السلام عليكم، بصي أنا دايما مع فكرة إن لو مش قادر أتقبل المجال اللي أنا فيه ممكن عادي أحول وميتحسبش الوقت اللي فات ضايع لأن أكيد اتعلمت فيه فالفكرة هتوزان بين فترة عديت (قصرت أو طولت) في حاجة مش قابلها وفترة طويلة سنين جاية قُدام. لكن في حالتك هنصحك بحاجة تانية قبل ما تاخدي قرار التغيير ده، لازم تعرفي الأول أنتِ فعلا كارهة اللغة ودراستها ولا عشان الظروف اللي أدت لها وشعورك بالإجبار وإنها اتفرضت عليكِ بعد ما كنتِ عاوزة حاجة مختلفة، بمعنى إن كان ممكن أي لغة تانية غير الفرنسية لو اتفرضت عليكِ بنفس الطريقة كنتِ كرهتِها. جربي كده فترة، انسي خالص إن الفرنسية لغة أنتِ بتدرسيها جامعيًا وجربي كده تدرسيها مع نفسك كلغة عادية من الإنترنت مش كتب الجامعة. يعني اسمعي بودكاست كتير، شوفي فيديوهات يوتيوب أصحابها متحدثين أصليين، المواد المسموعة والمرئية تكون في حاجة أنتِ شغوفة ومهتمة بها، مثلا مهتمة بالطبخ، شوفي قنوات طبخ فرنسية، مهتمة بالسفر شوفي قنوات سفر وسياحة فرنسية وهكذا. اخرجي من فقاعة الدراسة الجامعية وادرسيها ذاتيًا على الانترنت وإن شاء الله تقدري تتقبليها. غالبًا أصلا الدراسة المدرسية والجامعية بتكرهنا في المواد حتى لو كانت أمتع حاجة. واللغة الفرنسية حلوة عامة ومش شرط عشان اتلغت في الثانوية مش هيبقى لها مستقبل مهني، ممكن تشتغلي مترجمة فريلانسر مثلا. جربي فترة لكن زي ما قلت بعد ما ترتبي أفكارك ومشاعرك وتصفي ذهنك من أي سلبية، وصلي استخارة أكيد. لقيتِ بعد كده إنك ما زلتِ مش متقبلة، إما تحولي وزي ما قلت الوقت اللي فات لا تعتبريه ضاع لأنك أكيد عشتِه وتعلمتِ فيه، يا إما تكملي في الدراسة عشان بس يبقى معك شهادة ومش شرط تشتغلي بها، ممكن من دلوقتي تبدئي تشوفي مجالات أو لغات إيه بتحبيها وتطوريها وتفكري في العمل الحر بها بعد التخرج إن شاء الله. مش الكل عامة بيشتغل بشهادته. أرجو إني أكون أفدتك، وبالتوفيق إن شاء الله.
لعرض الإجابة في فدني اضغط هنا