السلام عليكم، أنا متفهمة رغبتك في المحافظة على بيتك وزوجك وإن شاء الله ربنا يوفقك. عندي بس نصيحة صغيرة أرجو إنك تعملي بها، قبل ما تقرري تغيري روتينك ونفسك عشان زوجك لازم يكون التغيير ده لنفسك أنتِ في المقام الأول، التغيير أصلا بيحتاج وقت وجهد فلازم أنتِ تكوني حابة تعملي ده لنفسك وتشوفي أثره عليكِ قبل ما يكون عشان حد تاني مهما كان الشخص ده عزيز عندك. فيه أزواج للأسف بيتعاملوا بسلبية مع محاولات زوجاتهم للتغيير وتحسين حياتهم وممكن هم أصلا يكونوا زهدوا في زوجاته والحياة معهم فلما الزوجة تحاول تنقذ الزواج وتغير من نفسها محاولاتها بتتقابل بالسخرية والانتقاص. والنتيجة إيه؟ بيصيبها الإحباط وبتفقد ثقتها بنفسها وبتتوقف تمامًا عن المحاولة. مش بقول إن زوجك ممكن يكون منهم لكن تحسبًا لازم التغيير يكون نابع من رغبتك أنتِ تكوني أفضل نسخة من نفسك عشان مهما كان رد فعل اللي حوالكِ محبِط أو ساخر فأنتِ هتفضلي مكملة لحد ما تحققي الصورة اللي عاوزة تشوفي نفسك فيها. *** وأصلا كل ما يكون تركيزك على نفسك ولك كيانك واهتماماتك الشخصية كل ما الطرف المقابل هيهتم بك وينتبه لوجودك، أما لو تركيزك كله عليه واهتمامك منصب طول الوقت على الحصول على انتباهه ورضاه عنه ده للأسف من تجارب ناس كتير بيجيب نتيجة عكسية للأسف. ** فيه قنوات كتير على يوتيوب إزاي تهتمي بنفسك وبيتك ممكن تتابعيهم وتطبقي نصائحهم وبإذن الله تساعدك على التغيير للأفضل ممكن أرشح لك مثلا: https://www.youtube.com/@OsloobModern https://www.youtube.com/@salmarashwan بالتوفيق.
لعرض الإجابة في فدني اضغط هنا