المصيبة! اوعي تتنازلي عن حق من حقوقك، لانك هتندمي بعدين. الحقي الدنيا من اولها دلوقت.
تم النشر الأحد، ٨ أكتوبر ٢٠٢٣
لا حول ولا قوة الا بالله قال تعالي "ولا تلقوا بأيديكم الي التهلكة" روحي مشيخة الأزهر او تواصلي معاهم واحكي التفاصيل بالدليل ولو روحتي خلي والدك معاكي هما هيقولولك الحكم الشرعي لده ووالدك هيسمع منهم ويقتنع متتنازليش عن حقك ودعميه بالدليل ومن جهة موثقة
تم النشر الأحد، ٨ أكتوبر ٢٠٢٣
اثبتى على نوقفك وانهى العلاقة دى اصلا واطلقى وخلى بالك من نفسك ربنا يسترهازعاليكى يارب
تم النشر الأربعاء، ١١ أكتوبر ٢٠٢٣
مشكله نك مخدتيش وقتك معاه في فتره خطوبة ربنا ييسرلك امورك باذن الله
تم النشر الأربعاء، ١١ أكتوبر ٢٠٢٣
انا اتذكر مشكلتك واتمنى ان تتذكرى نصيحتى لكى حتى خارج التطبيق عندما تحدثنا القرار قرارك ...لا يمكنك لوم احدهم الا نفسك ...اعطاكى الله الحق فى قول لا ...حتى وان كان بالهروب الذى تطرحينه الان ...كان متاحا قبل قبول الزواج . بالغه وعاقله وعليكى مثل ما لكى . اتفهم احساسك ( واعرف السبب الحقيقى فى النفور ) ولكن علينا الان التعامل بما يرضى الله فى ما قررتى وحصدتى . لن اتحدث عن ماذا كان يجب ان يفعل الاخرين كى يكون الوضع افضل من الوضع الحالى . ساحدثك بما يرضى الله وما هو متاح قال تعالى ( وعسى ان تكرهوا شيئا وهو خير لكم ) مدى كرهك لما وصل اليه الامر وزواجك من هذا الشخص ..يمكنه ان يكون عين الخير لكى فقط تحصلين على الخير عندما تؤمنى بمضمون الايه حقا وتكون ثقتك فى تدابير الرحمن اقوى من احساسك وشعورك . انتى سنك صغير ومتخبطة كثيرا وينقصك الكثير من المعلومات و التأهيل لتفاصيل الزواج محتاجة بس حد كبير يفيدك واحده واحده محتاجين كمان نقرب من ربنا بقى ...التزمى بفروض يومك ...ومن فروضك دلوقتى انك تعاملى الزوج ده بالود والاحسان ..( حتى اشعار اخر ) لحد ما نشوف هنوصل لايه. ولو حتى حصل اى فعل يأذيكى الجأى لربنا وهو كفيل يهدى من امر زوجك حتى تتبينوا الحل الافضل . الحل النهائى واللى فيه الحق ...قاله الاستاذ جاد اى كان السبب لو قررتى تتراجعى عن الزواج ( هترجعيله كل حاجة ) وتختلعى ...وده مش بالضرورة يكون بالمحكمة يعنى ...بالاتفاق بردوا وترديله حقوقه. ومع اى قرار هفكرك انك مجبره تتحملى تبعاته زى اللى حاصل حاليا هو تبعات قرارك ومجبره تتحملى كل اللى بيحصل للاسف حتى وان كان قاسيا. احنا معاكى وياريت تبدأى ونقرأ شوية حاجات ونحطلك شوية فيديوهات تعرفى بيها حاجات اساسية عشان تكونى اكثر وعيا اى كان قرارك التالى. اول ما تقولى جاهزه هحطلك اللينكات ونتابع سوا .ان شاء الله
تم النشر الاثنين، ٩ أكتوبر ٢٠٢٣
لعرض السؤال في فدني اضغط هنا