السلام عليكم، إن شاء الله تعدي امتحانك النهاردة بخير. إجابتي هتكون لامتحاناتك الباقية لو لسه فاضل امتحانات ولحياتك عمومًا. أنا عارفة الموضوع صعب ومقدرة مشاعرك وحالتك وعارفة قد إيه الثانوية العامة بسبب مجتمعنا بتبقى أشبه بجحيم لطلاب كتير وبيفكروها نهاية العالم. ** ليه تكره نفسك وتتمنى الموت؟ هل الثانوية العامة آخرة المطاف؟ إيه المشكلة إنك قصرت وندمت أو حصل أي ظروف غيرت منك كطالب مجتهد قبل كده؟ هل ده داعي لكره نفسك وتمني الموت؟ هل مستقبلك هيتدمر لو لا قدر الله ما نجحتش بالتقدير اللي كان أهلك وانت نفسكم فيه؟ هل الثانوية العامة أصلا هتحدد مصيرك عند ربنا؟ *** محتاج تعرف أولوياتك في الحياة وانت هنا ليه. كلنا أصلًا في امتحان كبير لكن بنقلق ونتدمر عشان امتحانات صغيرة مش هتحدد مصيرنا في الامتحان الأصلي. إنك تتمنى الموت عشان امتحانات مهما كانت قيمتها مجتمعيًا وتأثيرها مستقبلًا ده معناه إنك مش فاهم قيمة حياتك نفسها ولا السبب اللي ربنا خلقك عشانه. *** عارفة إنك حاسس الدنيا سواد مع الوضع اللي انت فيه ويمكن كلامي يكون مثالي أو مش واقعي بالنسبة لك بس لسه قُدامك كتير في الحياة ومع كل تجربة ونضج هتوصل له هتعرف إن اللي انت فيه حاليًا مكنش بالسواد والدمار اللي متخيله. ** استهد بالله يا أخي وتوكل عليه عن يقين ومن قلبك. خلص امتحاناتك وفكر في مستقبلك وحياتك من منظور صح وإن شاء الله تلاقي الطريق ولا تتمنى الموت أبدًا. ما دام لسه بعمرك بقية يبقى لسه قُدامك اللي تعمله في حياتك. ربنا يوفقك ويكتب لك الخير ويرضيك به.
لعرض الإجابة في فدني اضغط هنا