السلام عليكم، هو الموضوع مش بضغطة زر وأكيد مشاعرك هتحتاج وقت على ما تقدر تتجاوزها إن شاء الله، المهم أنت نفسك من جوا متحبسش نفسك في فكرة الحب الوحيد وهي دي ومش هقدر أنساها، عقلك الباطن بيصدق الأفكار اللي بتكررها عليه وترددها جوا نفسك فلازم تكون واعي للواقع وللأفكار اللي بتغرسها جواك. هنركن على جنب إن العلاقة غير الرسمية هي شرعا حرام ومينفعش الارتباط اللي فات، لكن بما إنه انتهى فخلينا في الأمر الواقع. هل أنت كلمتها ونصحتها في الحاجات اللي ضايقتك منها؟ (وفرق بين النصيحة والتحكم، اللي هو أنا الرجل فلازم تعملي اللي بقول عليه وتسمعي كلامي وتكوني زي ما أنا عاوزك) لو نصحت من غير تحكمات وهي فضلت متمسكة باللي بتعمله ورافضة نصحك ومستمرة في الانحدار أكتر في طريق غلط فبلاش تتعب نفسك زيادة واعترف إنكم مش مناسبين لبعض وهتتعب معها جامد لو قررت ترجع وتكمل، حتى لو قالت لك هتتغير فالحقيقة محدش بيتغير عشان خاطر حد حتى لو حصل ده فبيبقى تغيير مؤقت وهينتهي في وقت ما وترجع ريما لعادتها القديمة، التغيير لازم يبقى نابع من جوا الشخص ورغبته هو إنه يتغير لنفسه ويكون شخصية أفضل. *** أبعد تماما واعمل بلوك وتألم شوية دلوقتي أحسن من التألم أضعاف مضاعفة بعدين، ومتقاومش التفكير والحنين عشان المقاومة بتزودهم. تعامل بطبيعية وتفهم وضعك الحالي ومشاعرك وإنك هتاخد شوية وقت لحد ما تتجاوز وتبقى مجرد ذكرى في حياتك. انشغل في دراستك وحياتك ومع الوقت تلقائيا الأفكار هتقل وهتتخطى كل ده إن شاء الله. ونصيحة، بلاش علاقات من النوع ده تاني، ركز على مستقبلك وتكوين ذاتك ووقت النصيب هتقدر تختار الشريكة الصح إن شاء الله. بالتوفيق.
العفو، ربنا يوففك وبإذن الله تتخطى كل ده بأسرع وقت.🌺
تم النشر الثلاثاء، ٣ نوفمبر ٢٠٢٦
طب الحمدلله 😂 عموماً شكراً علي النصيحة و برضو هحاول اني مفكرش في الموضوع زي ما بعمل و إن شاء الله الموضوع يتنسي
تم النشر الثلاثاء، ٣ نوفمبر ٢٠٢٦
انا فاهمة😅.. مأخدتش الكلمة بالمعنى السلبي، متقلقش.
تم النشر الثلاثاء، ٣ نوفمبر ٢٠٢٦
هو ستوكر هنا بمعني اني بتابع اخبارها و كده
تم النشر الثلاثاء، ٣ نوفمبر ٢٠٢٦
بص ساعات في عقلنا الواعي بنكون مقتنعين بحاجة لكن العقل الواعي متشبث بشعور وأفكار تانية مغروسة فيه، فتلاقينا مش عارفين فعليا نتجاوز وضع معين أو ننجح في شيء عاوزينه بسبب القناعات المسيطرة على عقلنا الباطن. ممكن يكون ده السبب معك وممكن عشان أنت دخلت في نوع من التعلق المرضي (على حسب كلامك فوق قلت إنك بقيت ستوكر) فده تقريبا سببه تعلقك بها حتى لو كنت شايف قد إيه سيئة ومتنفعش، لو مش عارف تفك التعلق أو تتخطى لوحدك ممكن تكون محتاج مختص نفسي، ودي حاجة عادية. إذا الموضوع فعلا تاعبك وزهقت منه ومؤثر على حياتك بالسلب يبقى لازم مختص يتابع معك بخطة عملية وإن شاء الله تقدر تتعافى بأسرع وقت. المهم بجد بلاش تيأس أو تحول موضوع النسيان لهوس أو مشكلة معقدة لأن ده فعلا هيخليه مشكلة معقدة ويصعب تحررك منها.
تم النشر الثلاثاء، ٣ نوفمبر ٢٠٢٦
انا بجد مش بحاول اتناسى و طول الفترة دي بتعامل مع الوضع أنه حاجة عادية و فاكس لأن كده كده ولا هي هترجع زي ما كانت ولا انا هتقبل بس كل الفترة الموضوع بيرجع في دماغي وقتها بحاول اعمل اي حاجة علشان اسكيب بس مفيش حل برضو ف زهقت من الموضوع لاني ولا عارف انساها و لا هقبل ارجعلها
تم النشر الثلاثاء، ٣ نوفمبر ٢٠٢٦
مش عارف تنسى عشان بتقاوم وتحاول تجبر نفسك على التخطي... عقلك لو طلبت منه ميفكرش في حاجة معينة تلقائيا هيفكر فيها، فبلاش تركز طول الوقت إن لازم أنسى دلوقتي ولازم أتخطاها، تفهم إن عادي الموضوع ياخد وقت مهما طول، متخليش ده عقبة إنك تمارس حياتك بطبيعية وتعطل نفسك بنفسك، تعامل مع مشاعر الحزن والألم وتقبل إن عادي تحس بهم لكن مع ذلك أنت مستمر ومتأقلم لحد ما الزمن هيداويهم إن شاء الله. اللي أعرفه إن البنت بتتألم (عاطفيا وجسديا) وقت الانفصال ومع الوقت بتمر بمراحل (الإنكار والغضب ثم التقبل) لحد ما تنسى وتوصل للتعافي بينما الشاب العكس، ممكن ميفرقش معه في البداية او يحس بنوع من التحرر والهدوء او ينشغل عن الصدمة لاشعوريا لكن مع الوقت بيبدأ الألم الحقيقي للفراق يظهر لما يبدأ يستوعب الفراغ وغيابها ويبدأ الحنين يسيطر عليه. (ممكن تبحث وتتأكد من الموضوع ده)، غير إن النساء عندهم طرق تفريغ للمشاعر والحصول على الدعم العاطفي من اللي حولها والرجال مش بيميلوا للبوح وبيكبتوا مشاعرهم، فعشان كده ممكن الموضوع ياخد وقت أطول معهم. فحاول تتفهم إن وضعك مرحلة طبيعية وهتاخد وقتها مهما طول وهتتجاوز بإذن الله، المهم إنك متسمحش للمشاعر تؤثر على روتينك وحياتك ومستقبلك.
تم النشر الثلاثاء، ٣ نوفمبر ٢٠٢٦
شكراً، الفكرة أن انا فاهم أن ده غلط و مش كويس و مستوعب برضو انه خلاص و أن محدش فينا بقا في طريق التاني و كل واحد مننا بقا في طريق مختلف بس المشكلة أني بجد مش عارف انسي و بجد طول السنة دي انا بحاول اعتبر الموضوع مكانش موجود بس مش قادر اتخطي، الطبيعي أن الشخص بيتأثر اول ما العلاقة تنتهي و بعدين بيتعود أو بينسي ، انا في الأول كان الموضوع بالنسبة ليا مش مهم بس بدأت اتأثر و احن بعد كده
تم النشر الثلاثاء، ٣ نوفمبر ٢٠٢٦
لعرض الإجابة في فدني اضغط هنا